الموضوع: عامود الكامة اتكسر تاني (أوبل كورسا سيدان)

السلام عليكم يا شباب

بما اني خلصت موضوع تقييم العربية .. جاي لكم بمصيبة المره دي.

يوم الخميس بالليل .. جاي من ميدان لبنان و ماشي على المحور و كنت ناوي أطلع الدائري عشان أروح الزقازيق .. و مره واحده حسيت ان العربية متلته .. أنا قلت يمكن البوجيهات مش كويسه .. مع اني مغيرها من فترة قريبة .. المهم ركنت على جنب .. قبل طلعة الدائري على طول .. الحمد لله ان الحته كانت واسعه شوية .. و فضلت أحاول في سلوك البوجيهات .. و مفيش فايدة برضه العربية بتدور و الموتور يتهز و تبطل .. طلعت العده و فكيت البوجيهات و نضفتها .. بس للأسف في بوجيه اتكسر مني.

طبعا اكتئبت .. و كلمت واحد صاحبي في أكتوبر قلت له يجيب لي طقم بوجيهات و ييجي لي .. قال لي أجيب ميكانيكي معايا .. قلت له مش مستاهله .. هي تقريبا بوجيهات .. و فضلت مستنيه على المحور بتاع ساعه كده لحد ما جه هو و ميكانيكي شاب صغير من الشيخ زايد.

و للحديث بقية ...

انا هختصر بأه عشان الموضوع ميطّولش.

يوم الجمعة الصبح كنت محتار أودي العربية فين .. و ليه المشكلة دي بتتكرر معايا كتير .. يعنى ان عامود الكامه يتكسر مرتين في 3 شهور حاجه مش طبيعية .. المهم قلت أوديها الحرفيين عند الشيخ هيثم .. انا متعاملتش معاه قبل كده .. بس أسمع انه كويس.

كلمت ونش تاني .. و جه خدني من الشيخ زايد للحرفيين ب 300 جنية (اه ياني يا فلوسي)

وصلنا على صلاة الجمعة بالضبط .. ركنت العربية و غطيتها (عشان الازاز مكسور) .. و بعد الصلاة لقيت عربيات كتير جت .. و بتدخل قبليه .. و انا مش عارف أدخل عشان عاوز حد يزق العربية معايا .. المهم دخلت الساعة 3 .. كان في ييجي 10 عربيات أوبل جوه .. معظمهم فيكترا بي .. و 2 أسترا 1600 .. وواحده أسترا 1200 .. وواحده استرا هاتش باك .. و فيكترا سي.

المهم اشتغل في عربيتي ولد اسمه حلمي .. ولد مؤدب جدا .. و صبور .. و شغله نضيف و مبيكروتش مع اننا مشينا الساعه واحده صباحا.

المهم فك الهيد و العامود ووش السلندر و وراهم للشيخ هيثم .. قال لي روح شوف هيد و عامود استيراد .. و متجيبش عامود بس عشان لازم يكون مطبع على الهيد .. و راح قاس وش السلندر عشان كان مخروط قبل كده و قال لي هنحط جوانين (هي أصلا كان فيها جوانين) .. و قال لي العربية دي بتاكل كامات هي واللانوس .. يعني العيب ده متكرر فيها.

المهم ألّف على هيد و عامود كورسا .. مفيش تماما .. الشاطر كان عنده موتور برازيلي نضيف أوي .. بس بيبيعه على بعضه ب 6000 الاف جنية من غير الفتيس و ب 7000 جنية بالفتيس .. و بصراحة نادرا جدا لما تلاقي موتور للعربية دي و يكون أوبل عشان بتنزل بره شيفرولية و كده .. و عنده موتور تاني الماني .. بيقول لي أديلك شورت بلوك .. يعني وش السلندر بالصبابات و الهيد بالعامود ب 2000 جنية .. قلت له ده 1600 سي سي قال لي اه .. و الله أعلم.

قلت أدور على عامود و هيد لانوس .. برضه مفيش خالص .. كله عاوز يبيع الموتور على بعضه .. لقيت عامود جديد فيبي ب 600 جنية .. و هيد بتاع لانوس جديد ب 450 .. كلمت الشيخ هيثم .. قال لي لأ متجيبش جديد .. أنا هشوف كده.

المهم رجعت له .. لقيت حلمي بينضف في هيد بالعامود بتاعه .. مكتوب عليه GM .. و بصراحه استنضفته أوي .. قلت لهيثم احنا هنركب ده؟ .. قال لي لسه اما يتنضف هشوفه .. لو العامود مش متاكل .. نركبه .. المهم بعد ما اتغسل هيثم شافه قال تمام .. و كان في واحد صاحبي جالي .. بص عليه و قال لي كويس .. الهيد بالعامود ب 600 جنية .. و بدأ حلمي يقفل الهيد على وش السلندر.

من الحاجات الكويسة عند الشيخ هيثم ان قطع الغيار اللي بيجيبها نضيفة .. غير عبد الله أوبل .. يعني الجوانات ajusa .. و كان في ولد معاه فيكترا سي .. كان بيغير له سيور .. السيور اللي جابها له gates .. و بيستخدم سيليكون نوع نضيف و عنده أجهزة كشف و الورشة عموما نضيفة وواسعة.

المهم بعد ما حلمي ركب الهيد على وش السلندر .. و لسه هيربط .. كانت الساعة 8 بالليل تقريبا .. قلت له شوف غطا الموبينة كده هيركب على الهيد ده (الجزء المعدن اللي الموبينة بتبات عليه) .. لقاه مش هيركب .. قام حالل الهيد تاني و راح لهيثم يسأله هنعمل ايه .. و المحلات بدأت تقفل .. و غالبا مش هنلاقي هيد تاني .. و الدنيا اسوّدت في وشي ...