الموضوع: تعمل ايه لو مكانى

المشاركة الأصلية كتبت بواسطة mohammedaladel

عشان نجيب من الآخر غير قانونى إن الأستاذ gelgel 2004 ينيم كاوتشين من عربية الست وخصوصا أنها عربية بى إم دبليو ومش من حقه إنه يدلق عليها زيت باكم عشان ياكل اللون بتاع العربية ويشوه منظرها ويجب ألا ننسى أنها بى إم دبليو وكان من المفروض عليه إبلاغ المرور كانوا هيجوا يرفعوا العربية البى إم دبليو ويا دار ما دخلك شر وبكدا هو عاقبها بشكل قانونى ومن غير ما يؤذذى البى إم دبليو وأنا ابن بلد بصراحة ولو موقف زى دا حصل معايا كنت هغطى العربية بتاعت الست لحد ما هى تيجى وخليها تتخض بقى فين عربيتى فين عربيتى أنا كنت راكناها هنا قدام الجاراج مين أخدها ههههههههه

حتى لو بلغت المرور .. المرور نفسه مش هاييجي قبل ساعتين تلاتة

أنا مرة فعلا عملت كدة ... كان في عربية شيفورليه كروز وكانت لسة أول ما نزلت جديدة وصاحبها مركبلها فاميه ومظبطها آخر تظبيط وقفل عليا وأنا راكن عمودي ولازق فية بدرجة لا تسمح لي بالخروج نهائيا بالقرب من السراج مول في مدينة نصر ... أخبط عليها مافيش فايدة الناس دخلت قعدت تدور معايا في المول على صاحبها مافيش فايدة ... كلمت النجدة وطلبت ونش مرور عشان أعرف أمشي .. طبعا عقبال النجدة ما جت بعد أربع ساعات وأنا واقف في الشارع أنا والمدام والأولاد مش عارف أروح ... طبعا في خلال الأربع ساعات دول وأنا بدور على صاحب العربية ومش لاقيه خليتهم في المول يندهوا عليه في الميكروفون أكتر من عشر مرات

وطبعا لما الونش جه بعد الإتصال أكتر من عشرين مرة بالنجدة والمحايلة عليهم راح رافع العربية من قدام وساحبها ومن آثار رفع العربية إن الإكسدام من قدام تحت إكسّر والرعبية اتبهدلت ... وفجأة ألاقي صاحب العربية طالع من محل وبيجري وراها وبيقول في إيه ورايح يتخانق معايا ومع ضابط المرور المسئول عن الونش وبيقوللي قال إيه "ما أنا قاعد جوة المحل ما جتش تقوللي ليه وأنا أحركهالك"

تخيلوا طلع صاحب المحل اللى جوة المول وليه باب من برة يشوف العربية على طول ,,, وبعد كل المناداة في الميكروفون بتاع المول والتدوير عليه جاي يقوللي ماقولتليش ليه ... هو انا المفروض أعرف إنك صاحبها إزاي يعني ما احنا بقالنا أربع ساعات بننده على صاحب العربية رقم كذا في الميكروفون بتاع المول

طبعا أحلى عقاب ليه إن العربية اتسحبت على المرور واتبهدلت وفضل مش أققل من اسبوع عقبال ما يطلعها لإنها كمان لازم تدخل فحص من أول وجديد عشان الفاميه