أول ضحايا العربية

إمبارح نزلت من الشغل بدرى كان عندى مشوار وكنت راكن العربية فى الجراج قدام الشركة

المهم العربية كانت مولعة نار لأنها كانت فى الشمس من الصبح لغاية الساعة 4.30 العصر لما نزلت

قلت أفتح الزجاج اللى فى الباب اللى جنبى يهوى العربية شوية

المهم كنت مستعجل ومشيت ونسيت أأقفل الزجاج وكنت حاطط الموبايل بتاعى جنبى ونوعه قيم شوية

المهم وانا بلف من أحد الملفات فى جامعة الدول العربية علشان أروح الدقى لقيت حد بيخبط على شنط العربية

أنا قلت أنى دوست على رجله ولا حاجة لأنى لسه مش خبرة أوى فى السواقة مع انى كنت متأكد أنى ملمستوش بس الشهامة بقى خليتنى أأقف

المهم وقفت وبقوله انت فيك حاجة ؟؟

لقيته بيقولى مش تخلى بالك قلتله انا ملمستكش المهم انت كويس

راح واحد تانى جاه من جنب الباب اللى جنبى وخطف الموبايل وطار عكس اتجاهى

طبعاً أول حاجة فكرت فيها العربية وقلت فى داهية الموبايل مع انه غالى اوى

اللى ينقط ان ابن التيت اللى خبطلى على شنطة العربية عمل نفسه بيجرى وراه

وده أول موقف وأول ضحايا العربية

الحمد لله وقدر الله وما شاء فعل