عملت كام كيلو بتفويلة واحدة للتانك؟
بسم الله الرحمن الرحيم
ألف مبروك لكل اللي استلم العربية الصني الجديدة .... وربنا يرزقنا جميعاً خيرها ويكفينا شرها
وربنا يهون مرار الانتظار على كل الحاجزين ويرزقهم فيها البركة والسلامة
النهارة حابب اعرف من الرجالة اللي جربوا الصني الجديدة...استهلاكها الفعلي عامل معاكوا إيه....بس خلونا نوضح في كل مشاركة العوامل الأساسية المؤثرة في الاستهلاك علشان الرقم النهائي يكون معبر عن القدرة الحقيقية للعربية:
- انت ماشي بيها من الزيرو ولا عملت صيانة الألف (يعني استهلاكها لسة Wild ولا خلاص اتروضت وبقت أليفة :grinder:)
- ماشي جوة المدينة ولا براها (محور وصحراوي ودائري وخلافه) , ولو انت مزيج من الاتنين يبقى بنسبة كام لكام.
- مشغل التكييف ولا لأ في معظم طريقك.
- العربية مانيوال ولا أوتوماتك ...و 1600 سي سي ولا 1500.
- انت راكب لوحدك ولا محمل العربية ركاب معاك وحاجات في الشنطة.
وابدأ بنفسي:
تفويلة التانك حوالي 41 لتر ....تانكها صغير حجماً, ولكنه عظيم تأثيراً !! :hlopaet_prv:
- ماشي بيها من الزيرو , لسة متوحشة وماعملتش صيانة الألف, يعني المفروض استهلاكها يتحسن كمان بعد الصيانة بإذن الله.
- جوة المدينة وبراها , باخد محور وأحياناً دائري, وباخد كوبري أكتوبر وصلاح سالم . نسبة 50 إلى 50.
- مش بابطل التكييف خالص, وماشي بيه على طول !
- العربية أوتوماتك 1500 سي سي.
- أول 250 كيلو كانت العربية محملة على الآخر ...بعد كدة انا راكب لوحدي والشنطة فاضية.
النتيجة : عملت بتفويلة واحدة 550 كيلو متر !! الحمدلله رب العالمين وماشاء الله لا قوة إلا بالله. (متوسط 7.5 لتر لكل 100 كيلومتر).
ملحوظة: على الطرق السريعة باجيب 100 أو 110 , واسيب دواسة البنزين لحد ماسرعتي توصل 90 أو 80, بيكون عدى اتنين تلاتة كيلو من غير ماكون دايس بنزين أصلاً !! :B4_048: , بكدة باعمل وفر نسبي في البنزين على الطرق السريعة فقط. أما جوة المدينة فبيكون طلعانة عيني زي باقي البشر :breakpc2:
منتظر مشاركاتكم وأرقامكم :)
----
الكتابة باللون الاحمر مخالف لقواعد المنتدى لانه مخصص للمداخلات الادارية
مشرف القسم
1ب
