خدمة أوتو ايجيبت أصبحت سيئة ؟ ولا أنا متهيألي ؟
أعزائي الصقور..
زي ما انتوا عارفين اني استلمت من كام شهر كده عربيتي التيدا من أوتو إيجيبت.. و عملت صيانة الألف و الخمسة هناك في أبو رواش و بقيت بحب المعاملة هناك جدا لدرجة اني كنت باقول بيني و بين نفسي ان الناس دي باحترامها و حرفيتها استحالة اسيبهم و أروح لحد تاني ..
بس مؤخراً روحت عملت صيانة العشرة .. قبل الصيانة كان عندي شوية ملاحظات..
الحمد لله انا لم اضطر من ساعة ما استلمت العربية اني أستخدم الكوريك اطلاقاً .. لكن و انا ماشي من كام يوم لاقيت واحد صاحبي عطلان و واقف على المحور .. نزلت لاقيته محتاج كوريك.. اديتله الكوريك و لاقيته بيقولي فين عصاية الكوريك ؟ قلتله عصاية ايه ؟ قالي يعني هارفع الكورك بصباعي :d أدور على عصاية الكوريك في العربية أني ألاقيها.. أبداً,, و أفاجأ اني ما استلمتهاش أصلا مع العربية... :(
و طبعا ما ينفعش تروح لبتاع الإكسسوارات تقوله لو سمحت انا عاوز عصاية كوريك.. بيبتاع كله على بعضه مش حتت منفصلة..
و كان عندي مشكلة في الكاسيت .. لما باركب موديوليتور بفلاش ميموري كان الصوت بيبقى ضعيف جدا و مش نقي زي باقي العربيات..
و لما روحت التوكيل في صيانة العشرة قلتلهم على الملاحظتين دول و كان رد فعلهم كالآتي و ده رد المهندسة أمينة مسئولة الصيانة:
-------------------------------------------
بالنسبة لعصاية الكوريك .. حضرتك المفروض تكلم الراجل اللي باعلك العربية اللي هو الأستاذ أحمد المقدم في أوتو ايجيبت المهندسين.. و هو يجيبلك اللي انت عاوزه.. اللي حضرتك طالبه ده مش عندنا في الورشة..
و بالنسبة للكاسيت فده تصليحه أو صيانته أو الكشف عليه مش عندنا.. ده حضرتك في توكيل الكاسيت. و انا هاعرف بالظبط بالظبط مكانهم و مواعيدهم و هاكلم حضرتك على طول.
(بالظبط بالظبط دي دلالة على التوكيد اللفظي)
-------------------------------------------
طبعا انا سامعها بتتكلم و حاسس بالزحلقة في كلامها.. و طبعا أتصل بأحمد المقدم ما يردش.. و لما يرد مش فاكر أصلا ..ما هو ربنا يعينه بايع بتاع سبعين ألف عربية من بعد التيدا بتاعتي.. و يقولي لاء أصل انت واخدها بقالك أكتر من 5 شهور و أكيد مش هانبوظ كوريك علشان سعادتك..
و بالنسبة للكاسيت طبعاً ما فيش حد كلمني ولا عبرني بعدها..
و بالنسبة لصيانة العشرة نفسها بقى.. حد يغير زيت 10 ألاف و يربط عفشة ب450 جنيه ؟ و كمان واخد العربية تقريباً ممسوحة مش مغسولة و مردومة تراب من جوة كأن ما فيش حد لمسها بالهوفر أصلا ؟؟
و كل عام و انتم بخير بمناسبة العيد الصغير.,,
أخوكم ..درويش