الموضوع: سؤال للناس اللي كتبت قايمة قبل الجواز

المشاركة الأصلية كتبت بواسطة شريف

خلاص مادام مقلقين كدة يبقي يتكتب فيها الحاجات اللي هما جايبنها بس
يعني المطبخ و الاجهزة الكهربائية تتكتب ليه
انا مش متخيل انني امضي علي ورقه مكتوب فيها خلاط و لا سخان مياة - حاجه تكسف
و الدهب اللي العريس بيجيبه اللي مفروض اسمه حسب الاعراف و التقاليد الزفت هديه العريس يتكتب ليه ؟ يعني انا جايب حاجه بفلوسي و اكتبها امانه علي نفسي !!!!!!! اديني عقلك

اول مبعدنا عن الاسلام و تعاليم الرسول الكريم بقينا لعبه في ايد الشيطان و كل واحد عايز هو اللي بيقي الشاطر و متخمش و نسينا ديننا للاسف

هل الحل ان الواحد يقول شكرا متسعدونيش و انا هجيب اللي هقدر عليه في شقتي انا و هنام علي سريري انا اللي محدش ماسكلي ورقه بيه و هبقي خايف اخد راحتي عليك ليتكسر و اروح في داهيه
هل هيرضوا ان اجهز شقتي بنفسي بس حبه حبه يعني لو مقدرتش اجيب في الاول الا غرفتين مثلا بدل اربعه او بلاش الستاير الغاليه الشانيليا و البلاك اوت و الطرابيش و حتي بلاها ستاير و ربنا لما يرزقني هعمل كل حاجه نفسنا فيها

دة حتي الناس طالبين اشتري شبكه و علي العلم مبلغها مش قليل اليومين دول و لسه مشافوش شقتي اصلا ؟ طب اشتريها بصفه ايه ؟ و رفض لموضوع دبله و توينز دلوقتي و بعدين الشبكه في كتب الكتاب طب ليه ؟ الشبكه انا بجبها شاعتها لمراتي بس دلوقتي هي صفتها ايه ؟ و دينيا مش صحيح انهم يحتفظوا بحاجه انا جايبها و هي لسه مش ملك يميني ؟
مع العلم ان مفيش قرابه او اي درجه معرفه قبل الموضوع دة بس الواحد زهق من مواضيع الجواز اللي بالشكل دة ؟

الذهب بيكون على شكل هدية فعلا انما في الحقيقة جزء من المهر بالاضافة للعفش وزي ماقلنا محدش بيدفع مهر اليومين دول..
وفعلا الصح زي ماحضرتك بتقول انك تدفع لها مهر يناسب مستواها وتجهز شقتك برضه حسب امكانياتك ومحدش ليه حاجة عندك
بس مش هانظلم اهل العروسة دايما ونقول هما السبب بس لان في الحقيقة معظم الشباب بقوا هما اللي بيصعبوا على نفسهم وبيبقى عايز عفش اعلى من امكانياته شوية وعنده استعداد يتزنق شويتين وكمان لو اهل العروسة هايساهموا في العفش بيطلب مستوى معين برضه.. وبيتكلم في انواع الاجهزة اللي هايجيبوها

المشاركة الأصلية كتبت بواسطة تامر.محمد

1- كنت افضل ما اكتبش , بس في الحقيقة اصل القايمة اعتبار ان العفش اللي هما جابوه مهر ( انا ما دفعتش مهر)
الاصل في الشرع انك بتفرش البيت و بتدفع مهر كمان , في الحالة دي طبعا مافيش حاجة اسمها قايمة
ما دفعتش مهر , هنا في مصر بيحسبوه انه العفش اللي هما جابوه
انا لو اقدر ماديا كنت تكفلت بكل حاجة و ما عملتش قايمة

2- الدهب و الصيني , الدهب ما اتكتبش و الصيني اتكتب بعد خناقة

3- الخلاف على الدهب و الصيني عمل مشكلة ايامها :)

4- لو بنت ناس ولا هاتفرق معاها

5- لأ

6- اهم حاجة ما تسمحش ان حاجة تتكتب باكتر من قيمتها , و ما تكتبش الدهب بالذات

الشرع في المهر مبلغ بيتشال معاها ليها هي ولا تجيب بيه حاجه في الشقه - وآتوا النساء صدقاتهن نحلة - طب ايه رأيك في الشبكه مش هي نفس الغرض بس بيسموها هديه مش صداق ؟

المشاركة الأصلية كتبت بواسطة timtim

هو ليه بنكتب قايمة اصلا؟ لان المفترض ان الزوج يدفع مهر لزوجته يكون خالص ليها ومتدفعش منه مليم في تجهيز الشقة..
انما دا مش بيحصل وبيقوم الزوج بتجهيز الشقة وكمان الزوجة بتشارك معاه في التجهيز فكدا يكون العفش دا هو مهر الزوجة اللي من حقها..

القايمة مش وسيلة لربط الزوج وتعجيزه عن الطلاق
انما هو ضمان للحقوق عند الطلاق.. (أكيد وقتها بتكون النفوس متغيره ولو شيء بسيط)
فرق كبير بين الحالتين..

والمفروض ان الزوج من نفسه هو اللي يبادر بكتابة القايمة دي لانه هو المؤتمن عليه
كما علمنا ربنا في آية التداين ( فليكتب وليملل الذي عليه الحق وليتق الله ربه ولا يبخس منه شيئا)
دا الشركاء لما بيكونوا شركة بيكتبوا في العقد في حالة فض الشركة هايتخارجوا ازاي ومين ليه ايه وكدا ومحدش بيقول احنا مش مأمنين بعض ولا حاجة..
الخلاصة انها وسيلة لضمان الحقوق ومش عيب وغير منتقدة..

طب هو ضمان الحقوق في العفش مش في قوانين و محكمه اسرة و نفقه متعه و نفقه حضانه و خلافه - هو القانون مش هيجيب كل الحقوق للطرفين و للزوجه خصيصا
و هي حقوقها ساعتها العفش المستعمل ؟ طب دة لو اتباع مش هيجيب عشر تمنه ؟ ولا مبلغ القايمه النهائي قول مثلا 200 الف يبقي انا لو حاولت انفصل لاي سبب هبقي مجبر اسدد المبلغ دة مع المؤخر ؟
و فين أمساك بمعروف او تسريح بأحسان ساعتها ؟ ممكن الواحد لو مش كويس او جاب اخرة يحاول يقرف بقي في الناس و في البنت لغايه متقول حقي برقبتي و تخلعة ؟ امال محاكم الاسرة مكتضه بقضايا من هذا الشكل ليه ؟ علشان بعدنا عن الشرع و تركنا نفسنا لاهؤائها - *وَنَفْسٍ وَمَا سَوَّاهَا*فَأَلْهَمَهَا فُجُورَهَا وَتَقْوَاهَا*قَدْ أَفْلَحَ مَنْ زَكَّاهَا*وَقَدْ خَابَ مَنْ دَسَّاهَا

و هو مفروض يكتب القايمه علشان هو مؤتمن عليها ؟
و ايه التداين دي بيكتبها المدين ياباشا للي عليه حق ؟ معتقدش الواحد اللي هيتجوز بعد ميجيب شقه و الحاجات التانيه انه بيبقي مدين ؟ يبقي هو اتفاق النص بالنص دة مش مساعدة من اهل العروسه دة دين او امانه و كدة رحنا جانب اخر لانني علي كدة مفروض اسدد الدين اللي في رقبتي في اسرع وقت

على فكرة انا برضه وانا بتزوج كنت متضايق من موضوع القايمة ومتأثر بالكلام بتاع مش مآمنني على شوية عفش واللي عايز يطلق بيطلق والكلام دا..
بس مع شئ من المعرفة بحقوق الزوجة ومهرها وتعظيم الحقوق في الاسلام واهمية توثيقها -اطول آية في القرءان هي اية التداين ولم يُكلف النبي بتعليمنا هذا الامر - طالما حق عليك يبقى مفيش غضاضة ولا حرج من توثيقه..

موضوع تاني ممكن بعض الناس متاخدش بالها منه ان المؤخر متى اصبح للزوج القدرة على سداده اصبح واجب عليه السداد وليس الوجوب وقت الطلاق فقط..
وان الزوج وهو بيتزوج يكون في باله انه سيقوم بدفع هذا المبلغ فعلا وانه مش مجرد رقم بيبين اذا كان شاري العروسة ولا لأ...
هو جزء من المهر مؤجل لحين ميسرة يعني دين واجب السداد..

يعني يا جماعة لو حد من اللي ليهم اخوات بنات .. اخته تزوجت بدون قايمة وحصل لاقدر الله طلاق والراجل قل اصله وقال ملهاش حاجة عندي ولا عفش ولا حاجة..
هاييبقى ايه الوضع؟ وبرضه هايبقى شايف انها ملهاش لازمة؟؟
مجرد استفسار لان مليش اخوات بنات

لما رحت اخد مراتي ونروح شقتنا اخو مراتي قالي عايزك وبعدين دخلنا اوضه وقالي امضي ههههههههههه وبصيت لقيت الرقم تحت 50 الف وترددت للحظات ومضيت زي الشاطر وخدت المودام وروحت