الموضوع: اوتو ايجبت وصيانة 60000 الف ونهاية الضمان

اولا انا بأحيى الاستاذ ahmed.tv جدا لانة عرفنا بمركز صيانة اوتو ايجبت.
انا معايا نيسان سوبر صالون اشترتها من اللة يسامحهم مودورن موتورز 8-2009 موديل 2010
انا لفيت على كل المراكز تقريبا وكانت الخاتمة مسك نيجى بقة على التقرير:
1-انا فكرت اروح قبل رمضان يوم الأربعاء لان كان فاضل على ضمان 3 سنوات 10 ايام قلت اروح مركز محترم زى ما سمعت من السادة الأعضاء عشان لو فية حاجة تتغير تبع الضمان .
2- دخلت المركز الساعة 12 الظهر بدون ميعاد خت رقم و قابلت المهندس وشرحتلوا الحاجات البايظة فى العربية زى سويتش الكهرباء الامامى والخلفى السماعة واستلم العربية ودخلت العربية انتظار صيانة ودخلت الصيانة الساعة واحدة زى ما ظهر على الشاشة وكانك فى المطار الشاشة بتوضح جميع مراحل الصيانة.
3- احسن حاجة انك شايف كل حاجة بالتفصيل وحظى ان العربية جت امامى بالظبط.
4- العربية طلعت الساعة 5 بعد اربع ساعات كاملة وعمل صيانة بضمير وبمهنية محترفة وباستخدام ادوات ربط كهربائية مظبوط العزم بتاعها زى اللى فى االمنوال كانك مش فى مصر وتم تزوييد زيت البور والفرامل وتغيرت حاجات كتيير , وهى كالاتى:
* المقصين تغير ضمان.
*السماعتين تغير ضمان.
*عدد 2 سوتش كهرباء تغيير ضمان.
طلع تقرير محترم بالحاجات المفروض تتغير بصورة عاجلة وهى كالتى:
*قاعدة ماتور امامى وتم تغييرها على حسابي260 جنية.
*اربع كاوتشلت تراب امامى وخلفى بتركيبهم 750 جنية.
*تغيير الكاوتش فورا وغيرتة فى نفس اليوم فى بردجستون فى اكتوبر FIX&FIT جبت 4 فرد بالبلف الالمانى بالترصيص وانيتروجين 515 الفردة R15/60/195TURANZA AR10.مصنوع فى تايلاند.
انا عرضت الكاوتش الى 195 ودة ادى ثبات اعلى وكنت مش لاقى نفس المقاس الأصلى لنوع TURANZA
* فى اخر اليوم الطويل بعد كل الصيانة دى العربية رجعت زيروا والعفشة بعد تغيير الكاوتش التراب بتاع المساعدين وتربيطهم تانى بنفس العزم الموصى بة وبعد الكاوتش الجديد والنيتروجين وبجد الكاوتش تحفة ومالوش صوت وطري جدا وفى الفرامل رائع.
* وفى النهاية نيجى للايجابيات.
* قمه النظام والنظافة والاحترام امانة عالية احتراف فى العمل واستخدام ادوات حديثه فى العمل وتحس انك فى توكيل مش فى ورشة. العامل بيعمل كل حاجة ومن خلال امر الشغل مش من دماغة ومعاة المهندس جوة الصالة بيتابع كل خطوة خصوصا اثناء فك المقصات والمساعدين وكانوا تقريبا فريق عمل. تم عمل اختبار للعربية من خلال المهندس وتم التاكد ان كل شئ تمام.
نيجى للسلبيات:
*المفروض بعد عمل تغيير المقصات لابد من عمل ظبط زوايا وهذا لم يحدث وكانت العربية وانا رايح اكتوبر بتحدف يمين وانا فى توكيل بردجستون سالتة على ضبط الزوايا وقولت لة انى غيرت المقصات قالى فى واحد اسمى ابو حبيبة في السنتر اللى قبل البشاير عندة جهاز ظبط زواي بكاميرا ليزر ثلاثية الابعاد ورحت لة وفعلا المكان محترم ورفع العربية وكان المقص اليمين مرحل نصف سنتى وعمل الزرجينة وظبط الزوايا والعربية يا معلم بعد كل اللى تعمل فيها رجعت احسن من الزيرو .
في النهاية انا باشكر ahmed.tv تانى وكل السادة الاعضاء على مركز اوتو ايجبت وانا بدفع الحساب ندمت ان مش معايا الألأستكرز ودفعت تقريبا 1400 جنية بدون تغييير زيت اوفلتر هواء لانى كنت مغيرهم فى صيانة55000. وارجوا فى النهاية ان يستمر هذا المركزعلى مستواة.

ملحوظة انا سالت المهندس عل الصنى الجديدة وهى احسن ولا السوبر صالون قالى السوبر طبعا فى كل حاجة ماعدا استهلاك البنزين.
وفى ملحوظة تانية انا لقيت معظم اللى مستلميين الصنى الجديدة بيشتكوا تقريبا من شكوى جماعية من المساعدين الخلفيين وانهم ناشفين جدا او بيزيقوا و فى صوت طرقعة من الخلف.
وفى واحد كان شايط جدا وقال العربية كانها محجرة وكان عاوز يتخانق مع اى حد يكلمه .
وفى النهاية كل سنة وانتم طيبين