في حالة ضعف المياه .. الموتور أفضل ولا الخزان؟؟

السلام عليكم ورحمة الله وبركاته..
الموضوع ان العمارة فيها موتور واحيانا بيعطل وعلى مابيتصلح ممكن ياخد وقت نظرا للتاكسل
وانا في الدور الاخير (الخامس) وفي حالة عطل الموتور المياه بتوصل برضه بس بتبقى ضعيفة ولو في ضغط في ايام الصيف ممكن تبقى ضعيفة جدا..
فكرت اعمل موتور خاص بس هاحتاج اركب عداد خاص وكمان توصيلات من العمومي لحد الدور الخامس ووصلة كهرباء..
وفكرت في الخزان على اساس اني في اخر دور والموضوع مفيهوش توصيلات كتير
بس عايز اعرف هل الخزان هايديني قوة دفع كويسة للمياه ولا لأ؟
ولو حد يعرف اسعار الخزانات الاستانلس او البولي ايثلين

اذا كانت المياه منتظمة في المنطقة الموتور أفضل أما إن كانت مش منتظمة يبقى الخزان احسن حل

خزان كبير واشتري دماغك بس هات نوع نضافته سهله وعلى فترات بعيده علشان متقرفش منه

عن تجربة للخزان وللموتور
انا افضل الموتور

عشان ضغط الميه .. لأن الخزان هيجيب ميه ضعيفه ده غير القلق من نظافة الميه ومش هينفع تستخدمها فى الطبخ مثلا

لكن الموتور انا باحتاجه عشان ضغط الميه بيكون كويس يشغل السخان.

لو الميه بتقطع فى المنطقة يبقى الخزان افضل
لو المية ضعيفه وبتوصلك بس ضعفية ومابتقطعش يبقى الماتور هيحل المشكلة دى

وبردة الماتور افضل علشان الخزانات ميتها مش حلوة

الخزانات بيقع فيها بلاوى
وبيبقى مقرف قوى

ماهو الخزان لو استانلس من الانواع الجديدة مش هايلم حاجة ولا هايحتاج نظافة كتير ومع الفلتر تبقى مفيش مشكلة ولا ايه؟؟
وازاي ضغط المياه من الخزان مش هايبقى قوي وهي نازلة مندفعة ومعظم العمارات حاليا بتعتمد على الخزانات!!

اقتباس:

---

المشاركة الأصلية كتبت بواسطة timtim

وازاي ضغط المياه من الخزان مش هايبقى قوي وهي نازلة مندفعة ومعظم العمارات حاليا بتعتمد على الخزانات!!

---

انت سألت فى اول الموضوع على النقطة دى ..

وانا رديت عليك عن تجربة لان عندى ده وعندى ده ..

اقتباس:

---

المشاركة الأصلية كتبت بواسطة hyper3g

انت سألت فى اول الموضوع على النقطة دى ..

وانا رديت عليك عن تجربة لان عندى ده وعندى ده ..

---

صح يا باشا كلامك مظبوط
الظاهر ان الخزان بيبقى كويس بس للي في الادوار السفلية لان المية على ماتنزل ليه بتكون خدت ضغط عالي
او على ماسمعت في حاجة اسمها جوكي عبارة عن موتور صغير بيتركب بعد الخزان علشان يعمل ضغط كويس
الموتور النص حصان بيعمل كام بقى؟

ممكن تجيب خزان وتحطه فوق بير السلم
فوق شخشيخة السلم
يعني مش على السطح عندك على طول

وفي الحالة دي هيديك ضغط معقول
وهاته خزان من النوع الرأسي

وكل شهرين بتغسل الخزان مرة
ولو معجبكش ضغط المية بتركب بعده طرمبة صغيرة رخيصة


لكن لو المية عندكم موجودة على طول ومبتقطعش إنسى موضوع الخزان
وهات طرمبة حصان إيطالي كالبيدا بالبلونة بتاعتها

والأفضل من ده كله تشترك مع سكان العمارة وتشتروا ماتور للعمارة كلها حصان ونص أو إتنين حصان إيطالي وتريحوا بالكم
وهذا أفضل حل

انا شايف الخزان افضل لنقطة ان الكهرباء بقت تقطع كمان كتير جدا و محدش بيستغني عن المياه و المتور شغال بي الكهرباء انت فاهم وجهة نظري بس النقطة الوحيدة ان المياه بتبقي ضعيفة ياريت يركب فوق اعلي حاجة عندك في العمارة يعني لو في حجرة غسيل او حجرة مصعد افضل