بفكر أشتري ألينترا 2012 أول فئه أوتو ان شاء الله :praying:, ياريت الملاك يقلولي عيوبها و ميزاتها ايه ؟
يعني الفرامل عامله أيه (من غير ABS) ؟
العفشه و الثبات ؟
الباور عامل أيه (سمعت أنه خفيف على السرعات العاليه !) ؟
التوكيل و قطع الغيار أخبارهم ايه (لأن دي أول عربيه ليا ان شاء الله) ؟
أفيدونا أفادكم الله يا هيونداويه
أيه يا رجاله مفيش حد معاه ألينترا 2012 ولا أيه ؟! :)
هات شارك احسن اللف مره
عليها عرض
شوف ...
أنا لست من الملاك ...
لكنى بفكر فيها و محتار بقالى شهور بينها و بين الكروز ..
بعد أن صرفت نظر عن النيسان صنى - كانت حتريحنى بسبب سعرها مقابل أدائها و عوامل الأمان - بسبب شكلها الغبى وموتورها الأقل من المعلن ..
المهم :
من خلال قرأتى ومتابعتى لعديد من الآراء هنا و هناك :
الالنتــــــــــرا :
تتميز بشكل خارجى جذاب و داخلى جيد (مقبول بالنسبة لى) / موتور أفضل / سحب و تسارع أفضل / قطع غيار أرخص / سعار اعادة بيع أفضل / وكيل أفضل (رغم ان الاتنين كثير بيشتكوا منهم) .
أكتر العيوب التى تم الحديث بشأنها - مستوى الثبات ع السرعات أكبر من 120 - العزل .
الكــــروز :
شكل خارجى جيد (أقل من الالنترا) / انتريور (شكل داخلى) جيد جداً (أفضل من الالنترا بكثير) / التسارع والسحب أقل (موتور 1.6 على هذا الجسم لا يكفى) / قوة المحرك أقل / الثبات أفضل بكثير / عوامل الأمان أفضل / قطع الغيار أغلى / اعادة بيع فى صالح الالنترا .
فى النهاية :
أنصحك أن تطلع بنفسك وتراجع آراء الملاك من هنا ومن مواقع أخرى ..
وأن تعاين السيارة بنفسك ..
وربنا يوفقنى و يوفقك فى الاختيار السليم ..
(بالمناسبة فى تخفيض ع السيارتين من الوكيلين - الالنترا تخفيض 2000 ج والكروز الهاى لاين بـ 134 ألف / لا أعرف هل العرض مازال مستمر أم لا)
+11111اقتباس:
المشاركة الأصلية كتبت بواسطة ahmad--ezzat
اتفرج على الشارك و على الفلوانس كمان
شارك طبعا خصوصا بعد الخصم
ما هى قصة الخصم مع الشارك .. ؟
من لديه تفاصيل لا يبخل علينا ...
من غير abs وحشة جدا وده الطبيعي ، لو بتفكر فيها متجبش فئة من غير abs
الباور خفيف فعلا عالسرعات ومش هتنفعك لو ماشي 200 على طول وغرز وادرينالين وكده يعني :))
من غير ABS ... كيف ولماذا ومتى وأين والأهم إلى أين .. ؟! :-(
http://www.nilemotors.net/Nile/300392-2012-3.htmlاقتباس:
المشاركة الأصلية كتبت بواسطة heka_m_y
ممكن حضرتك تراجع الموضوعات اللي تم كتابتها عن الألنترا 2012 في الرابط التالي :
http://www.nilemotors.net/Nile/277467-md.html
للأسف لا يوجد حتي الأن تقرير متكامل عن السيارة لكن أن شاء الله في سبيلنا لتجميع تقرير كامل و متكامل عنها
لكن من خلال أمتلاكي و قيادتي للعربية علي مدار 10 شهور قطعت خلالها أكثر من 24000 كم أقدر اوجز لك المميزات و العيوب علي النحو التالي :
أولا .. المميزات :
1- شكل خارجي رائع بتصميمات عصرية أنيقة و هيا بالطبع مسألة أذواق
2- موتور قوي 128 حصان معقول جدا بالنسبة للعربية في حدود القيادة العادية التي لاتميل الي الجري و الشد لكنه عملي و يكفي للخروج من المواقف الطارئة
3- استهلاك بنزين أقل مايمكن و قد تكون هي الافضل في فئتها في توفير البنزين و تقدر تراجع الموضوع التالي :http://www.nilemotors.net/Nile/298630-md-2012-a.html
4- العفشة ناعمة جدا و العربية ممتازة مع المطبات و الطرق السيئة اللي عندنا
5- الفرامل (عندي لايوجد abs) لكن أقدر أقولك انها جيدة جدا و تم أختبارها في أكثر من موقف و لكني أنصح بالفئة اللي فيها ال abs كنوع زيادة من الامان
6- أتساع الصالون جيد جدا و لأسرة صغيرة متوسطة الحجم هايكون مريح وواسع
7- نيجي بقي للكلام عن الثبات اللي الناس متخوفة منه :
عايز اوضح لك أن العربية دي أنا جايبها علشان باسافر كتير و ساعات كتير باكون مستعجل و فعلا بأوصل لسرعات في حدود ال 140 كم/ساعة و قد تزيد لفترات محدودة الي ال 180 كم/ساعة .. مع البارو الكهرباء اللي في العربية (اللي بيتقال أنه خفيف) مافيش ادني مشكلة و لم أشعر باي خوف أو أحساس بعدم القدرة علي السيطرة عليها اللهم بعد ال 180 كم/ساعة يبدأ أحساسك بالسيطرة علي العربية يقل شوية الي أن تصل الي 200 كم/ساعة , لكن خلينا عمليين و نتكلم عن الواقع و هو هل أنت هاتجيب السرعات دي علي الطرق بتاعتنا و لمدة قد ايه ؟ و هل أنت من هواة الغرز و بتحب تكون ترزي علي الطريق ؟ و برضه الغرز بالعربية علي سرعات لحد 120 كم/ساعة كويسة جدا و لو أني ما بانصحش بموضوع الغرز علي اي سرعة اساسا لأني بأميل لأسلوب القيادة الأمنة لذا فالالنترا مناسبة جدا لي و لأحتياجاتي
8- شنطة العربية واسعة و فتحتها معقولة جدا و تقدر تحط فيها اللي أنت عايزه
9- التابلوه شيك جدا و عصري و بيوفر لك كل المعلومات الضرورية عن السيارة و الرحلة
10- العزل في الألنترا جيد جدا و تقدر تقارنه بعزل التويوتا كورولا و عن ثقة
ثانيا.. العيوب :
1- الرؤية و خاصة من الزجاج الخلفي صعبة شوية لكن مرايات الجانب بتعوض عنها و مع أعادة ظبط المراية الداخلية مع وضع الكرسي تقدر تحل المشكلة دي و الحمد لله أنا لا استغني عن مرايات الجانب مع مراية الصالون و ماعنديش مشكلة اساسا في الرؤية حاليا
2- خامات الصالون في أول فئة معقولة لاترقي الي الموديلات السابقة من الالنترا و لو انها عملية
3- الصالون في الخلف ارتفاعه منخفض نظرا لميل السقف بشكل كبير
4- الدهانات ضعيفة الي حد ما خاصة مع السفر و التعرض للرمال و الحصي المتطاير من سيارات النقل
5- الشكل الخارجي كما أنه ميزة فهو عيب نظرا لصعوبة أصلاحه بالاضافة لكبر حجم الفوانيس الامامية و الخلفية مما يعرضها للاصابة في اي تصادم
6- نظام التعليق الخلفي بالتورشن بيم قد يسبب لك مشكلة أو أحساس بعدم الثبات في الملفات التي بها مطبات أو فواصل أو نقر خفيفة في الطريق لكن شايف أنه مجرد احساس و لم أعاني من مشاكل حقيقية تؤثر علي الثبات فقد أختبرت السيارة في ملفات حتي سرعة 140 كم/ساعة و لم تحدث مشكلة و الحمد لله
7- قطع الغيار مرتفعة الثمن الي حد ما كسائر السيارات الحديثة لكن جودتها و نوعيتها اصبحت افضل من الموديلات السابقة و معمرة عن السابق
8- الوكيل : صحيح توكيل هيونداي له سمعة سيئة سابقاه و لكنه في تحسن ملحوظ في الفترة الاخيرة بالاضافة الي وجود عدد من مراكز الخدمة المعتمدة التي تفوق التوكيل في الخدمة
ده كل اللي قدرت أجمعه عن العربية لحد دلوقتي مع العلم أنه الحمد لله لم تواجهني مشاكل منها حتي الان و لم أدخل مركز الخدمة سوي 3 مرات لأداء الصيانات الدورية (1000 كم - 10000 كم - 20000 كم)
و لو فيه اي أستفسار عندك تقدر تكلمني في اي وقت علي تليفوني (01118057400) و أن شاء الله اقدر أفيدك اكثر
وربنا يوفقك في الاختيار أن شاء الله
3-
أهلاً بيك في قسم هيونداي وعذراً لتأخر الرد علشان ظروف الصيام والعمل ولكن هأجاوب حضرتك على كل أستفساراتك .اقتباس:
المشاركة الأصلية كتبت بواسطة ahmedsho3a3
الفرامل : فرامل الألنترا ممتازة من غير abs بال abs أكثر من ممتازة بصراحة أنجدتني في يوتيرن مشروع زنق عليا وأنا زودت السرعة علشان أهزقه وكنت داخل اليوترن كد كدة المهم قولتله اللي فيه النصيب وأكتشفت أني داخل اليوترن على سرعة 80 واللي زاد الطين بله أن اليوترن فيه تراب يعني العربية هتزحف هتزحف وبفضل الله وال abs العربية وقفت قبل الرصيف بكام سنتيمتر وحودت شمال شوية متفادية الأرتطام تقييمي للفرامل بال abs هيكون +A .
العفشة : مريحة وناعمة جداً بالذات في المطبات والنقر المنتشرة في بلدنا نقطة الضعف هنا هي التورشن بيم في حالة دخول ملف حاد على سرعة والعجلتين الخلفيتين عدوا على حفرة أو عيون قط مثلاً هتلاقي شنطة العربية بتتحرك عكس أتجاه الدركسيون بشكل بسيط هتقلق منها في أول مرة وبعد كده هتبقى شيء عادي تقييمي للعفشة هيكون +B .
الثبات : خدها من واحد بيسوق من 5 أبتدائي العربية بقالها معايا سنة وزي الفل مفيش ملف حاد مش حاد مفيش غرزة عالهادي أو على سرعة والعربية قصرت معايا بل بالعكس ملفات حادة لغاية 120 زي الفل ... ولكن مسكة الدركسيون مش عجباني في الملفات الحادة على سرعات عالية يعني مثلاً 120 فأكثر في ملف حاد لازم أمسك الدركسيون جامد وأفتح عيني كويس لأي نقرة وأخده من الضيق على الواسع ولكن الكلام دة كله تلغيك من حساباتك لو هتدخل الملفات الحادة على سرعة أقل من 120 فشوف أنت بتمشي أزاي وقرر تقييمي للثبات هيكون B .
عموماً التوازن بين العفشة الناعمة والثبات الجيد ميزة من مميزات الألنترا ولكن لو بتسوق على سرعات عالية لازم تخلي بالك وأنت راكب أي عربية تورشن بيم .
الباور : كهرباء زي مانت عارف وببساطة ممتاز سرعة أستجابة عالية مريح جداً مفيش صوت على السرعات العالية بيتقل وبيزود الأحساس بالثقة والأمان بصراحة مفيش ملاحظات على الباور وتقييمي للباور هيكون A .
التوكيل وقطع الغيار : التوكيل مقارنة بباقي التوكيلات هو ثاني أفضل توكيل بعد توكيل رينو وكيا من حيث أنتشار مراكز الخدمة وكفاءة العاملين والتجهيزات والأستراحات وتوافر قطع الغيار وبالنسبة لأسعار لقطع الغيار معنديش فكرة كاملة عنها تقدر ترجع لهيونداي تيم يفيدوك أكتر مني نظراً لأن عربيتي جديدة ومجبتش قطع غيار تقييمي للتوكيل هيكون C .
في نقاط تانية لو حبيت تعرفها أحنا موجودين زي ( قوة الموتور - أستهلاك البنزين - الفتيس - الوسع الداخلي والكماليات ) لو معندكش خلفية عنهم قول وهنرد عليك على طول بأذن الله .
اقتباس:
المشاركة الأصلية كتبت بواسطة se_coralsea
الله ينور ياباشمهندس لسه رادد دلوقتي حالاً لقيتك سبقتني وأعتقد متفقين في كل النقاط ومن غير مانقرأ مشاركات بعض ودة دليل على الحيادية والحمد لله وأعتقد الصورة كدا بقت واضحة تماماً لصاحب الموضوع .
الله ينور يا باشا , هو في كده :)اقتباس:
المشاركة الأصلية كتبت بواسطة se_coralsea
متشكرين جدا يا باشمهندس, جزاك الله خير عنااقتباس:
المشاركة الأصلية كتبت بواسطة ashturbo
حكمى على السيارة من خلال ايجارى لها لمدة شهر فئة فولى لودد:
عيب العربية فى نظرى حتى الان:
- العزل: ممتاز جدا و افضل من اليبانى او مثلة تقريبا
- الخامات الداخلية و التقفيل: ممتاز
- استهلاك البنزين: ممتاز و اقتصادى جدا فى الطرق السريعة لكن فى الزحمة عادى ذى اى عربي 1600
- التسارع: ممتاز و بحس انها اكتر من 1600 سى سى
- الفتيس: 6 سرعات باستجابة سريعة جدا و تحس انه ذكى و بيفهمك و يجبلك النقلة اللى انت عايزها حسب دوسة رجلك
- الثبات: ممتاز و كنت بمشى على 180 بدون اى احساس بالقلق بس فى الطرق النظيفة و المسفلتة كويس
- الشكل الخارجى و التصميم: ممتاز
- النظام الصوتى: 6 سماعات بصوت رائع ومجسم و صوتهم نقى جدا
- التكييف: ممتاز و فى 8 سرعات + dual + شاشة
- الباور الكهربا: رائع ... ناعم جدا فى الركن و بيتقل مع السرعة و مستمتع بية جدا و مش مقلق خالص على السرعات العالية ذى ما البعض قال.
- النعومة: تعتبر ناعمة بس مش ناعمة قوى يعنى
- قوة الفرامل: ممتاز (بتكلم على الفولى لودد و فيها abs العادية معرفش)
- الوسع: واسعة جدا
- الكماليات: ممتازة و فيها كم هائل من الكماليات اللى تخليك مستمتع بالعربية
انا حبيت العربية دى جدا جدا و مستمتع بيها جدا, كمان و انا سايق العربية بحس انها 2000 سى سى او انها مش اتوماتيك و استجابة الفتيس جميلة...انا شايف انها صفقة ممتازة, بس شوف كمان الفلوينس لان سعرها منافس جدا.
- الدهان: سيىء جدا و بيطلع بكل بساطة
- الصاج: ضعيف جدا مقارنتا بالالمانى وتحس ان العربية حتتبهدل بسرعة و شكلها الجميل مش حيستمر
- السقف واطى فى الكنبة اللى ورا علشان التصميم الكوبى
- الرؤية صعبة خصوصا فى الركن
- صعوبة اصلاح الصاج لو اتخبطت