ماحنا لازم يتضحك علينا من الجمارك و الضرايب

**MaNoLa** · 14-07-2012 06:09 AM

لما نتكلم عن الجمارك والضرايب و أحتكار السوق لأشخاص معينه و ماركات معينه دايما بنعرف أن فيه مصالح لناس محددة و ساعتها بنقول لو كانت الجمارك والضرايب قليلة كان زمان السوق مفتوح و مفيش ماركات محددة و أجباريه علينا , بمعنى أصح كانت كل العربيات بقيت موجودة عندنا

لكن من الظاهر ان الحكومة بتفرض جمارك و ضرايب على سلعة مفيش منها أنتاج محلى
يبقى من الظاهر كدة أن الحكومة بتحمى التوكيلات إلى بتقوم بتجميع السيارات
و لو هنقارن نفسنا بدولة مش بتنتج يبقى ممكن نتقارن بالسعودية و دى الجمارك و الضرايب فيها قليلة جدا

و بالرغم من ذلك قاموا بحملة خليها تصدى و موديلها يعدى و نجحت بشكل مقبول و بعدها على ماأظن تم تخفيض أسعار السيارات (مش عارفة من الجمارك و الضرايب بالظبط ولا من المعارض على العربيات القديمة) و بالفعل كان على النت شكلها مصدية فعلا دا غير طبعا أن العربيه هنا فى مصر درجة و فى السعودية درجة تانيه خالص , و الكماليات كلها بتنزل بشاشات و جى بى أس عندنا لو فيها كاوتش أحمد ربنا و بوس أيدك

أحنا عندنا فى مصر بقى
جعجعة على الفاضى
يعنى لما نقول للناس أستحملوا شوية و محدش يجدد عربيته عشان يبقى ضغط على الحكومة و المعارض , الناس تقول ماشى و ياخدها الأنفعال أوى و كأننا فى أنتفاضة السيارات و لكن بعدها بساعتين ممكن الكلام دة كله يتنسى مرة تانيه و تلاقى إلى كان بيتكلم دة جايب عربيه موديل 2056 متستغربش بقى من الموديل بس هوا كدة

ثانيا بقى الأجراء القانونى
يتهئ لى المفروض كل المحاميين يكونوا على علم بكدة و إلا ليسانس حقوق إلى أخده يتهئ لى خساره فيه أن أى دولة بتقوم بفرض الجمارك و الضرايب بالشكل دة يبقى بتحمى المنتج المحلى وبرضة ميبقاش المنتج المحلى بجنيه و المنتج المستورد بمليون جنيه يعنى برضة بيبقى بنسبه معينه , لكن لما نلاقى الضرايب و الجمارك بتزيد حوالى 200% عندنا فى مصر يبقى صباح النصابين
طيب فين المحاميين ؟
عمرنا ماسمعنا عن واحد رفع قضية مثلا بتعديل الجمارك والضرايب ليه ؟

بالوضع دة لازم يتضحك علينا
و الحرامية تزيد فى البلد و محدش يفتح بئة
و لازم نعترف كلنا أننا أتضربنا على أفانا و محدش يقاوح
و يا ريت ننسى حلمنا الفاشل فى أنتاج سيارة مصريه 100%

فرق الأسعار بين مصر و السعودية
طبعا انتم عارفين الأسعار فى مصر كويس أوى مع العلم أن الريال السعودى = 1.6 جنيه مصرى
و الأسعار كلها من موقع حراج السعودى مش من دماغى

كرايسلر هيمى 2005 بسعر 55 ألف ريال سعودى
كرايسلر هيمى C300 2005 بسعر 47 ألف ريال سعودى
جيب ليميتيد 2011 بسعر 95 ألف ريال سعودى
كاديلاك سكاليد 2007 بسعر 130 ألف ريال سعودى
فورد أكسبديشن 2007 بسعر 70 ألف ريال سعودى
فورد جراند ماركيز 1997 بسعر 14 ألف ريال سعودى
شيفروليه سوبربان موديل 2002 بسعر 45 ألف ريال سعودى
جى أم سى اكاديا 2007 بسعر 70 ألف ريال سعودى
جى أم سى يوكن 2011 بسعر 130 ألف ريال سعودى
هامر H3 موديل 2006 بسعر 65 ألف ريال سعودى
لاند روفر فوج موديل 2005 بسعر 90 ألف ريال سعودى
سوزوكى جراند فيتارا موديل 2009 بسعر 55 ألف ريال سعودى
سوزوكى سويفت موديل 2009 بسعر 25 ألف ريال سعودى
سوزوكى ليانا موديل 2005 بسعر 12 ألف ريال سعودى
سوزوكى ألتو موديل 2004 بسعر 5 ألاف و نص ريال سعودى
بورش كايين أس 2008 بسعر 135 ألف ريال سعودى
مازدا زوم 3 هاتشباك موديل 2007 بسعر 23 ألف ريال سعودى
دى ماكس موديل 2007 بسعر 63 ألف ريال سعودى
كابريس موديل 1995 بسعر 8 ألاف ريال سعودي
تويوتا كرولا XLI موديل 2010 بسعر 45 ألف ريال سعودى

طبعا أغلب العربيات إلى مش موجودة فى مصر فى القائمة دى لو دخلت مصر مش هتبقى أقل من 300 ألف جنيه

الأسعار دى بالجنيه المصرى شوف ممكن تخليك تركب عربيه عاملة أزاى

يعنى مثلا الكورولا هناك بـ 45 ألف ريال سعودى يعنى = 72 ألف جنيه مصرى
شوف بقى الكورولا هناك موديل 2010 بكام و الـ 72 ألف جنيه مصرى ممكن يخلوك تركب أية هنا

أنا قارنت نفسنا بالسعودية لأنها أقرب دولة لينا فى عدم الأنتاج للسيارات و محدش يقولى أصل لو جيبت العربيه من بره هتبقى غاليه , هقولة ماهى السعودية بتجيبها من بره برضة و بتبقى رخيصة
بل بالعكس انت عندك مراكز تجميع سيارات يعنى المفروض يبقى الأسعار أرخص لأنك بتتجمرك و بتدفع ضريبة على أساس قطع غيار

**semi** · 14-07-2012 06:35 AM

اضيفي الى ذلك الفرق الشاسع بين العربيات اللي بتنزل هناك والعربيات اللي بتنزل عندنا
لكن في كل الاحوال ده مش ذنب التجار هما بيحاولوا على اد ما يقدروا يجيبوا موديلات
ويقفلوها بمصر عشان الجمرك يبقى اقل وبيشيلوا منها كماليات على اد ما يقدروا عشان مش تتجمرك
يعني مثلا جهاز الgps لو نزل على العربية ده جمرك كده لوحده والكاسيت برضه وهكذا
فيستبدل الكاسيت مثلا باخر من مصر شركة محلية كده وكده عشان مش يستورده
فأعتقد المشكلة كلها من الدولة وفرض الجمارك بشكل مبالغ فيه جدا
وطبعا ياما اتكلمنا في المواضيع دي بنقعد نتحسر لكن مفيش فايدة
لان نظام متشابك عشان يتم الغاء الجمرك لازم يبقى فيه تعويض من منطقة تانية
لا يمكن الجمارك تتلغي علطول كده لانها مصدر ضخم في خزانة الدولة ومن الهوا على الجاهز كده
لكن في بريق امل ان العربيات الاوروبي هتتلغي الجمارك بتاعتها على عام 2019
وده شئ كويس بس هل بشكل جاد فعلا وهل مفيش خوازيق وضحك على الدقون

**minicooper20** · 14-07-2012 06:37 AM

قولنا الكلام ده كتير
مفيش فايده
بلدك بتتعتمد على الجمارك فى جزء كبير جدا من الميزانيه
الموضوع فيه حجات من تحت البنج كتيييييييييييييير

**elmo3alem** · 14-07-2012 01:04 PM

مع احترامى لوجهه نظرك الموضوع مش عشان التصنيع والتجميع المحلى الموضوع لتغطيه على مصروفات دعم الدوله للمنتجات البتروليه
بدليل ان كافه الاجهزه الكهربائيه بتتجمع فى مصر وجودتها كويسه والمستورد بيجى غالى جدا وده منطقى بالنسبه لاسعار العربيات فى السعوديه انا عايش هناك واحب اقولك ان تسعيرك على موديلات قديمه لامعنى له
مثلا النترا فل اوبشن ب 68000 ريال *1.62يطلع 110,160 يعنى الفرق فى الجمررك فقط
ملحوظه لى تجربه مع النترا بالذات النترا اللى فى مصر موديل 2009 لما اشتريتها مواصفات وكيل كانت افضل من النترا صديقى اشتراها فى السعوديه 2010 والمواصفات المصريه كانت بكامليات اكتر

**mido** · 14-07-2012 02:49 PM

لو شالوا الجمارك هيعوضوا فرق الدخل بتاعها منين؟ اقرب حل الغاء دعم البنزين و كده كلنا هنلبس
هي منظومه متشابكه فيها فساد ده اكيد بساكيد فيه جزء كبير بيدخل خزينة الدولة

**shaddadfalcon1** · 14-07-2012 03:50 PM

الظريف انهم معليين الجمارك قال عشان السي سي واستهلاك البنزين مش فاهمين ان دلوقتي في تكنوجي عاليه بتخلي العربيات تستهلك بنزين اقل يعني مثلا مواتير BMW & MERC الجديده بتاعة الفئه الخامسه وال E Class بتشم البنزين مع انها 8 سيلندر وبتعدي ال 550 حصان وتلاقيها بتستهلك بنزين اقل من عربيه كوري 1600 بس تقول لمين

وبعد كل ده يجي تاني يدفعك ضريبه وانت بترخص عشان البنزين تاني مع انه خده في الجمارك

ال X5 مثلا بتعمل مليون ونص في مصر مع ان تمنها 50 الف دولار يعني حوالي 300 الف جنيه مصري يعني فرق قول مليون جنيه يعني لو افترضنا انه هيتستهلك 500 لتر شهريا وبنزين 95 كمان يعني بنكلم في 1,500 جنيه وده رقم كبير جدا طيب في السنه بقي؟ حوالي 18,000 جنيه ياعم قول 20 الف جنيه
يعني المليون جنيه اللي دفعهم جمارك يكفوه بنزين 50 سنه ياظلمه ويرجع تاني يدفعه 2% من تمن العربيه اللي هو حوالي 35 الف جنيه ليييييييييييييييييييييييي يييييييييييييه؟

**Mohamed.Ramah** · 14-07-2012 05:07 PM

كتير اتكلمت فى الموضوع ولا حياة لمن تنادى لان الموضوع بيبقى ما بينا وبين بعضنا داخل المنتدى ودمتم مفيش تحرك رسمى او مطلب رسمى لجهة مسؤلة فى الموضوع دة وطول ما احنا بنشترى حيفضل الوضع كما هو حتى لو لاحظتم فى تخفيضات كبيرة هذة الايام ياترى هما كدة خسرانين طبعا لا بس الفكرة هما مباعوش الفترة الفاتت لان فى ناس كتير اجلت قرار الشراء لاكثر من مرة وهما حسوا بالخسارة ويمكن داقوها لاول مرة من شعب كل ما العربية تغلى يجرى يحجزها قبل ما تغلى اكتر ويرجعو يبيعهولنا بتخفيض 5.000 وكلام فاضى !!! مفيش للاسف وعى والية معينة لتحديد اختياراتنا وقرارت الشراء بالاضافة لالهائنا بمشاكل كثيرة فاصبح الوضع فى قلة البنزين وطرق مكسرة واشارات بايظة ومفيش وعى بالطريق او حتى الالتزام بابسط قواعد المرور دة الناس بقت بتكسل تشغل الاشارات !!!!

**shaddadfalcon1** · 14-07-2012 07:52 PM

فعلا اكتر حاجه بتخنقني هو تفاهة الناس
يعني تلاقي الوكيل واخد 9% خصم علي الجمارك عشان الصيانه وقطع الغيار اللي مش موجوده والصيانه اغلي من بره بنسبة 100000000% وتلاقيهم مغلين العربيه غير المكسب اللي هما اصلا كسبانينه كتوكيل ويجي فجاه بدون مبرر يغلي العربيه 10 الاف وبعديها بكام شهر يعمل عرض وينزلها 4000 ولا 3000 تلاقي الناس زي الهبل يروحو شترو ويقولك عرض وهي اصلا اغلي من الاول ب 6000