-
اخيرا بقيت تيداوى
السلام عليكم
اشكر الله العظيم رب العرش العظيم الذى وفقنى لما فيه خير لى
الحمد الله استلمت امبارح التيدا المكسيكى فول اوبشن بلس لون فضى من اوتو ايجيبت مدينة نصر وذلك بعد حجز دام لمدة 3 شهور كنت خلاص قربت اتجنن:fdsa:لان العربيه مش موجوده دلوقتى وعليها ضغط لدرجه ان الطلبيه اللى جت وانا استلمت منها متبقاش فيها الا عربيتين
واحب اشكر الاستاذ احمد حسن فى اوتو ايجيبت مدينه نصر راجل ذوق ذوق ذوق بصراحه
واحب اشكر كل اعضاء المنتدى طبعا استاذ احمد مصطفى و مهندس حسين و بشوى و دكتور ايهاب وكل الناس الحلو اللى فى المنتدى اللى حببونى فى نيسان من البدايه.
نيجى بقى للتفصيل واعزرونى بقى لان ده اول تقرير انا اعمله
التسليم
اتصل بيا استاذ احمد حسن من اوتو ايجيبت مدينه نصر من يومين قالى ان العربيه وصلت , طبعا انا كنت طاير من الفرح:angelme: لانى كنت فقدت الامل انها تيجى وقالى خليك جاهز اول ما الورق يجيجى حكلمك وفعلا اتصل بيا امبارح ورحتله ورانى الورق بتاع المرور والذى منه ومضيت على ورق استلام للاصول وجت اللحظه اللى انا مستنيها انى استلم بقى
العربيه كانت واقفه بتزعرد عند الاجانص وبصراحه الراجل سلمنى بذمه وضمير وقالى على كل الزراير اللى انا تقريبا كنت عارفها كلها من المنتدى وعلى حاجات فى العربيه مكنتش عارفها و تم الاستلام على خير
انطباعى عن السياره
بصراحه حاجه ممتازه , الحمد لله, التفقيل بتعها ممتاز رغم انى عندى بعض الملاحظات فى تقفيل الشنطه وسالته عليها قالى هى والصنى كده ده مش عيب صناعه , المهم ان المجمل ممتاز
اللى عاجبنى:
1- التقفيل زى ما ذكرت.
2- اماكن التخزين الكتير(درج التابلوه فعلا بحر انا دخلت ايدى كلها فيه علشان اجيب اخره+ المسند بين الكرسيين الاماميين+ اماكن الكوبيات و اماكن فى الابواب + المساحه اللى فوق الكاسيت)
3- الاضاءه الداخليه للسياره ( لمبه صالون+2 لمبه فوق السائق واللى جانبه+ الشماسات بها مريات فيها لمبه)
4- اضاءة العدادات
5-امكانبة تحريك كرسى السائق لاعلى ولاسفل
6-الصالون واسع جدا(كنت حاسس انى قاعد على كرسى الانتريه بتاع بيتنا)
7- المساحه الخلفيه ممتازه( قاعدت فيها والدى وكنت مريح الكرسى اللى قدامه وهو كان قاعد مبسوط ورجله مش خابطه فى الكرسى اللى قدامه)
8- الهوايات الكتير بتاعهة التكييف و التكييف التاتش بصراحه حكايه رغم انى مجربتوش غير ساعة الاستلام بس
9- من حيث القياده فهى ناعمه جدا والفتيس متحسش بيه خالص وانت سايق( لحد دلوقتى بحاول احدد سرعتها على كل ناقله مش عارف, انت لو مش باصص على عداد الار بى ام مش حتحس انها نقلت ومش حتعرف انها نقلت)
10- الصوت بتاع السماعات حلو والكاسيت حلو ولاقط اشاره ممتاز رغم انى مش حاطط الاريال اصلا
11-السنتر اللى بيقفل بعد متتحرك بشويه ممتاز
12- السنتر مبيفتحش كل الابواب عند ضغط الunlock فى الريموت لازم تدوس مرتيين علشان يفتح كل الابواب علشان لو انت لوحد تدوس ضاعطه واحد بس يفتحلك باب السواق بس
اللى كان نفسى يكون فيها
1- كل الازاز يكون اوتوماتك مش بتاع السواق بس
2-مثبت سرعه
3-وحده الرفع(ان شاء الله حركبها رغم انى مكنتش مقتنع بيها بس لما العربيه جت عرفت فعلا انها مهما)
4-المريات الضم(بردوا ان شاء الله حركبها)
اللى معجبنيش
1- الشنطه والابواب بحس انهم تقال فى الاقفل يعنى لازم ترزع الباب كويس علشان يتقفل وكذلك الشنطه(مش عارف دا سببه ايه)
2- زى ما ذكرت بعض التقفيل فى الشنطه حاسس انه مش حلو
3- احيانا بحس صوت الموتور عالى و السحب مش قد كده, مش عارف هل لانى اول مره اسوق اوتوماتيك ولا ايه ,اعتقد ان بعد صيانة الالف الدنيا دى حتتظبط
4- عدم وجود ساعه منفصله هى بتاعت الكاسيت بس
5-عدم وجود كمبيوتر تحديد الاستهلاك
6-عدم وجود USB فى الكاسيت
يعنى دى النقاط المبدايه من خلال استخدام يوم واحد ولو فيه حاجه تانى حبقى اذكرها
نيجى بقى للترخيص
روحت النهارده الصبح لمرور مدينة نصراللى انا تابع ليه والحمد لله الدنيا مكنتش زحمه اوى فخلصت على الساعه 11 تقريبا واليكم بيان بالمبالغ المدفوعه:
طفايه حريق--------121جم
اوراق ترخيص 3 سنوات--------45جم
مثلث وشنطة اسعافات------75جم(مش عارف ليه)
ضريبه 3 سنوات---------806جم
تامين اجبارى ---------320جم(بردوا مش عارف لزمتوا ايه)
حبة رشاوى على اكراميات على مبروك العربيه الجديده----------150جم (حسبى الله )
وفى النهايه تم استلام الرخصه على خير ويريت حد يقولى المدفع فاضله قد ايه لحسن انا ميت من العطش
وان شاء الله اوليكم باى تقارير بعد لما جرب العربيه فتره اطول بعد صيانه الالف ان شاء الله ولو حد عايز يستفسر عن اى حاجه انا فى الخدمه.
-
نسيت اقولكوا -اعزرونى بقى صايم- انى بعد لما رجعت من المرور اتصلت برقم كده كان ادهولى استاذ احمد مصطفى علشان افعل الضمان ولما كلمتهم ادونى كود تفعيل الضمان وقالولى اكتبه على كتاب الضمان انا معرفتش بصراحه اكتبه فين قمت كاتبه فى اى حته فاضبه وخلاص
وقالولى ان الضمان ده هو اللى حيكون للكاسيت مع سركه مش فاكر اسمها ايه وحيكون للكاوتش مع بريدج استون وحيكون للبطاريه مع كلورايد (يارب اكون فاهم صح)
-
الف مبروك يا باشا
ربنا يباركلك فيها ويستر طريقك ..
-
ألف مبروووك ربنا يعطيك خيرها و يكفيك شرها
-
ألف مبروك و ربنا يعطيك خيرها و يحفطهالك
-
مبروك وربنا يبركلك فيها ويديك خيرها ويكفيك شرها
-
الف مبروك و ربنا يملاها لك بركه و اهلا بحضرتك معانا فى القسم
-
أخيرا يا احمد استلمت .. الف الف مبروك العربية الجميلة ديه و ربنا يديك خيرها علي طول و عايز اقول لك علي حاجه العربية هتختلف معاك تماما بعد صيانة الالف و كمان صيانة الـ 5000 فمتستعجلش علي موضوع السحب و علو صوت الموتور و ياريت متقرصش علي الماتور دلوقتي و معاك طبعا اللينك اللي اكيد انت قرائته قبل كده بس بفكرك بيه :
http://www.nilemotors.net/Nile/212403-a.html
-
تقرير رائع...... والف مبروك........ والله انا كنت فكرت فى التيدا بس مش عارف ميلت للصنى الجديدة لاقيت فيها تقريبا كل اللى محتاجة ...... الف مبروك مرة تانية
-
أخيرا يا راجل
والله فرحتلك ..
ربنا يبارك لك فيها وتستعملها في رضاه
Content Relevant URLs by
vBSEO 3.6.0 PL2