الموضوع: لو عربيتك بتسخن اقرا الموضوع

السلام عليكم و رحمة الله و بركاته
اخواني اعضاء قسم السيات
حبيت اعمل موضوع عن كيفية تتبع اعطال سخونة السيارات ، و حبيت كمان انقل تجربتي و اللي حصل معايا لما عربيتي سخنت ، و شرح الموضوع بالكامل عشان الناس كلها تستفيد .. و نظراً لان الجو بقا حر جدا فا دايما العطل بيبان
نبدا باسم الله
في الاول احب اشكر الاستاذ ايهاب لانه ساعدني كتير لما عربيتي سخنت مرة و الحمد لله بفضل الله و بفضل توجيهاته قدرت اكتشف العطل و العلة فين بالظبط .

في اعطال بتظهر بتلاقي الامبير عالي على طول و بيستمر لحد ما يوصل لاقصى درجة في الحالة دي بتشيك على الاتي (تهريب في دورة التبريد او قطع في الخراطيم - مشكلة في غطاء الاربة - مروحة مش شغالة - ترموستات) .. لازم نعرف ان غطاء الاربة ليه وظيفة مهمة جدا انه بيظبط الفاكيوم اللي جوة الاربة او بمعنى اصح داخل دورة التبريد بالكامل .

في ملحوظة مهمة جداً : ممكن ميبقاش فيه مشكلة في تسريب او غطا الاربة او حتى فيوز و المشكلة في المروحة نفسها موتورها بايظ بتلاقي مروحة تبريد سربينتينة المكيف اللي هي بتكون المروحة الصغيرة شغالة و التانية واقفة يبقا في الحالة دي بتشيك على على الفيوز اللي فوق البطارية الاول لو تمام يبقا فيه مشكله في المروحة الكبيرة فعلاً و لازم تتبدل .

طيب اعرف منين ان المراوح اساسا سليمة ولا لا ؟؟؟
شغل التكييف عندك لو المروحتين شغالين يبقا المراوح سليمة لو واحده شغال وواحده فاصلة يبقا تشيك على الفيوز اللي فوق البطارية لو سليم يبا المروحه اللي ما بتلفش لازم تطلع بره العربية و يتشيك عليها ممكن يكون سلك سايح لو موتورها تارس من جوة .

طيب فيه عطل تاني و ده اللي حصل معايا : بتلاقي الامبير بيعلى بعد درجه 90 بشرطه او اتنين و بعد كدا يرجع تاني لوحده 90 مع العلم ان مافيش مشكله لا في تهريب ولا عطب في غطاء الاربة و المراوح شغالة .. بيكون هنا المشكلة في ترموستات الماكينة اللي بيسموها (ترموستات الكوعة) ،، و اللي بيحصل انها لما بتخرب بتعلق سعات تفضل مقفوله لحد ما المية جوه الماكينة تعلى جدا تفتح شوية صغيرين تبرد و بعد كدا تقفل تاني تقوم معليه الحرارة ،، لكن لازم ناخد بالنا كويس انه ما بيفضلش الامبير يعلة و ينزل كتير بعد كدا بتقفل خالص و ما بتفتحش يبقا اول ما يحصل معانا كدا نبدل الترموستات على طول .
على فكرة في الكتالوج موريلك ان فيه بعد 90 منطقة امان لارتفاع الحرارة و لكن لو ركزت هتلاقية بردوا مديلك تحزيرات من المنطقة الامان ، ده لان المفروض ان ضبط حرارة المصنع 90 و اكيد ان طلاما الامبير مش واقف عند 90 و علي اذا دي دلالة على ان فيه حرارة .

في ناس بتعمل كوبري بتخلي المروحة مباشر على البطارية علشان المروحة تفضل دايرة و يرح باله من حرارة الصيف ما انصحش بكدا لسببين و ده رايي :
1- بيبرجل كهربا العربية 2- بيخلص على عمر المروحه بدري .
بمنتهى البساطه اللي صنع العربية كان ممكن يعملها بدالك و بطريقة صح .

في نصايح احب اضيفها و مهمة جدا من واقع التجربة :
1- لو الامبير عندك علي فجأه و قربة المية اكتشفت انها فاضية اوعى تفتح القربة لان لو عملت كدا لو الترموستات عندك سليمة هتبوظ في سعتها ناهيك عن ان ممكن المية السخنه اللي في الماكينة اول مكان هتطلع منه طبعاً هو القربة اللي انت نفستلها منه و ممكن تصيبك لا قدر الله .
في عربيات ابتداء من 2002 في حساس على القربة بيعرفك لو المية نقصت و على فكرة في عربيات 2004 مافيهاش الحساس ده زي كوردبا 2004 مش موجود في القربة موجود في مكان ما في الماكينة .

2- سعات بتروح تعمل كبس و تنضيف لدورة التبريد و بعد ما تمشي شوية صغيرين تلاقي الامبير عندك علي و ده بيكون هوا دخل الماكينة و ما خرجش من غطاء الاربه لان بيكون مافيش ضغط كافي لخروجه و بالتالي الامبير يعلا معاك في الحالة دي لازم العربية تبرد خاااالص و بعد كدا تفتح غطا الاربة و تزود المية الناقصة مع تتبع خروج الهواء اما من القربة او اني افك خرطوم الفايظ و اتتبع خروج الماء لحد ما فقاقيع الهوا تخرج و ارجع تاني اوصل الخرطوم في القربة مكانه و تزويد القربه حتى علامة الامتلاء .

3- انصح بستخدام المية الخضرا لعده اسباب و لكن اهم سبب و هو ده اللي يخص الموضوع انه المية الخضرا بتكتشف مكان التهريب ... طبعا الناس هتستغرب ازاي المية هتكتشف مكان التهريب ؟؟؟ و بمنتهى البساطه كلنا عارفين ان المية الخضرا هي مية مقطرة لا يوجد بها املاح يعني منزوعة العناصر اللي بتسبب تأكل جسم المحرك و ممرات التبريد في الدورة و مضاف اليها اللون الاخضر و ده بيكون لون المادة العاكسة الفسفورية اللي تخليك بسرعة تكتشف مكان التهريب من غير ما تروح تشيك على التهريب عند مختص .

4- كل الخطا ان تفك الراديتر و تطلعه بره العربية و تفك الفبر بتاعه علشان تنضفه ، مافيش راديتر بيتعمل فيه كدا ، انا بشوف ناس بتعمل كدا و ده خطأ .


طيب فيه حاجه عاوز اعرفها لا اصدقائي في القسم و هي معلومة مش جديدة عن البعض و لكن فيه ناس ما تعرفش ان :
معظم اجزاء التبريد في المجموعة الالمانية ( فولكس - الاودي - السيات - الاسكودا) متقاربة في الشكل و الحجم و المقاسات .. بمعنى ان في واحد عنده مشكلة في راديتر انه تهالك او ملحوم قبل كدا و مش لاقي لنفس موديل عربيته ممكن يقدر يجيب من احدا المركات السابق ذكرها مع الاخذ في الاعتبار سنوات الصنع المختلفة و ما يوازيها من جميع الفئات على سبيل المثال

جولف 4 او اودي a3 و سيات ليون 2002 و 3 و4 تقريبا نفس المواتير و نفس التفصيل الداخلي للقطع مع الاختلافي فيما يميز هذه الموديلات شكلاً و مضموناً يعني هتلاقي الاختلاف بسيط في حجات تخص كل نوع عربية على حده لكن في النهاية القطع الميكانيكة الى حد كبير جدا نفسها .


ارجو ان اكون افدت الناس كلها في نقل تجربتي البسيطه للناس علشان تعم الفائده
اعذروني لو الموضوع مش منسق و لكن انا كنت بكتب و خلاص خوفا ان معلومة تقع مني في السكة .

و شكرا جزيلاً

شكرا اخي علي الموضوع القيم جدا