الموضوع: لو مستغني عن كباسك إشحن عند أرخص واحد يقابلك

الكلام ده عن بتاع التكييف اللي في بنزينة كالتكس (تقاطع عباس العقاد مع مصطفى النحاس)

التكييف كان شغال زي الفل، بس قررت أزود شحنه عشان أرفع كفاءة التبريد.

رحت شحنت التكييف عند الراجل اللي هناك، وبعدها ب 10 أيام الكباس بدأ يعمل صوت ترزيع، والصوت يزيد يزيد لحد مالكباس مات نهائي.

عشان ماظلمش الراجل حاولت أقنع نفسي إنها مجرد مصادفة. لكن بعد الكشف على الكباس الميت عند أكتر من فني تكييف، كلهم أجمعوا إن السبب هو فريون مغشوش أو مخلوط، وكلهم سألوني نفس السؤال .. انت شحنت التكييف قريب؟ أقولهم آه .. يقولولي ..... عشان كده

الخلاصة، التحذير مش من الراجل ده وبس .. التحذير من أي واحد جايب اسطوانتين فريون وعداد ضغط وعامل نفسه مهندس تكييفات .. التحذير من أي فني تكييف تحت بير السلم ومعلق يافطة كاتب عليها شحن فريون.

أنا عارف إن موضوع شحن التكييفات فاتح بيوت ناس كتير ... بس برضو حرام لما بيوت تتفتح بسرقة فلوس ناس تانية .. او بخسارة كباسات تمنها فوق الألفين

من الآخر، اشحن تكييفك في أي مكان معتمد أو في التوكيل حتى لو غالي.

نقطة تانية، بدل ما تروح تشحن تكييفك كل شهرين ب 100 جنيه، راجع على التوصيلات ونضف الدورة كويس، غير الفلاتر، واكشف عالتسريب وغير الاويلسيلات، واشحن شحنة نضيفة في مكان معتمد، ومش هتحتاج تشحن تاني إلا بعد سنتين.