لو ناوى تسيب الشغل و تروح شغل تانى أو لأى سبب
تخش لمديرك تقوله إيه مع الأخذ فى الأعتبار انه شخص محترم ولكن هذا هو حال الدنيا
مستنى إقتراحتكم و مواقف سابقة
لو ناوى تسيب الشغل و تروح شغل تانى أو لأى سبب
تخش لمديرك تقوله إيه مع الأخذ فى الأعتبار انه شخص محترم ولكن هذا هو حال الدنيا
مستنى إقتراحتكم و مواقف سابقة
طبعا حقوله السبب اللي عشانه حسيب الشغل
يعني مثلا مش مستريح
جالي عرض احسن
اتخنقت و حغير ال career
حسب يعني انت حتسيب الشغل ليه
بسيطة 000 تدخل وبكل صراحة تشرح له الموقف وتفهمة ان ترك للعمل معه لايعنى اى شىء اكثر من تحسين وضع اجتماعى سواء مادى او وظيفى ، حتى اذا علم بعد ذلك تكون امامه صادق وامين ويحترمك واذا رجعت لاى سبب اخر يقبلك دون جدال 000 شرط ان تعطية الفرصة للبحث عن فرد اخر لملء الوظيفة الخاصة بك ، ولكن اياك وان تدعى اى سبب غير صحيح فالصراحة اقصر الطرق للتصديق
والله يوفقك فى عملك الجديد
فكرة جامدة جدا
بص لو فى مشكلة , حاعمل حوار و اعلى صوتى شوية بس فى حدود الادب طبعا و اوصله انى مش نافع اكمل على كده
لو قدامى شغل احسن حاخش اقله انا لقيت حاجه احسن و معلش و بتاع , لو هو عايزنى اكيد حيحاول يقنعنى انى اكمل
مش عايز بقى انا اروح اشوف طريقى :)
خد مني نصيحة
انا باشتغل من سنة 1987
وعدى عليا الموقف ده اكتر من مرة
اولا لازم تحرص تماما علي انك ما تخسرش الراجل ده والناس اللي في الشركة اللي ح تسيبها
ثانيا : لازم تمشي من المكان اللي انت ح تسيبه بمنتهى الشياكة ... بدون ما تزعل حد منك
قوللهم انك ماشي من الشركة بصراحة واعطيهم فرصة كافية لتعيين بديل لك وحاول تساعد اللي ح يمسك مكانك قدر المستطاع انه يلم الشغل بدون مشاكل
اللأسباب :
1 مش من مصلحتك انك تخسر اي شخص ولو كان شخص بسيط
2 علاقات بالناس اللي كانو زمايلك تعتبر كنز فعلا ... معرفة الناس والعلاقات لا تقدر بثمن
3 انت ممكن تتعامل معاهم تاني باي شكل من الاشكال .... انا حصلت معايا اكتر من مرة اني رجعت لنفس الشركة اللي سبتها ... لكن بمنصب اكبر ...وهما اللي طلبوني بالاسم ..... لو مكنتش علي علاقة جيدة بهم ما كانوش طلبوني ...
إيه يارجاله هما 4 بس اللى سابو شغلهم قبل كده؟
بمجرد ما هلاقي بديل
هدخل افتح المكتب برجلي
وارميله الاستقاله في وشه
وهختار وقت زنقه شغل
ومفيش فرصه يلاقي بديل
.....................................
يا عم انت ليه الموضوع دلوقتي
خلتنى عشت الموود.
اقولك انا مش استنى لما الاقي بديل
انا قايمله
سلااااااام
أتفق مع الزملاء في انه لابد ان تترك الباب موارب و لا تقطع علاقتك بعملك السابق لأن الدنيا صغيره و على رأي المثل "اللي الزمن مايحوجكش لوشه ..بكره يحوجك لقفاه" ..
و ايضا في معظم الأحوال لازم تكون صادق مع مديرك في ان تخبره أسباب تركك للعمل ..و انا قلت معظم لأن في مديرين مرضى نفسيين ما ينفعش تقوله أنا ماشي و خلاص حتى لو بأسلوب كويس ..ممكن يعقدلك الدنيا و طلع عليك كلام لمجرد انه انت اللي سبت الشغل مش هو اللي ماشاك و الكلام ده شفته بيحصل مع واحد زميل في فندق سابق
الكلام اللى قالوه الاخوة الاعضاء صح ومظبوط
انا غيرت الشغل اللى انا فيه حوالى 5 مرات لحد دلوقتى بس مش هقدر افيدك
لانى كل مرة كنت بعمل مشكلة واحلف ان لو الارض اتهدت انى مش راجع المكان ده تانى
طبعا ده مش صح ، فانت حاول تخلى دايما فيه باب خلفى تقدر ترجع منه
يا جماعه انا هاسيب الشغل الاسبوع ده
ومن الاخر هابعت استقالتي ب sms
خلاص ان شاء الله مسافر المانيا السبت الجاي ده
يعني مهاجر ان شاء الله
اللي ماتحتاجش وشه النهارده بكرة تحتاج قفاه
هتبقى عيبه فى حقكاقتباس:
يا جماعه انا هاسيب الشغل الاسبوع ده
ومن الاخر هابعت استقالتي ب sms
انت اقعد مع المدير واشرح الظروف وقوله ان الموضوع جه فجاة وانك هتسافر
رسالة موبايل هيبقى شكلها بايخ اوى