الموضوع: استفسار بخصوص ثبات البيجو

السلام عليكم
بيجو عربية قوية وتمتاز بالسرعة والمتانة بصفة عامة
وبالنسبة لبيجو 405 بصفة خاصة، وكنت راكب منها 405-1989 فرنساوي وبيجو 405-2001 مصري ومع أخويا لليوم فبصراحة هي عربية محترمة بكافة المقاييس من كفاءة محرك وتسارع وثبات على الطريق حتى 170كم/س، وده مشوفتوش في حاجات كتير زيرو، الموتور المنتشر 1600 و8صمام، عزمه 128 نيوتن وده رقم معقول جدا
العربية مرتفعة عن سطح الأرض رغم ثباتها في الجري والمنحنيات، وصالونها معقول وشنطتها كبيرة
بالنسبة للتكييف فهو كويس جدا لو الموتور مظبوط والتكييف حالته كويسة
المهم إن حضرتك تنتقي منها حاجة يكون استخدامها راقي بمعنى الكلمة وتكون حالتها ممتازة وتكشف عليها كويس في محطة للتأكد من سلامة الشاسيه بنسبة 100% مش 90%، أما الموتور والعفشة تشوفها عند متخصص بيجو، وعشان تفضل العربية معاك كويس متوديهاش عندج أي حد وإنما عند ورشة متخصصة بيجو وده أمر مهم جدا، إنما بصفة عامة العربية محترمة بشرط الحالة!!!!
ومفيش سخونة للموتور لو دورة التبريد سليمة، وفعلا بتسخن لو واخدة هوا أو تسريب أو أي عيب تاني ودي حاجة عادية.
أما حكاية خفة وزنها في الجري فأحب أقول لحضرتك إن الطيارة بوينج وزنها بيخف جدا في الجري، دي نظرية فيزيائية وقاعدة علمية مش للبيجو بس واللي قال على بيجو 504 القديمة كده معندوش فكرة عن البطاطا لأن أي عربية كده وأي جسم في الكون كدة، حتى لامبورجيني وزن السكون بتاعها أعلى من وزنها أثناء الجري على سرعة 150كم/س مثلا وبيكون الفارق كبير. والمقولة بتاعة النعش الطائر اتقالت على 504 ستيشن (7 راكب) لسببين حسب تفسيري المتواضع، إما إنه في السبعينات مكانش عربيات بتجري بسرعة في شوارع وطرقات مصر زمان في السبعينات زي البيجو بانتشار، وفعلا مكانش في مصر غير المرسيدس والفولفو ومش كتير وصحابها قلة مش كتير لأنها غالية، والأغلب عائلة فيات بأشكالها، والبيجو طبعا، والياباني نادرا ما تلاقيه. والسبب التاني إنه لما يكون 90% من سيارات الأجرة بين المحافظات بيجو، فبالتالي أغلب الحوادث تلاقي فيها بيجو وده مش لعيب فيها.
وبالتوفيق