الموضوع: تجربتي في عالم الدوكو والسمكرة ومع ورشة نايل موتورز

السلام عليكم ورحمة الله وبركاته

ناس كتير بتتعرض دائما لخبطات وحكات بمختلف الانواع

سواء كانت خبطات جامدة او مجرد حكات بسيطة !! والواحد في المواقف اللى زي كدة دائما بيبقى محتار ومش عارف يصلح عربيته فين ؟؟

وفيه فئة كبيرة اوي منا للاسف ماعندنا اي خبرة في المجال ده نهائيا وغالبا مابيضحك علينا وبيتعمل علينا شغل

اما نوقع في صنايعي غالي وياخد تلت اربع اضعاف السعر !! او صنايعي اي كلام يبهدلك العربية ويرشها رشة اي كلام !!

وعدد قليل جدا من الناس اللى اتعامل مع الصنايعية وعارف الصنايعي اللى شاطر بس غالي والصنايعي اللى شاطر وسعره معقول

وفي نفس الوقت برضوا فيه انواع في الدهانات وعلى قد ماتدفع على قد ماهتلاقي

كان ليا تجربتين في موضوع الرش والسمكرة وللاسف في التجربة الاولى اضحك عليا واتعمل عليا شغل جامد اوي !! فحبيت اكتبلكم تقرير مبسط عن التجربتين لعل وعسى حد يستفيد منها بدل مايتعمل عليه شغل لا سمح الله

برضوا احب اقول اني والله مش القصد ابدا اني اعمل دعاية للاستاذ كريم منير او ورشة نايل موتورز لانها في الاساس في غنى عن ذلك

لكن والله القصد من الموضوع اني ابين للناس موضوع الرش والسمكرة عشان ماحدش يحصل معاه اللى حصل معايا في التجربة الاولى .....

------------

التجربة الاولى ::

من حوالي ست او سبع شهور تقريبا

ربنا كرم واشتريت طقم جنوط للعربية وماكملتش بيه اسبوع ويظهر كدة العربية خدت عين حلوة

وكنت راجع من على الدايري وقامت ترلا مدياني اللى فيه النصيب في الجمب الشمال

جابتلي من اول الاكصدام لحد الباب الخلفي طبعا مرورا بالرفرف اللى اتعمل زي الساندوتش

ولان دي كانت اول مرة العربية تتخبط فيها خبطة جامدة ! ماكنش ليا اي معرفة او خبرة في موضوع السمكرة والرش وماكنتش اعرف اي حد نهائيا ولا عارف ان اصلا فيه حاجة اسمها انواع في الدهانات ولا اي حاجة

اتصلت سعتها بالاستاذ كريم منير وبلغته باللى حصل وقالي تعالى نورنا في الورشة وان شاء الله العربية ترجع زي ماكانت

وبالفعل كنت ناوي اني اروحله ولكن للاسف واحد زميلي قعد يزن على دماغي وانتو عارفين الزن على الدماغ امر من السحر

ايه اللى يوديك الحرفيين ؟؟ ياراجل بعيدة عليك ومشوار وهترجع مواصلات وهتروح مواصلات ؟؟ صدقني هتتبهدل

طب ياعم اروح فين ؟؟ قالي انا اعرف سمكري ماجبتهوش ولادة في المنيل رشيت عربيتي عنده قبل كدة وبعتها على انها فبريكة ووالله حتى الجهاز طلعها فبريكة

قلتله ياراجل ؟؟ يعني ماكنتش باينة خالص ؟ قالي انسى ياعم ده دكتور

ياعم انت واثق من الراجل ده ؟ قالي عيب عليك وفي وشي وده انا بتعامل معاه بقالي سنين

قلت ماشي اما اروح اشوف اللى بيقول عليه

دخلت على ورشة الراجل في المنيل لقيتلك حتة C280 موديل السنة واقفة بترش !! وجمبها اودي A4

قلت بس الراجل ده باين عليه معلم وهيجيب من الاخر

المهم الراجل عملي من البحر طحينة وماتقلقش قالي شوف انا بعد مالعربية تتصلح هسالك الخبطة كانت في انهي جمب وانت مش هتعرف !!

الحكة اللى كانت في الاكصدام عندي كانت في الطرف كدة وماكنتش باينة اوي قلتله طب بص بلاش نرش الاكصدام قالي خلاص انا هرشلك الحتة الاخيرة بس من الاكصدام !!

قلتله هو ينفع ارش جزء بس من الاكصدام من غير مايفرق لون ؟ قالي يا باشا ده شغلي انا بقى

المهم قلتله خلاص توكل على الله

اتفقنا اننا هنرش حتة في الاكصدام والرفرف والباب

قالي لو عندك حجات مهمة في العربية خدها عشان مافيش حاجة تضيع او تتسرق

قلتله ماشي لميت حجاتي وخدت منه معاد ومشيت

بعد يوم اتصلت بيه قالي خلصنا شغل سمكرة وهنرش العربية قلتله طب انا هجيلك اشوف الشغل قالي ماشي

رحتلته السمكرة معمولة معقول بس البومبيه بتاع الباب كان معمول بارز بزيادة !! قالي ماتقلقش مع الرش هيتظبط

قلتله ماشي

وبعد يومين خلصت العربية ورحت على معاد الاستلام

العربية سعتها كانت بتلمع عشان لسه مغسولة فمكنش فيه اي فرق في اللون

بس كان ليا ملاحظات سعت الاستلام :

1- كان فيه زي فقاقيع كدة صغيرة في الباب والرفرف تبان اكتر في الشمس ولما سالته قالي هتروح مع الغسيل

2- البوية جاية على الكاوتش بتاع الازجاج وباين انه ماكنش اتعزل كويس

3- العربية من جوة متبهدلة اثار بوية ومعجون بس قلت مش مشكلة

4- البومبيه طبعا لسه بارز زي ماهو ومش مظبوط

5- العربية عاملة تقريبا 30 كيلو زيادة في العداد !! ؟ ولما سالته انت الفرن فين قالي دي في الشارع اللى ورا ؟؟؟ طب امال ال 30 كيلو دول اتعملو فين ؟؟

6- اوبشن الكاسيت كله ملعوب فيه !! يمكن دي حاجة بسيطة بس انا مابحبش حد يشغل اي حاجة في العربية لاني مديله العربية تترش مش يتمزج بيها السمكري

وعلى الرغم من كل الملاحظات دي قلت مش مشكلة والاهم ان العربية مش فارقة لون ومش باين انها مرشوشة وكمان شغل السمكرة - بغض النظر عن البومبيه - معمول مظبوط

فشكرته واديلته بقيت حسابه ومشيت وانا راضي عن الشغل

لكن للاسف يافرحة ماتمت !!! بعد يومين بالظبط

كنت في مصر الجديدة وقفت العربية في حتة كدة منورة جامد ونزلت اجيب حاجة من السوبر ماركت

وانا بعدي السكة ببص كدة على العربية !! الباب اللى مرشوش لووووون وباقي العربية لون تاني !! قلت يانهر اسود ؟؟

ابص من النحية الشمال الاقي الباب اللى مرشوش افتح من التاني ؟ ابص من النحية التانية العكس !! ؟

وياريت على كدة وبس لاء !! ده العربية كلها لمعتها طفت معادا الاجزاء اللى مرشوشة بتلمع جاااامد !! والمنظر كان بايخ بطريقة فظيعة

وطبعا الفاقيع اللى قالي انها هتروح مع الغسيل لا راحت ولا نيلة

سالت هنا وهنا المهم الناس قالتلي ان اللمعة مع الوقت هتروح وهتبقى العربية كلها مية واحدة

قلت يا مسهل الحال وفضلت مستني ان اللمعة بتاعة الاجزاء المرشوشة تروح عشان العربية تبقى ماية واحدة !!!

وعدى شهر والتاني والعربية لو كفيف بص عليها هيلاحظ وش ان العربية مرشوشة

فعلا المنظر كان بشع وياريت الموضوع كان على كدة وبس !!

البوية بقت بتتقشر وتقع من اقل حاجة !! لو وديت العربية تتغسل والراجل اللى بيغسلها تقل ايده عليها شوية كانت البوية بتتقشر

قلت معلش قدرك وفضلت مستني اللمعة تروح

وياريت الموضوع وقف على كدة وبس !!!

المفروض اني كنت متفق معاه انه هيرش حتة بس من الاكصدام في الاخر وباقي الاكصدام يفضل زي ماهو !!

انا كنت عامل خط بطول العربية واخد العربية من اول الكبوت ولحد الشنطة والاكصدام

اتمسكت في لجنة فقلت اشيل بقى الخط !! والمفاجاة الكبرى لما اشيل الخط

اتاري المعلم رش الاكصدام لحد الخط !! بحيث ان الخط عامل فاصل فمش هيبان فرق اللون

وطبعا اول ماشلت الخط فرق اللون ظهر واكتشفت انه اتعمل عليا شغل كبيييييييييييير اوي

هنا قررت اني اروح للسمكري ده اطلع تيت اللى جابوه

اتصلت بزميلي اديته اللى فيه النصيب وزعقت فيه جامد جدا !! لدرجة انه مابقاش عارف يقول ايه !! بعد كدة والله زميلي صعب عليا وقلت يعني هو برضوا مالوش ذنب هو كان عايز يخدم

وفضلت بعدها نفسي بتتسد كل مابص لمنظر العربية !!

محدش ممكن يتخيل ان العربية تبقى باب ورفرف بيلمعو وباقي العربية لمعتها مطفية !! وطبعا فرق لون فظيع مابين البابين

بوية بتقشر وبتقع من اقل حاجة !! كنت بتعامل معاها باللمس !!!!!!

لدرجة اني كنت بركن العربية واخلي الجمب ده وشه للحيطة او الرصيف عشان ماحدش يشوفه

كنت ناوي اني اروح للسمكري ده اتخانق معاه بعد كدة قلت مالهاش لازمة وفي اقرب فرصة هبقى ارش الكلام ده من الاول تاني

وبعد فترة ومن حوالي اسبوعين تقريبا كنت راجع من داندي مول ومهدي باخد مطب عادي جدا مافيش اي مشكلة

هوووب مرسيدس قديمة من ورة تدخل فيا !! طبعا الاكصدام والرفرف والشنطة اتخبطو

قلت بالمرة بقى اعيد على الرشة الزفت وخاصا لان الخبطة جت في نفس الجمب اللى اترش قبل كدة

وانا مروح وبركن العربية لقيت واحد جارنا طلعلي ايه خير ؟؟؟

قلتله مافيش الحمد لله انها جت على قد كدة !! قالي بص انا اعرف سمكري من الاخر ماجبتهوش ولادة

قلتله بقولك ايه مش عايز اسمع كلمة ماجبتهوش ولادة دي تاني الله يكرمك انا اعرف واحد هوديله العربية

قالي فين ؟؟ قلتله مالكش دعوة ياعم ربنا يكرمك انا هتصرف

اتصلت بالاستاذ كريم منير واتفقت معاه اني هروحله الورشة لكن للاسف جاتلي ظروف سفر وقلتله هسافر ولما ارجع ان شاء الله هبقى اجيلك

التجربة التانية مع ورشة نايل موتورز

رجعت من السفر وكلمت الاستاذ كريم منير وتوجهت للورشة انا وابوحميد اللى تعب معايا جامد "lanos2004" يوم الاتنين

انا ماكنتش عارف مكان الورشة بالظبط فكنت متابع مع الاستاذ كريم منير على التليفون وبصراحة ماكنش مقصر نهائيا ربنا يكرمه وكان متابع معايا على الموبايل علطول

رحت وقابلت هناك احمد قدورة انطباعي عنه انه راجل غاية في الاحترام قليل الكلام

مش زي الاولاني اللى قعد يرسملي ويعملي من البحر طحينة

اتفقت معاه وقلتله بالمرة يرش الباب اللى هو اترش قبل كدة عشان تبقى العربية كلها نضيفة واخلص من الرشة المنيلة بنيلة

وكان فيه خبطة في الجمب التاني وهو قالي انه هيسمكرها ويرشها هدية من عنده ماحسبش عليها تكلفة اضافية

خدت منه معاد ان العربية هتخلص يوم الاربع بليل

وقبل مامشي قلتله اخد بقى الحجات المهمة من العربية

قالي لا يا باشا سيب كل حاجة زي ماهي وماتقلقش كل حاجة هتلاقيها في مكانها

سبت العربية ومشيت وانا وراجع اتصلت بالاستاذ كريم منير وحبيت اعدي اسلم عليه لاني من زمان بصراحة وانا عايز اقابله

بصراحة غاية في الذوق والاحترام تحس انه فعلا عايز يخدمك مش مجرد زبون عنده هتعمل عنده شغل وتمشي

وبصراحة بيني وبينكم بعد ماروحت فكرت في موضوع اني سبت كل حاجة في العربية !! خصوصا ان الشنطة ماكنتش بتقفل +

ان العربية كان فيها حجات كتير ممكن تتسرق !! كذا فلاش ميموري + الشنطة كان فيها فلتر هوا جديد بكرتونته وزيت فرامل برضوا جديد بكرتوتنه + الكاسيت القديم وجركن ماية حمرا جديد وسي ديهات بقى كتير وكذا حاجة يعني ممكن بسهولة انها تتاخد من غير ماحد مايحس

تاني يوم اتصلت بالاستاذ كريم منير وقالي ان شغل السمكرة خلص والعربية هتترش

بعدها بيوم اللى هو الاربع المفروض اليوم اللى هستلم فيه العربية اتصلت بيه قالي اتصل باحمد قدورة عشان اعرف بالظبط هستلم امتى

اتصلت باحمد قدورة قالي احنا على معادنا بليل العربية هتكون خلصت ان شاء الله

بليل توجهت للحرفيين وكانت العربية خلصت وفي معادها

طبعا هناك الاضاءة ضعيفة حبتين + اننا بليل فماكنش الشغل واضح اوي لكن انا استلمت العربية لاني كنت واثق تماما من ورشة نايل موتورز وان الرشة هتبقى على المستوى المطلوب

الى غير اني قلت لاحمد قدورة ان بليل والاضاءة ضعيفة قالي شوف العربية في الشمس براحتك ولو فيها اي حاجة تعالى ومالكش دعوة

وعشان كدة انا استنيت المدة اللى فاتت دي قبل ماكتب التقرير ده عشان اتاكد هل هيحصل فرق في اللون ؟ او فرق في اللمعة بعد مدة زي ماحصل قبل كدة ولاء لاء ؟؟ هل البوية هتقشر ؟ هل هيحصل مشاكل ؟

وبعد ماشفت العربية في الشمس وبعد مرور اكتر من 10 ايام على الرشة اكتبلكم انطباعي

1- لما جيت استلم العربية كل حاجة في مكانها ! مافيش اي حاجة ضاعت ولا اي حاجة اتسرقت وكل حاجة في مكانها

2- العربية من جوة نضيفة مافيش اثار بوية ولا معجون ولا اي حاجة بعكس المرة الاولى !! بالعكس ده العربية كمان اتنضفت عن ماكنت سايبها

3- شغل السمكرة بصراحة ماشاء الله 10/10 الشنطة والاكصدام رجعو زي ماكانو ومافيش اي اثار للسمكرة نهائيا الشغل ممتاز جدا

4- مافيش فرق لون نهائيا سواء بقى وقفت العربية في الشمس او في مكان فيه انوار العربية كلها ماية واحدة وكلها لمعة واحدة مافيش حاجة بتلمع زيادة عن حاجة يمكن فيه سنة لمعة بسيطة في الاكصدام وكل اللى شافها قالي ده طبيعي عشان لسه بس مرشوش طازة

5- الخبطة اللى في الجمب التاني اتعملت باحترافية ماشاء الله خصوصا انه رش حتة كدة مابين الباب والرفرف "اللى هي تكملة العتب وانت طالع لفوق بيقولو عليها تقريبا سوكة او حاجة كدة مش عارف " بس اتعالجت بشكل ممتاز

يعني في المجمل الشغل على المستوى المطلوب وبصراحة زي ماكنت متوقع من نايل موتورز وربنا يعلم اني مش بجامل او بعمل دعايا للورشة الشغل فعلا ممتاز على الاقل من وجهة نظري وفرق الرشة الاولى من الرشة التانية فرق السما بالارض

واي حد شاف العربية في الشمس عجبه جدا مستوى الشغل والدهان والسمكرة

وبرضوا للامانة عشان الواحد يكون قال المميزات في نفس الوقت كان ليا ملاحظتين بس على الشغل

1- اطراف الفانوس الخلفي في الجزء اللى اترش جيه عليه شوية بوية !! انا مش عارف بصراحة المفروض الفانوس بيتشال اثناء الرش ولا بيفضل وبيتعزل !! بس هو جيه عليه من الاطراف بوية بشكل بسيط

2- زي ماقلت لحضراتكم اني لما رشيت العربية اول مرة السمكري ماظبطتش البومبيه بتاع الباب وكان بارز شوية !! فلما جيت ارش تاني قلت لاحمد قدورة انه يعدلي البومبيه بالمرة طالما هرش الباب ولكن للاسف ماتعدلش فضل زي ماهو !!

هو صحيح الباب اترش رشة انضف بكتيييييييييييييييييييييي ر ورجع زي الفابريكة بالظبط !! بس انا كان ودي ان البومبيه بتعمل بالمرة خصوصا اني راشش الباب وهو مافيهوش حاجة لمجرد بس ان الرشة الاولانية كانت وحشة

انا سالت سعتها احمد قدورة على موضوع البومبيه واانا بستلم العربية قالي انه الباب ده واخد معجون كتيير اوي من الرشة الاولانية وعشان كدة البومبيه بارز

بغض النظر عن الملاحظتين دول فانا راضي تماما عن مستوى الشغل وعن حالة العربية

ماشاء الله انا حسيت ان العربية اكن اتردلها الروح وبقيت بركن واي جمب للرصيف براحتي هههههههه

وعلى فكرة انا مبلغتش الاستاذ كريم منير بالملاحظتين دول وانا متاكد تماما اني لو بلغته ماكنش هيقصر في تعديلها نهائيا لكن انا ماحبتش اتقل عليه اكتر من كدة خصوصا انها من وجهة نظري حجات بسيطة ومش مؤثرا نهائيا على الفنش النهائي يعني ماحستش انها مسببة مشاكل ليا او مضايقاني

الفانوس كدة كدة قواعده اتكسرت واللمبة مكسورة فلازم يتغير فيما بعد والبوية اللى جاية على الاطراف بسيطة ماتبنش الا للي يدقق اوي

وموضوع البومبيه هو خطأ من السمكري الاول فمش مشكلة

في النهاية انا احب اقولكم اني والله مش كاتب الموضوع ده عشان اعمل دعاية لورشة نايل موتورز لكن انا عامله عشان زي ماوضحت في التجربة الاولى ازاي اتعمل عليا شغل وازاي استلمت شغل بمستوى ردئ للغاية !!

فماحبش ان حد يقع في الوقعة دي مرة تانية اللى حابب يرش عربيته لازم يعرف ان فيه انواع في الدهانات وزي مافيه دهان الكيلو ب 10 جنيه على سبيل المثال فيه دهان تاني الكيلو ب 20 وفيه ب 30 !!

فمحدش يروح لمجرد انه سمع من واحد يعرفه اللى يروح لاي ورشة لازم يكون شاف الشغل بعينه ويكون عارف ايه نوع الدهان اللى هتترش بيه عربيته

ونصحية من اخ لاخواته ماحدش يسترخص ابدا في مجال الدكو !! خصوصا رش العربية لانها هتفضل في وشك وهتشوفها في كل مرة تركب فيها العربية !!!!!!

الفلوس مع الوقت هتتنسى وهتنسى انت دفعت هنا كام او كلفك كام !! لكن جودة الشغل هي اللى هتفضل قدام عينك طول الوقت

وبرضوا بشكر الاستاذ كريم منير على المشروع الجميل والمجهود والتعب والخدمات اللى بيقدمهالنا نايل موتورز بشكل عام

وعلى التعب اللى تعبه معايا بشكل خاص فعلا كان متابع معايا اول باول وماقصرش في اي حاجة

وده اللى انا كنت منتظره ومتوقعه من نايل موتورز

الواحد فعلا مش عارف من غير نايل موتورز كان هيروح فين او كان هيعمل ايه !!

شكرا نايل موتورز

شكرا كريم منير