استفسار عن اتساع صالون الجوك

السلام عليكم و رحمه الله و بركاته
كان ليا استفسار بسيط يا شباب و يا ريت تفيدونى فيه
انا كنت ناوى على صنى الجديده و مقتنع بيها لحد ما واحد صاحبى كان ناوى على جوك فبصراحه لما قريت عنها هنا كتير و التقييمات اتوهمت بيها عربيه بسم الله ما شاء الله تحفه فنيه المهم انى عملت استخاره علشان اجيب الجوك و الحمد لله الموضوع ماشى قدمت عرض الاسعار بتاع الجوك و مستنى الاجراءات تخلص المشكله انى مكنتش لاقى العربيه و لقيت واحده فرانى واحد صاحبى يعرف صاحب المعرض فى القاهره عنده المهم اخدت عرض الاسعار بتاعها و هيبيعها 163500 جنيه يعنى 3500 حنيه اوفر برايس
استفسارى يا جماعه عن الصالون و مدى اتساعه يعنى زى انه عربيه مثلا بالنسبه للكنبه الخلفيه يعنى انا ركبت الصنى الجديده ما شاء الله على الوسع الخلفى فهل الجوك اقل بكتير و لا معقوله اصل مفيش حد اتكلم عن العربيه بالسوء فى اى حاجه الا ضيق الكنبه الخلفيه و ضيق الشنطه فقط حتى فى اى موقع اجنبى لتقييم السيارات
المشكله انى مش معايا عربيه دلؤتى علشان اسافر اتفرج على الجوك على الطبيعه بالنسبه للوسع الداخلى و نفسى حد يفيدنى وسع الصالون زى انه عربيه زى صالون اللانوس مثلا او البونتو كلاسيك اقرب اتساع لصالون عربيه مماثله.
و شكرا

الكنبة الخلفية معقولة لشخصين بالغين - أكتر من كده صعب قوي
الرؤية الخلفية هتكون مشكلة لحد متتعود عليها
الشنطة صغيرة جدا بحجم 251 لتر فقط

لكن العربية كماتور وفتيس ومواصفات >> تمام

ومبروك مقدما

شكرا لرد حضرتك بس هى صالونها اقرب لانه عربيه زى الانسر و لا الصنى القديمه و لا لانوس يعنى اقرب لايه يا ريت حد يفيدنى
و شكرا

اقتباس:

---

المشاركة الأصلية كتبت بواسطة kliken

شكرا لرد حضرتك بس هى صالونها اقرب لانه عربيه زى الانسر و لا الصنى القديمه و لا لانوس يعنى اقرب لايه يا ريت حد يفيدنى
و شكرا

---

زي الصني القديمه تقريبا

شكرا لرد حضرتك
انا النهارده كلمت واحد قريبى ساكن قريب من المهندسين فى فرع هناك فى شارع سوريا تقريبا و راح بص عليها علشان اتأكد من موضوع اتساع الصالون و هو بصراحه ريح قلبى فعلا ان الصالون مش ضيق برخامه معقول هو ركب التيدا و الصنى و قالى طبعا انهم اوسع قلتله طبعا انا عارف ده كويس بس اكد لى انها افضل من حيث الشياكه و التقفيل من الاتنين ان طبعا ركبت الاتنين قبل كده لكن الجوك بشوفها فى الشارع بس بصراحه ارتحت كتير على كلامه و ربنا ييسر الحال و يقدم اللى فيه الخير

نسيت اذكر ان قالى على الفرق بين التيدا و الصنى قالى انه واضح فرق الخامات بين التيدا الكامله و الصنى بس ده طبعا لان فى فرق فلوس كتير بينهم برضه بيوص لحوالى 30 الف فده منطقى

أنا سافرت القاهره امبارح الخميس و روحت على اوتو ايحيبت المهندسين و شفت الجوك و ركبتها على الطبيعه و حسيت انها مناسبه ليا و مش خنيقه فى ضيق الصالون هى فعلا وسعها لا يقارن بالتيدا و الصنى الجديده بس مش فارق معايا اوى وسع الصالون أنا شايفه مقبول حيث انى وأخذ على صالون الكولت ( : ربنا ييسر الحال و الاجراءات تخلص بدرى بدرى و استلمها ان شاء الله بس هى عربيه واحده ربنا يسهل و تفضل موجوده برغم اوفر برايس 3500 جنيه
التوكيل قالى ان اللى عاوز يحجز الجوك عنده يدفع 50000 ألف علشان جديه الحجز و بعدين يستنى لاخر شهر 8

العربية فعلا الصالون ضيق لانها شبابيه والشنطة صغيرة بس مفيش اى مشاكل تانيه بالنسبة للاوفر برايس العربية موجوده فى الاسكندرية شوفتها الخميس اللى فات عند احمد مرعى بـ 160 الف لون رمادى كلمهم وشوف لو لسه متاحه يبقى وفرت 3500 اوفر برايس
العالمية للتجارة والاستيراد والتصدير, سيدى جابر, الاسكندرية, مصر | سيارات - تجار - سيارات جديدة | Yellow.com.eg | 371 طريق الحرية

متشكر جدا يا باشا لردك و تعبك بس انا مش عارف اذا كان ينفع اجيب العربيه من اسكندريه اظن صعب لانى من السويس و غير كده علشان العربيه قسط حد من المعرض هو اللى بيرخص العربيه و ده مش هينفع لو جبت العربيه من حد بره السويس على ما اظن بس لما الورق بتاع البنك يخلص ان شاء الله ممكن اخلى صاحبى تاجر السيارات اللى كان هيجيبلى العربيه هو اللى يكلم صاحب المعرض و يخلص معاه لو ينفع عامه ربنا ييسر
و شكرا لذوقك مره تانيه.