طيب ياريت تقولنا مواصفتها (مانيوال .. ستبترونيك.. الخ) وسلبيات العربية (لأن مافيش عربية كاملة طبعا.. ولكن درجة أهمية هذه السلبيات هى التى تحدد تقبل الشخص للسيارة) .. وكيفية التغلب عليها إذا أمكن؟
ألف شكر أ/ farahat .. على هذا الموضوع الذى يتسم بدقة التفاصيل للأبعاد المتعلقة بالميجان .. لأن للأسف أغلب الكلام عليها يأخذ الطابع العام (مش كل واحد راكب عربية بيكون ملم بتفاصيلها الفنية) ...
وفى انتظار مزيد من الحلقات
أشكركم جميعاً على اهتمامكم بالموضوع ، و ربنا يوفقني و أقدر أفيد كل اخواني هنا في المنتدى الهايل دة ،
إسلام باشا ، أنا عشان خاطر حضرتك هجاوب على سؤالك دة مخصوص في موضوع لوحده و نخليه الحلقة الرابعة :)
حلقات جميله جدا ومفيده يا استاذ فرحات
توضح بها حقائق كثيره عن الميجان
بس هما حلقتين الثانيه والثالثه قرأتهم مش لاقي الحلقه الاولي
حضرتك عاوز اعرف هي شركه رينو او اي شركه في العالم هي التي تقوم بصنع وعمل جميع اجزاء السيارهاقتباس:
غير كدة بقى بقية الأنظمة إلي في العربية بتعملها شركات متخصصة في كل مجال ، يعني شركة تعمل التكيف بتاع الميجان ، و شركة تعمل الفرامل (في حالتنا دي TRW ) و شركة تعمل نظام التوجيه الدركسيون والبور (هنا برضه TRW) ، و شركة تعمل نظام التبريد (في الحالة دي Valeo ) ، و شركة تعمل نظام الأمان وال مفاتيح و ال-immobilizer ( هنا Siemens ) ، نظام الإضاءة و الفوانيس (Valeo) ، و هكذا و هكذا
انا لا اتكلم عن التجميع انا قصدي علي ان هل الشركات لا تصنع جميع اجزاء السياره
لاني اول مره اعرف ان شركات السيارات كأنها بتعمل عمليه تجميع لان ما دام شغلهم انتاج وتصنيع محرك وشاسيه والباقي بيكون شركات متخصصه يبقي بيرده تجميع
ولا كل الشركات كده
ارجو توضيح هذه النقطه
ولك كل الشكر والتحيه
شركات السيارات هى اللى بتعمل التصميم مبدئيا والتطوير فية لحد مايوصلوا للتصميم النهائى واللى المفروض هيبدأ تصنيعة
هى اللى بتقوم بصناعة الشاسية والموتور (كأجزاء رئيسية) يعنى الكونترول لأ
باقى الأجزاء كالدوائر الكهربية والفوانيس والكاوتش .................. تقوم بصناعتها شركات متخصصة فى هذة الصناعات تحت الشروط اللى محدداها الشركة الام فى التصميم
والشركة الام اللى هى فى الحالة دى رينو بتقوم بالتجميع فى الاخر
دة طبيعى فى معظم الصناعات مش شرط السيارات بس لأن مش هتلاقى شركة واحدة متخصصة فى كل حاجة وفى نفس الوقت استثمارات ضخمة جدا انها تعمل مصنع لكل مكون فى السيارة وبالتالى اعباء زيادة وفى الاخر مش هتعمل المكونات دى بنفس كفائة الشركات المتخصصة
افتح كابوت اى عربية وهتلاقى الفوانيس نوع ودوائر الكهربة نوع و..........
ملحوظة دة مش تجميع لأنها هى اللى بتقوم بالتصميم حتى الحاجات اللى بتتصنع فى شركات تانية بتبقى بناء على مواصفات محدداها الشركات الام وبتقوم بمتابعتها
أخي العزيز الحلقة الأولى كنت ضمن موضوع "عايز اشتري ميجان " ، و يا ريت حد من الإدارة يقدر يفصلها في حلقة لوحدها ، أو أنا ممكن أعمل بيها موضوع منفصل .
بالنسبة لموضوع الشركات المتخصصة مش هديف حاجة زيادة عن إلي تفضل Noname و قاله بس حبب اشرح الفكرة للإفادة
دلوقتي لو حضرتك عندك فلوس و حتة أرض و عايز تبني فيلا و في دماغك شكلها كمان و متخيل حتة حتة هيكون شكلها إيه ، حلو ؟ .. و عايز تعمل شباك على الواجهة متخيل شكلو بالشبة بس مش عرف ييجي كام ضرفة ولا مقاسات الزجاج ولا نوعه ولا شكل محدد لكل قطعة فيه ، هتعمل إيه ؟ هتجيب شركة متخصصة في الزجاج تعملق تصميم و تصنيع الشباك و ممكن تركبهولك كمان أو تخلي المقاول بتاعك يركبه ، صح الكلام ؟ قول صح :)
طب في شكل تاني ؟ طبعاً فيه ، شركة من بتوع الشبابيك (ذي قبنوري مثلاً ) بتعمل إعلانات عن أنواع و أشكال معينة للشبابيك و ليها مميزات خاصة ، حضرتك بتروح تقلهم أنا عايز الميزة دي في الشباك دة بييجو يظبطوها على شباك حضرتك و يصنعوه على المقاس و يجبوهولك .
طيب في حالة العربيات بقى إيه اللي بيحصل ؟؟ قول إنت بقى :)
رينو عملت ميجان ٢٠١٢ و عايزة تعمل الإضاءة بتاعتها تقوم تروح لشركة بتاعة إضاءة ذي Hella أو Bosch أو Valeo مثلاً و تقلهم إعملولي فوانيس تمشي مع الشكل اللي ادامكم دة و تكون بتجيب نور بزاوية كذا و ترمي لمسافة كذا و حاجات كدة (حسب التصميم اللي هي حطاه للموديل )، تروح الشركات دي تصممه و تيجي تجربه لحد ما يعجب رينو و تقول عليه OK ، إطبع ، و عايزين ١٠٠ ألف حتة أول سنة على أد الإنتاج بتاعنا .
طب و الشكل التاني ييجي ازاي ؟؟
شركة من دول تكون عملة فكرة جديدة فيها تكنولوجية جامدة هنفترض انها Bosch مثلاً ، الشركة دي بيبقى عندها ناس بتوع مبيعات ( أيوه هما دول ذي اللي بيلفو علينا في البيوت :D ) بياخد التكنولوجية دي و يعدو على شركات العربيات كلها (رينو و بيجو و فيات و هيونداي و كله ) و الشركة اللي يعجبها تشتري ، مثلاً رينو تقول أنا التكنولوجية دي عجباني و لزماني في السينيك إعملهالي على التصميم الجديد اللي هنزله للسينيك في ٢٠١٠ و يعملوه و يوردوه و كله يكسب .
اتمنى كدة تكون فكرة الموردين (suppliers ) في مجال السيارات تكون وضحت و هي هي بالضبط بتحصل في كل المجالات الصناعية .
و شكراً ...
أستاذ فرحات
أحيك على حلقاتك الرائعة و أسلوبك الشيق فى توصيل المعلومة
أنا منتظر بشوق الحلقة الرابعة
دا لينك الحلقة الاولى بعد فصلها
http://www.nilemotors.net/Nile/showthread.php?t=30154
و قد تم تثبيت المواضيع فى موضوع (كل ما تريد معرفته عن الميجان)
مبروك يا استاذ فرحات علي التثبيت