الحمد لله قدر الله وما شاء فعل
السلام عليكم ورحمه الله وكل عام وأنتم بخير
الحمد لله علي كل شئ...أول امبارح ماشي وشمالي عربيه نقل ويميني صف عربيات راكنه
وداخل انا عادي خالص ومره واحده لقيته حلدف عليا خالص راح واخدلي الجنب الشمال والعربيه حدفت علي الناحيه اليمين راحت داخله فالباب الامامي لعربيه سبارك كانت راكنه
لغايه ما عرفت افتح الباب كانت العربيه النقل دي طارت...
نزلت لقيت الجنب الشمال بتاعي فيه خبطات بطول العربيه
والباب بتاعي في قطع بقطر حوال 5 سم وكمان الباب اللي وراه
الجنب اليمين العلبه اللي تحت (العتب ) اتطبقت والرفرف اليمين برضه ولقيت فانوس الشبوره اليمين القاعده بتاعته اتكسر منها رجلين من الاربعه ومش لاقيهم وكمان حته البلاستك السوده اللي حوالين الفانوس برضه مش موجوده
ومره واحده لقيت الراجل بتاع العربيه سبارك وماسك فيا ومش راضي يسيبني وعمال اقنع فيه باللي حصل مافيش فايده ., يا عم طب شوف جنب العربيه الشمال شكله ايه ؟ طب معقول يبقي انا اللي غلطان ويكون الجنبين عندي اتدمروا ؟
مفيش فايده المهم من هنا لهنا ناس اتلموا وحكموا اني اشيل تصليح عربيه الراجل مع عربيتي
رحنا عند السمكري قال باب السبارك لازم يتغير ......سعر الباب فاضي اسود 1400 جنيه؟؟؟؟؟
من هنا لهنا والله دفعت للراجل 800 جنيه
ووديت عربيتي للسمكري علشان يشتغل فيها
ان شاء الله العربيه حترجع زي الاول ...بس انا كنت عايز أسأل علي موضوع القاعده بتاعت فانوس الشبوره هل ينفع بتاع الفايبر يفصل رجلين ليها ولا ممكن الاقيها بتتباع ؟ كمان البلاستكه السوده اللي حوالين الفانوس يا تري ممكن الاقيها فين ؟ لاني من السويس
والحمد لله وقدر الله وما شاء فعل
