تقرير حصري عن صيانة الـ 50 الف للفيرنا

**corsair** · 20-07-2012 03:38 PM

اولا التقرير ده المفروض كنت اعمله من فترة ولكن كنت مسافر اجازة مصيف عبالكم بعد رمضان طبعا كل سنة وانتم طيبين

المهم كنت مربط مع الحاج اشرف علشان نروح نعمل الصيانة سوا في مركز سبيد سيرفس بتاع البشمهندس هاني بس كان بيزف عريس وعروسه في عربيته ومعرفتش اقبض عليه بس انا والله كنت عايز اقابله علشان انقذ العريس والعروسه من اللي كان هيعمله فيهم بعربيته بس للاسف ملحقتهوش والعريس دلوقتي تقريبا بيعمل نص عمره بسببه هههههههههههههه

المهم خدت العنوان من الكابتن طيار اشرف والتليفون بتاع البشمهندس هاني وطيران علي صيانة ال 50 الف

المهم وصلت الحمد لله وقابلت البشمهندس هاني وهو انسان زوق ومحترم لابعد الحدود وكان في فيرنتين مستنيهم يخلصوا والحمد لله ماستنتش كتير وابتدي يفتح المقبرة الفرعونية قصدي كابوت العربية

المهم انا كنت رايح اغير زيت وفلتر زيت واربط عفشه وارجلاش الفرامل واشيك علي الزيوت وشكرا علي كدا لاني كنت من قبلها بشهرين تقريبا كنت مغير زيت فتيس ومغير سير باور وتكييف ودينمو

المهم اشتريت زيت ماتور فيسكو 3000 بيمشي 15 الف كيلو بس انا بغيره علي 10 الف ب 120 جنيه

فلتر الزيت خدته من عند البشمهندس هاني ب 20 جنيه اصلي غبور

العربية ما شاء الله مخدتش اكتر من ساعة وتم تنضيف البوابة والحوض والسربنتينه وتزيت الماتور بالكامل باسبراي WD40 وتم عمل كشف بالكمبيوتر علي العربية والحمد لله كله تمام

ودي صور ة المقبرة بعد ما خرجنا المومياء

التكلفة النهائية لصيانة ال 50 الف للفيرنا

120 جنيه زيت فيسكو 3000

20 جنيه فلتر زيت

50 جنيه مصنعية

الاجمالي 190 جنيه ولا عزاء للوكيل

انتظروني قريبا مع تقرير تغيير سير الكاتينة وكل سنة وانتم طيبين

**Kareem Fawzy** · 20-07-2012 03:43 PM

الله ينور يا حج احمد
واحشنى فينك يا عم

**Ashraf_Ibrahim** · 20-07-2012 07:22 PM

كلام زي الفل يا ريس :d
واحشني والله

**YahiaAshraf** · 21-07-2012 12:08 AM

الله ينور يا باشا على التقرير المتميز

تسلم يا زعيم

**Ashraf_Ibrahim** · 21-07-2012 01:52 AM

اثبت مكانك!
فيسكو 3000 دا ميمشيش 15000 كم عمره يا كروسير!
انا قلت ابص عليه بنفسي :d
اللي يمشي المسافة دي فيسكو 5000 ويا سلام بقا لو فيسكو 7000 يبقا عسل زنجبيل العنب :d
ال 3000 دا تنزله على 8000 كم بالكتير يا ولدي !