حادثة مع توكتوك ماشى عكس .... حسبى الله ونعم الوكيل
السلام عليكم ورحمة الله
دمى محروق مش عارف اقول ايه
اخويا النهارده عمل حادثه بعربيته خبطه توكتوك ماشى عكس طبقله الرفرف الشمال وكسر الفانوس وكسر حته من الاكصدام , الكلام دا على اول شارعنا فى المريوطيه فى اتجاه فلفله وطلعة الدائرى اللى بتودى ميدان لبنان
اخويا طالع من الشارع بص شماله ملقاش عربيات داس بنزين ولسه بيبص قدامه لقه التوك توك جاى عكس حاول يفاديه بس حصل اللى حصل , احنا كدا كدا عمرنا ماخدنا عوض من حد بس اخويا عصبى شويه واتنرفز فقال يربى الواد شويه فخد مفاتيح التوكتوك منه عشان مايمشيش وقال له هانروح القسم , وكلم ابويا كان فى الشغل بعيد عنه وكلم واحد صاحبه ساكن اول الشارع نزله على طول , كل دا انا كنت نايم وبعد كدا صحونى ورحتله
على ماصحيت ورحت حصلت احداث كتير وبسرعه , فجأه لقوا سرب من التكاتك داخل عليهم ومعاهم اسلحه ( مطاوى وعصيان والذى منه ) وقالوا مين معاه المفاتيح ؟؟؟؟؟ صاحب اخويا اللى كان معاه المفتاح قالهم معايا اتلموا عليه ولسه هايضربوا وبتاع اخويا لقاهم كتير ومعاهم سلاح وهما الاتنين بس قالهم بس بس خدوا المفتاح بس السواق مش هايمشى قالوله ماشى وخدوا التوكتوك , طبعا غلط بس هو كان مضطر يعمل كدا , ومن ضمن اللى جم صاحب التوكتوك لان السواق مش صاحب التوكتوك دا شغال عليه
وصلت انا لقيت السواق وصاحب التوكتوك ودا بقى اللى كان مستفز جدا , انا طبعا وصلت وفى احداث كتير ماكنتش فاهمها ولا عارفها , سألت اخويا بينى وبينه عايز ايه قاللى انا عايز اقرصه فى اى حاجه عشان يتعلم من غلطه , قولتله ماشى فين صاحب التوكتوك قاللى انا وهنا بدأ الحوار المستفز
قولتله انت تدفع تمن الفانوس وانا هاكمل باقى تصليح العربيه وعوضنا على الله , يقوللى لا ياباشا انا هاصلحلك عربيتك بمعرفتى من الالف للياء وانت تصلحلى مكنتى !!!!!! قولتله نعم مين دا اللى يصلح هو مين اللى غلطان ؟؟؟ قاللى هما الاتنين غلطانين قولتله ازاى مش السواق ماشى عكس قاللى ما البلد كلها ماشيه عكس ياباشا انت هاتحسب ال 100 متر دول عكس !!! وكمان اخوك طالع من الشارع ماشى سريع !!! واستفزاز وبرود لأبعد الحدود وانا ماسك نفسى لانى اولا مش متعود اتخانق بالأيد الا لو الظروف اضطرتنى يعنى عمرى مانا اللى ابدأ بمد الايد ثانيا مش هاينوبنا فى الاخر حاجه غير البهدله مع العالم دى , الواد السواق بعد ماكان بيقول انا مش غلطان 100 % هو برضه غلطان قلب مسكين وقعد يقول حقكوا عليا بس انا والله ممعييش حق تصليح العربيه وانا مستعد امضيلكوا على كمبيالات واقلعلكوا هدومى والجو دا
فى النهايه قولت لاخويا نمشيهم لان ولا بالذوق ولا بالعافيه ولا بالقانون هاناخد حقنا , وكدا كدا احنا مابنقبلش العوض احنا كنا عايزين نقرص ودنه عشان يتعلم غلطه بس فى النهايه هما اللى انتصروا وعملوا اللى هما عايزينه , مشى صاحب التوكتوك وقلنا ربنا يعوض عليكما والسواق قعد يعتذر ويتأسف وباس على راس اخويا
وحسبى الله ونعم الوكيل