الموضوع: عربيتى و محمد عبدة

انا كلمت محمد عبدة و جبت كل التفاصيل و مضطر اكتبها دلوقتى طالما صاحبة الموضوع مش عايزة تقول حاجة و مينفعش نشكك فى زمة شخص و نجرى و نسيب الناس تاخد فكرة خطاء

تفاصيل القصة كالاتى:

العربية دى عملت حادثة محترمة على الطريق الدائرى... دخلت فى حاجز اسمنت بهدل العربية تماما من الامام و كان فيه لوحة فى الدفرنسية الخلفى

المدام اخد ت العربية لوشة فى العمرانية و العربية فضلت هناك شهر و اتعمل فيها شغل عك و المدام قامت بسحب العربية عن طريق احد معارفها و عمل خناقة مع الناس هناك لان العربية بقت معيوبة

انا قولت الكلام دة لما وضحت الحالة اللى كانت عليها العربية لما جت لعبدة فيما يخص المسافات بين علبة الفيوزات و الشنب و قاعدة البطارية

بعد ما المدام سحبت العربية من عند الناس بتوع العمرانية اشار عليها نبيل (سائق ميكروباص) انها تروح لعبدة و قبل ما حد يشتغل فى العربية راحوا بيها لتوكيل ابو رواش للكشف

ساعة لما نبيل دة اخد العربية من عند عبدة كانت بتدور زق لان البطارية كانت نايمة تماما... طبعا العربية اترمت شهر فى العمرانية لازم البطارية تتوفى

المهم لما راح نبيل لابو رواش رفضوا اصلا يبصوا فى العربية و قالوا العربية دى لا تصلح للاستخدام الادمى و مينفعش نقبلها فى الورش بتاعتنا

بعد فشل المحاولة دى راحو توكيل الكويت و البلاد العربية عند عبدة و تكرر نفس موقف رفض عمل اى شىء فى العربية لانها معيوبة و ملعوب فيها

محمد عبدة تكرم و خللى مهندس الفحص يبص على العربية فى ساحة الاستقبال بدل ما تدخل بjob و الست تتكلف 110 جنية

المهم فى الاخر العربية رجعت صفت عشان تتصلح بعد ما توكيلين رفضوا استلام العربية و كل القصة دى بقيادة نبيل و الغريب فى الموضوع ان المدام قالت لعبدة ان جوزها متوفى و انها بتربى عيال و قصص كدة ملهاش اى لزمة و لا محل من الاعراب... المهم عبدة قالها انا حتعامل معاكى على انك اخت

العربية جت ببطارية ميتة وناقصة اللباد اللى تحت الموكيت و فبر بطانة الشنطة و فبرة القايم الشمال و مجرة الكونسول الامامى و حاجات كتير رفايع على كل لون و شكل

نسيت اقول ان البطارية لما اتحطت على تونجر الشحن التونجر عمل قفلة و كان حيولع المحل... واضح ان البطارية كانت ماتت تماما

المهم عبدة فك الموتور و الفتيس عشان شغل الحوض و راحت العربية للسمكرى... العربية اتفك منها كل مكونات الصالون عند سروجى و الحاجة اللى اتفكت كانت فى ورشتة اما الطابلوة و الضفيرة و خلافة اتفك بمعرفة كهربائى و كانت الحاجة فى ورشة السمكرة

عشان الناس اللى بتسرق عبدة... اهى الحاجة مطلعتش فى ورشتة اساسا و بتتهموه فيها... خللى عندكم ضمير

بعد ما السمكرى اشتغل فيها فترة لقى ان مش نافع اى نوع من انواع الاستعدال لان العربية اتلعب فيها فى ورشة العمرانية و مفيش اى حل ان وش العربية يرجع زى ما كان غير تغيير الربع المخبوط

خلال الفترة دى كان نبيل هو اللى بيتعامل مع السمكرى و هو اللى كان بتعامل فى الماديات مع الست صاحبة العربية

المهم تم شراء ربع امامى استيراد عشان عملية القص و اللحام و شوية حاجات تانية من عند ابو هاشم بتاع الاستيراد و طبعا كلكم عارفين ان مفيش حد بتاع استيراد بيدى فاتورة بس طبعا مستر نبيل الجن كان حاضر عمليات الشراء و حاول يتفلسف لما كانوا بيشتروا دينامو لانة كان مكسر و ابو هاشم قالله 350 و عبدة خلصة ب 225 و تقريبا اشتروا سربانتينة تكييف كمان و جابوا جوز مساعدين امامى جداد

نمرة ابو هاشم مش سرية و اللى بيتعامل معاه ممكن يتاكد من الاحداث و الاسعار اللى انا كاتبها

المهم السمكرى قطع و لحم الربع السليم و ضبط اللوحة اللى فى الدفرانسية (العربية كانت ماشية على الطريق شبة معرضة لان الدفرنسية الخلفى كان مرحل للجنب... و دة كان كل الشغل اللى اتعكل فى العربية من ناحية السمكرة لان دة هو اللى اتاثر بالحدثة

عمنا نبيل باع الربع المقطوع خردة بالوزن و محدش يعرف الفلوس دى مصيرها ايه... كمان عبدة كان اشترى جوز جنوط حديد جداد للعربية و نبيل باشا مدفعش حسابهم حتى اليوم

لما العربية راحت لبتاع الدوكو الراجل رش الربع الامامى و العتب فقط لان دى المناطق اللى اتسمكرت... محدش جة جنب الابواب لانها مش تبع الحادث و بالتالى مينعش يترشوا و هما على حالتهم... و غالبا دة السبب ان المدام بتشكى ان البوية زبالة... طبعا ما العربية مرقعة و نبيل هو اللى بييتعامل و الله اعلم بيبلغ اللى بيحصل و لا لا ولا ايه

فى وسط الحوارات دى نبيل رش موتوسيكل عند بتاع الدوكو و محدش يعرف مين حاسب على ايه لان كل الحسابات كانت بتتم عن طريق نبيل

المهم خلصت العربية و جة وقت التقفيل و طبعا كان فيه نواقص كتير من ساعة ورشة العمرانية فا الناس حاولت تلم الممكن يتلم و بالتالى العربية اكيد منظرها مكنش يصر عدو ولا حبيب بعد شهر فى العمرانية و شهرين فى صفت و بدون متابعة

محمد عبدة اللى الناس بتقول عليه حرامى كان جاب الجرس الزنان اللى بيشتغل لما حزام الامان ميكنش راكب لانة مكنش شغال فى عربية المدام... و ساعة التركيب الكهربائى لقى ان الضفيرة بتاعت الزنان هى اللى عملة المشكلة و الزنان نفسة سليم... تفتكروا لو واحد زمتة واسعة حيروح يرجع الزنان تانى لابو هاشم و يرجع لنبيل 70 جنية؟؟؟؟؟؟؟ اتقوا الله

المهم العربية خلصت و جة وقت الاستلام و الست قالت انتوا بوظتم البطارية و دى كانت كويسة و انا لسة شريها و عملت فلم... عبدة اتصرف فى بطارية مستعملة من عندة عشان يلم الدور مع ان البطارية كانت متوفية اصلا قبل ما العربية تيجى صفت

انا اعرف اللى بينصب بياخد حاجة قيمتها عالية و يديك حاجة قيمتها ولا حاجة... مش العكس... واضح ان عبدة نصاب على قدة اوى و مش فاهم اللعبة كويس

و لما جة وقت الحساب مع عبدة... الراجل كان عايز 700 جنية نظير الحاجات اللى اشتراها من ابو هاشم و مصنعياتة فى الفك و التركيب...عبدة لقى واحد عميد بيكلمة و بيقولة انة من طرف المدام و ان انت - قصدة على عبدة - تبيع الحاجات اللى اتفكت من العربية (الخردة) و يعتبر ان دى مصنعيتة ... عبدة رد و قال انا مش عايز حاجة... حسبى الله و نعمى الوكيل و حقى عند الست دى حاخدة يوم القيامة

يعنى كما ن فى الاخر الراجل اضحك علية و ماخدش فلوس.... السؤال المهم جداااااااااااااااا.... فين ال 8000 جنييييييييييييه؟؟؟

اللى يعرف الاجابة حنديلة ربع عربية دايو عاملة حادثة و موتوسيكل مرشوش حديثا و شوية فكة على الماشى

اعتقد بعد الكلام دة وضحت الصورة كويس اوى ليكم و بان مين كان بيلعب دور ايه و امتى و ازاى و مين اللى امين و مين اللى مش امين

و انا عايز اعرف بقى راى الناس اللى اتهمت عبدة فى ذمته تقول ايه بقى دلوقتى؟؟؟ انتوا كنتم شطار اوى على الكيبورد لما كنتم بتقطعوا فى الراجل و دلوقتى بعد ما قريتم التفاصيل عايز اشوف شطارتكم مرة تانية و خللوا بالكم... انتم لما عيبتم فى عبدة كنتم بتعيبوا فيا شخصيا لان انا اللى رشحت الراجل دة لكل الناس اللى هنا و معتقدش انه قصر مع اى حد فيكم و بالتالى سمعتة من سمعتى

هااااااااااا... راى الرجالة اللى دمها حامى ايييييه دلوقتى؟؟؟ لسة شايفين ان عبدة حرامى و نصاب.. و طبعا لو هو كدة يبقى انا كمان زيه... مهو مفيش على لسانى غير سيرتة.... صح؟؟؟؟

يا ساده راجعوا ضمائركم قبل ان تتهموا الناس فى ذمتهم... مش معنى ان الراجل مش موجود او مش حيعرف يدافع عن نفسه اننا نقطع فيه و خلاص... الراجل دة انا بعتبرة صديقى قبل ما يبقى الميكانيكى بتاعى لان هو عمل معايا وقفات جدعنة كتير ميعملهاش اصحاب من سنين مع بعض.. و عشان كدة اللى يدوس على طرف ليه يبقى بيدوس ليا انا شخصيا على طرف

اعتقد ان جة الوقت و تبقوا قد الموقف و تعتذروا عن الللى قولتوه فى حق راجل غايب و عاجز عن الدفاع عن نفسة و صدر عليه حكم بانة نصاب و غير امين حتى بدون ما نسمع التفاصيل من ناحيتة

فى انتظار رد فعلكم اللى حيبين حقيقة شخصياتكم

MMamdouh