shark vs cruze vs sunny

الحقيقة انا ان شاء الله هغير العربية وقررت ابعد عن المستعمل وقرفه و استخرت ربنا واستقريت علي التلات عربيات دول
الشارك jt f/o highline a/t وسعرها 131.000
السني f/o a/tوسعرها 100.000
الكروز سعرها 134.000 اوتو بس مش هاي لاين
الاسعار دي من علي كونتاكت كارز والحقيقة انا عارف ان فئاتهم السعرية مختلفة بس الحقيقة دول اللي شدوني قوي
بس كل واحد اجي اقوله الكروز يقولي كوري وتوكيله غبور زي الزفت اقول شارك يقولي ماتور ضعيف ومشاكلها كتير اجي لنيسان اللي لسه نازلة يقولو دي تقفيل مصري وخاماتها وحشة وعفشتها مش مريحة ناشفة قوي

فانا عايز اقارن من حيث
1_ الاعتمادية و قلة الاعطال يعني تقعد العربية تلات سنين صيانتها وزيتها وبنزينها وشكرا
2_ قطع الغيار وسعرها والتوكيل يعني انا شايل الفيات علشان اوماترا اللي الناس بتدعي عليه ليل نهار
3_ الموتور والثبات ودول اهم حاجة عندي (انا معايا 132 بتعوم علي 70 )
4_ اهم حاجة الراحة في السواقة ونعومة العفشة يعني انا بمشي بالعربية مشوار 20 كيلو بيبقي مهدود حيلي من الدريكسيون والصهد اللي طالع عليا من الموتور فعايز العربية يكون عزلها برضه ممتاز بحيث مبقاش قاعد وحاسس اني ماشي في الشارع صوت الموتور داخلي زي ما اكون قاعد علي الكبوت و تزييق العفشة وكل الكلام ده
5_التكييف لازم يكون تلااااجة
6_تتحمل السفر الطويل انا مبسافرش يوميا لكن عايز عربية يوم ما اقول سفر متقولش لا
7_ انا ميهمنيش الكماليات اللي هو البلوتوث والكلام ده انا عايز حاجة عملية الي اقصي الحدود ويكون شكلها مقبول و مشاكلها قليلة
واسف للإطالة وجزاكم الله خير
ولو في اي اختيارات تانية لعربيات افضل مفيش مشكلة انا قدامي شهر وشكرا جزيلا مقدما

بس كدا الصنى هتتظلم فى المقارنة

طيب حضرتك الصني هتتظلم من حيث الفرق في السعر ولا الامكانيات

ارشحلك الشارك عشان الموتور , بس فى الفئه دى مش هايبقى فيها ABS

الكروز هاى لاين فيها ABS و AirBags وفيها معظم متطلباتك ماعدا الموتور

اللانسر غيرت الموتور بقي مايفك 1600
و الكروز سمعت ان هى برده هتنزل بموتور جديد غير الموجود حاليا بس في موديل 2013 ومش عارف هينزل امتى

الكروز يعيبها موتور ضعيف و أنا ليا واحد صاحبى عربيته جابت فتيس بس غيره فى الضمان و مش اذا كان ده عيب شائع و لا لا الله أعلم

متفهمش كلامي غلط

انت سايق 132بقالها اكتر من 30 سنة

لو جبت اى عربية من اللى ذكرتهم هتحس ان كل متطلباتك اتحققت

بس انا ميال اكتر للشارك

انا شايف الكروز كويسة جدا بالنسبة لك ، فيها متطلباتك خصوصا انك مش عايز اوبشن كتير ، عيبها موتورها ضعيف شوية ، وتوكيلها مش غبور توكيلها منصور

اعتقد الشارك مناسبة
والله اعلم ..

صني ووفر الباقي في جيبك .......... الباقي مش قليل .
و العربية ممتازة و اللي يقولك تقفيل مصري يبقى مركبش العربية أساسا و مشفهاش .
العربية تقفيلها كويس جدا ....

هو حضرتك اكيد هتحس بفرق واضح لو اشتريت اى واحده من التلاته لان فى فرق تكنولوجيا حوالى ٣٠ سنه فطبيعى جداً انك هتحس بالتغيير الجامد و النقله التكنولوجيا بالاضافه الى ان العربيه هتكون زيرو و عليها ضمان ٣ سنين. انا بصراحه انصحك بالشارك كموتور و فتيس و كماليات ووسع داخلى و رفاهيه و ماركه محترمه و خاصه انها بقت ١٦٠٠ سى سى و عليها عرض اليومين دول و تأتى الصنى فى المرتبة التانيه و تتميز بالأمان و الوسع الداخلى و العفشه و استهلاك بنزين معقول و سعرها برضه المنافس جداً لان مفيش حاجه بامكانياتها بالسعر ده و لا حتى قريب منه و كمان توكيلها ممتاز و ان كان يعيبها شكلها و ان كان ده اذواق و عدم فخامه مكوناتها الداخليه و فى المرتبة التالته الكروز و ده لأن موتورها ضعيف و توكيلها مش إد كده و تعتبر غاليه على امكانياتها اذا قارنتها بالصنى مثلا يعنى بالترتيب من الاحسن للأسوأ

١- شارك
٢- صنى
٣- كروز

شاكر جدا لردود حضراتكم وجزاكم الله خيرا
ان شاء الله انا بنسبة كبيرة استقريت علي الشارك والصني و لسه هركب كل واحدة فيهم واشوف ربنا هيهديني لاي واحدة منهم

بس في سؤال من خبرة حضراتكم هل في عربيات تانية كويسة في نفس الفئة السعرية دي ويكون اختيارها افضل و احسن ولا دول افضل عربيات في الفئة دي

ولكم جزيل الشكر

ممكن تشوف بروتون جين2 او برسونا.

لو قولنا ان معاك 132 نرشح لحضرتك الصني للاسباب التاليه :
1- فيها كل متطلباتك الى طلبتها
2- اقوي صاج فى التالته
3- استهلاك البنزين الزياده شويه مش هتحس بيه " لانك كان معاك غول بنزين"
4- قطع الغيار تعتبر ارخصهم
5- كأستخدام قاصى "بهدله" تعتبر افضل التلاته
6- فرق السعر 30 الف انت اولى بيه

حاول بس وانت بتشوف الصني بعد ما تظبط الكرسي بتاعك انزل واركب ورا وشوف الكانبه مناسبه لاقي افراد اسرتك ولا لأ

لو هتقارن التلاتة بدون النظر للاسعار الشارك طبعا تكسب و بفارق ملحوظ
لو هتحط الفلوس بند في المقارنة الصني اكيد هاتكسب لانها بامكانياتها(حتى لو مش زي الكروز و الشارك) تعتبر رخيصة جدا كده
فشوف انت بقى عايز توفر و تركب عربية معقولة ولا عايز تركب عربية حلوة و تدفع شوية زيادة

اللانسر افضل عربية فيهم من غير كلام ميتسوبيشى يعنى بعد التويوتا عالطول الصنى حلوة جدا بس حضرتك طلعت لفئة اعلى من الصنى من وجهة نظرى طبعا بيبقى فية فرق كبير فى الصاج و الخامات و الثبات و الحاجات اللى تحسسك انك فعلا دفعت الفلوس فى مكان صح و كل دة هيصب لصالح الشارك غير انك هتاخدها باقل من تمنها منزلنها من 140 الى 124 غير الموتور المايفك دة قصة تانية خالص الكروز حلوة جدا يبها استهلاك البنزين بطة شوية موتورها بيخف بمعنى الكلمة انا شفت ناس كتير بتسقط مواتير فى كروز ههههههه و هيا لسة مكملتش تلات سنين و طبعا توكيلها منصور مش زى توكيل ميتسوبيشى و بعدين بعداذن حضرتك لا مقارنة بين كورى و يابانى من حيث الاعتمادية و الثبات و الخامات
لانسر شارك
صنى اعلى فئة
كروز
لو فرق السعر يفرق مع حضرتك
تطلع الصنى لرقم واحد و الشارك رقم اتنين برضة عشان الغالى تمنة فية

اقتباس:

---

المشاركة الأصلية كتبت بواسطة mstool

اللانسر افضل عربية فيهم من غير كلام ميتسوبيشى يعنى بعد التويوتا عالطول الصنى حلوة جدا بس حضرتك طلعت لفئة اعلى من الصنى من وجهة نظرى طبعا بيبقى فية فرق كبير فى الصاج و الخامات و الثبات و الحاجات اللى تحسسك انك فعلا دفعت الفلوس فى مكان صح و كل دة هيصب لصالح الشارك غير انك هتاخدها باقل من تمنها منزلنها من 140 الى 124 غير الموتور المايفك دة قصة تانية خالص الكروز حلوة جدا يبها استهلاك البنزين بطة شوية موتورها بيخف بمعنى الكلمة انا شفت ناس كتير بتسقط مواتير فى كروز ههههههه و هيا لسة مكملتش تلات سنين و طبعا توكيلها منصور مش زى توكيل ميتسوبيشى و بعدين بعداذن حضرتك لا مقارنة بين كورى و يابانى من حيث الاعتمادية و الثبات و الخامات
لانسر شارك
صنى اعلى فئة
كروز
لو فرق السعر يفرق مع حضرتك
تطلع الصنى لرقم واحد و الشارك رقم اتنين برضة عشان الغالى تمنة فية

---

:b4_388::b4_388::b4_388::b4_388::b4_388::b4_388:

الشارك طبعا افضلهم خصوصا بالموتور الجديد ولو بتفكر في حاجة تانية ممكن تشوف الفلوانس عربية كويسة جدا وفيها كل اللي انت محتاجه واكتر ربنا يوفقك للخير ان شاء الله

صنى و وفر البااقى توكيل محترم و وسائل اماان و اعادة بيع ( للموديل صنى عموما كويسة جداا) و تستحمل اللى انت عاوزو .

و شووف الفلواانس برضو عربية تحفة
و متنساش الاستخاارة :)

قوة الموتور و السحب :
شارك - صني - كروز

ثبات و أمان :
( كروز - شارك ) الاتنين زي بعض تقريبا ، بعدهم تيجي الصني

كماليات :
شارك - كروز - صني

مساحة داخلية :
شارك - كروز - صني

نعومة في القيادة و راحة داخلية :
كروز - شارك - صني

قطع غيار و توكيل :
صني - شارك - كروز

الصاج و الدهان :
صني - كروز - شارك

عفشة رياضية تستحمل البهدلة :
شارك - صني - كروز

شكل خارجي ، و شكل تابلوه :
شارك - كروز - صني ( هنا الكروز و الشارك في نفس المستوى لكن الموضوع أذواق )

قوة التكييف :
شارك - صني - كروز

* بص يا أفندم ... الشارك و الكروز فئة واحده ، لكن الشارك في رأيي تتفوق على الكروز بمراحل و مافيش أي ميزة تخليني أفكر في الكروز عن الشارك ، بالتالي لو هتقارن بين الشارك و الصني يبقى هتظلم الصني لإن دي فئة و دي فئة تانية ... بس أنا لو مكانك و شايف إن إمكانيات الصني يادوب على قدي على طول هشد على الصني و هوفر فلوسي .. لكن لو عايز كماليات أكتر و عايز موتور أقوى و بتحب تجري على سرعات عالية و محتاج أمان أكتر و هكذا يبقى على الشارك على طول .