مشكلة سخونة و صوت تنفيس في الموتور

السلام عليكم
ازيكم يا شباب
انا عندي استشارة سريعة كده
حصل معايا حاجة انا مستغربلها اوي
العربية تسخن لحد قبل الاحمر بشرطة و تنزل تاني
يعني وانا ماشي الاقي مؤشر الحرارة طلع لفوق ويفضل فوق بتاع دقيقة كده و ينزل تاني ويفضل الكلام ده يتكرر لحد لما اقف بالعربية
الموضوع ده حصل معايا مرتين
بعد المرة الاولى روحت للميكانيكي قالي ان فيه تسريب زيت و عمله وخلاص
وبعدها باسبوع الموضوع اتكرر
طبعا انا كنت بحط مياه خضرا بس اول مرة لقيت المية ناقصة تقريبا 2 لتر و تاني مرة نفس الكلام
فزودت مياة عادية
دلوقتي لما الموضوع ده حصل لقيت الزيت زي ماهو
اه نسيت اقولكم ان لما الحركة دي بتحصل اجي افتح الكبوت و انا مبطل العربية بسمع صوت تنفيس جامد من خلف الانجكشن كده وبشم ريحة غريبة

الغريب بقه ان العربية تاني يوم لما ازود مياه بترجع عادية كأن مافيش حاجة حصلت
فانا عايز اعرف المشكلة ممكن تكون فين و ارجع للميكانيكي اقوله ايه عشان انا حاسس انه بيشتغلني
نوع العربية سوزكي بالينو 98 1300 انجكشن
اسف للاطالة و شكرا على وقتكم

الموضوع واضح... فيه عندك تسريب من المنطقة اللى فيها صوت التنفيس... و الريحة دى ريحة الميه الخضراء

انا مش خبير فى البالينو بس عموما انت حتحتاج تغير الجزء اللى بيسرب سواء كام خرطوم او كوعة او جوان

MMamdouh

ممدوح باشا
شكرا على الرد يافندم
طيب معلش اعذر اخوك الصغير
لو كده يبقى المفروض المياه تنقص كل يوم
بس ده مابيحصلش
عايز اقولك اني سافرت بالعربية اسكندرية وكانت الحرارة طبيعية
فتفتكر فيه حاجة معينة بتخلي التسريب يشتغل
يعني عايز اقولك ليه الموضوع ده مش بيحصل كل يوم
معلش اعذرني انا عايز افهم عشان اتكلم مع الميكانيكي و انا فاهم
وشكرا مرة تانية ياباشا

على طريق السفر بيبقى الهوا داخل على الرادياتير طول الوقت و الحياة منجة... اما جوة البلد فا الحركة بطيئة جدا و المراوح بتشتغل و تطفى باستمرار يعنى ميه التبريد بتوصل لاعلى درجة مسموح بيها و دة بيعلى ضغط دورة التبريد و اكيد بيضغط على مكان التسريب و بيخلى نقص المية يبان

كمان ممكن اوى يكون التسريب بيبان لما تبطل العربية فقط... اصل فى الحالة دى كل مكونات دورة التبريد بتقف لكن الموتور مازال بينقل حرارتة للميه و دة برضة بيرفع الضغط داخل الدورة و يضغط على مكان التسريب

MMamdouh

تمام يافندم
يعني انا اروح للميكانيكي واقوله عندي تسريب في المنطقة دي واخليه يدور عليه فين
متشكر جدا يافندم
ربنا يكرمك

و ابقى قوللى وصلت لايه مع الميكانيكى برضة عشان ابقى عارف

MMamdouh

ان شاء الله

بص انا كان عندى نفس اللى انت بتقول عليه ده بالظبط بس كان زياده ان فى ميه بتنزل من الشكمان
كنت فاكر الاول ان ده المتور بيعرق زى ما الناس بتيقول
بس طلع جوان الشكمان فيه تسرب مياه وده السبب اللى كان بيخلمى مش بشوف اى مياه بتتسرب عند المتور كدة يبقى انت اكيد عندك تسرب ميه من مكان ما حاول توصل ليه وتعرف من فين