-
حادثة :(
السلام عليكم
كل سنة و انتوا طيبين
انهاردة بعد الفطار على طول سمعت خبط تحت .. ببص من الشباك لقيت العربية اتخبطط :(
قولت الحمد لله و نزلت
واحد ب 132 داخل فى 3 عربيات مركونة جنب بعض كورولا و لوجان و نص نقل
اكبر كمية خسائر عندى .. دخل فى الرفرف الشمال لزق العربية فى النقل .. يعنى هو خبطها من الجنب الشمال ورا و هى زحفت و خبطت فى النقل من اليمين ورا
الراجل عندة محل قريب مننا و كان زوق و قال انا اسف و شوفوا عربياتكوا هتتكلف كام و انا هادفع
الخسائر : بعينى كدة بسرعة قدرت احدد رفرفين يمين و شمال و فانوسين ورا و كارتيرة و الصاج طبعا محتاج سمكرة كتير ( العربية متطبقة جامد يمين و شمال )
العربية مكملتش عاملة 1500 كيلو
الحمد لله على كل شئ
هصور العربية بالنهار و ارفع الصور ان شاء الله
كلمت 16202 قالى تروح فرع العبور بكرة بس هيبتدوا يشتغلوا فيها بعد بكرة
عايز اسالكوا بقى كام سؤال
1- اعملها فى التوكيل ولا برة؟
2- هل ممكن بالوصف اللى انا وصفتة دة يبقى فى خساير مش باينة بالعين ؟
3- هتتكلف كام تقريبا ؟
4- هتقعد قد اية فى التوكيل تقريبا ؟؟
-
قدر الله و ما شاء فعل ... انا رأيى تعملها فى التوكيل احسن عشان متخرجش من الضمان و العربية لسة جديدة كدة
-
بلاش التوكيل هياخدوا منك اضعاف مضاعفة واساسا الضمان ده مشروع فاشل انت بتعمل الحاجة في الضمان سواء تيل او زيت او غيره بمصنعية لو جمغتها تغير بيها اي حاجة تبوظ بره الضمان ... اسأل في التوكيل تتصلح بكام وشوف بره في الحرفيين او صقر قريش وانا ممكن اجيبلك رقم سمكري كويس ورخيص كان شغال في عربية لوجان بتاعت واحد صاحبي ... قارن الاتنين وشوف فرق السعر
-
ﻻ حول ولا قوة إلا بالله ده إنت ل، حا إنت لسه مستلم من مفيش. ربنا يعوض عليك وإحمد رشئ
-
في الاستاذ كريم منير رئيس المنتدي هنا عنده ورشة في الحرفيين وفي العقيد خالد ممكن يفيدوك جدا ناس محترمة
تقريبا الورشة اسمها ورشة نايل موتورز او حاجة كده ... تعمل العربية في التوكيل في حالة واحدة فقط هي انك مامن علي العربية غير كده بره التوكيل لان كله شغل صاج مفيش حاجة لا عفشة ولا ميكانيكا زي ما حضرتك حكيت
-
قدر الله وما شاء فعل ...
ربنا يعوض عليك خيرا ..
نصيحتى لك بلاش التوكيل لسببين :
الأول : التوكيل بياخد وقت كبير جدا لأنك بتنتظر دور ، ثم إن التوكيل مش بيعمل سمكرة خالص هو بيغير ع طول سواء رافراف أو اكصدامات والحاجات دى بتترد أحسن بكثير ..
ثانيا : اسعار التوكيل مبالغ فيها جدا ، والتصليح خارج التوكيل ليس له علاقة بالضمان لأن ده صاج وليس ميكانيكا ...
أنصحك بورشة نايل موتورز فى الحرفيين أنا جربتها من اسبوعين هتاخد منهم شغل مية مية ومصنعية محترمة وفى وقت قياسى جدااااااااا ...
بالنسبة للفوانيس الخلفية دى ممكن تجيبهم من عند جمال جمال بدرى عنوانه 7 شارع زكى بالتوفيقية وسعر الفانوس التركى 140 جنيه والصينى 120 والتايوانى (مكتوب على كرتونته ديبو ) ب150 جنيه ولو حضرتك مأمن ع العربية ابقى خد منه فاتورة ضريبة ...
وربنا يعوض عليك .. وأكيد عين وصابتك فربنا يكفيك الشر ان شاء الله ..
-
معلش قضا اخف من قضا
وبالنسبه للتصليح بلاش تروح للتوكيل لو الموضوع موضوع سمكره
أنا رحت قبل كده عشان الباب إللي ورا إتخبط جامد قالولي هيكلفك 3000 جنيه
باختصار هايغيرو الباب
المهم رحت عملت عمره سمكره ودوكو كامله للوجي كلفتني 1700 جنيه بس.
-
شكرا يا شباب على الردود السريعة
طيب ممكن حد يقولى عنوان ورشة نايل موتورز بالتفصيل و ياريت رقم موبايل لو مع حد
و لكم جزيل الشكر
-
شوف يا عمنا ...
هى فى أول الحرفيين فى بلوك 20 أمام مدرسة عمار بن ياسر الإبتدائية ..
أنت بتدخل من جنب عبدالسلام حسن وتلف فى تانى شمال ..
تسأل عن أحمد قدورة ورقم موبايله هو 01115151578 وتقوله انك عضو فى المنتدى وهو هيعمل معك الواجب ..
وممكن تقوله نك جاى من طرف د. مصطفى مندى ..
وع فكرة انت هتلاقى الورشة يافطة عليها لوجو المنتدى ..
ويستحسن فى كل الأحوال تتصل بمدير المنتدى أ.كريم منير تديله فكرة ورقم موبايله هو 01001263030 ..
وع فكرة الورشة أجازتها الأحد ...
-
Content Relevant URLs by
vBSEO 3.6.0 PL2