الموضوع: معلومات عن زيت فتيس السيينا ...

السلام عليكم جميعا و اهل السيينا خصوصا و المنتدى الاعزاء....
حبيت اغير زيت الفتيس علشان عارف انه بيتغير كل 40000 الى 50000 كلم
سالت فى التوكيل ام قطره بعد ما قرات المواصفه بتاعه الزيت اللى فى الكتالون بتاع العربيه و طلع كالتالى
تخليقى احادى الدرجه 75 دبليو - جى فور syn - w75 - g4
اللتر ب 85 جم تقريباو بالتركيب و ض المبيعات و اللذى منه 220 جم تقريبا لل2 لتر
طبعا انا بحافظ على العربيه و باحاول التزم بتعليمات المصنع علشان بسافر و مبحبش اى مشاكل اثناء الرحلات لكن حسيت ان السعر كتير حبتين.
فقلت اسال السؤال البرييء التالى
الزيت اللى انتو بتبيعوه ده اصلى ماركه سيلينا اللى فى الكتالون برضه و الا ايه
و كانت الاجابه الدنيئه
لا يا باشا بيتصنع لينا مخصوص من موبيل علشان ده زيت مخصوص.
ترددت لحظه وقلت اراجع فى مكان تانى
رحت المحطات المعتمده زى شل و كالتكس و ردو بلا الزيت ده مخصوص و اللى عندنا فلفلين 90-140 اذا كان ينفع
جه فى بالى اسال فى فالفولين طلع الكيلو ب 75 جم
رحت اسال موبيل العروبه- اللى فى صلاح سالم
قابلت شخص محترم جدا و قالى اللى عندى العادى 90-140 بس اسال و ارد عليك
الراجل مكدبش خبر لقيته بعد 48 ساعه سايب لى رساله على الموبايل نظرا لظروف عمل خاصه بى و الموبايل كان مغلق
المهم كلمته و شكرته على الاهتمام وصدمنى
ان الزيت موجود بشركه موبيل و بيتصنع مخصوص فعلا للام قطره و الجركن 20 لتر
طب ايه العمل
لقيته بيقولى انه من تصفحه على النت لقى منتدى اسمه نايل موتورز و ممكن اشارك مع اكتر من مالك للعربيه و نقسم الكميه علينا خصوصا ان العربيه بتاخد 2 لتر للفتيس سواء ال 1400 او ال 1600
وهنا لعب القدر لعبته و قلتله انا يا افندم عضو بالمنتدى و ان شاء الله اعرض الموضوع للزملاء اللى يحب بس السعر كام لل 20 لتر
قالى لما لقيت الجركن 20 لتر مسالتش بس عموما 48 ساعه و ارد عليك
و انا مستنى الرد
بس حبيت ابلغ الجميع من مالكى السيينا اللى يحب الزيت الاصلى بمواصفات الكتالوج يكلمنى و ان شاء الله يكون بفايده
ده طبعا اذا كان السعر احسن من السعر اللى لقيته فى فالفولين و اول ما اعرف هابلغكوا..
تحياتى للجميع و كل سنه و انتم طيبين ....