الموضوع: عاوز اسافر مطروح :(

اول حاجة لازم تعملها تشوف موضوع دورة التبريد ولازم يبقى سليم 100 100

بالنسبة لموضوع تآكل الزيت والعمرة ولا يهمك

تغير زيت قبل ما تسافر ، واشترى جركن زيت احتياطى معاك علشان تزود منه

فى نص السكة هتقف استراحة، بعد لما العربية تبرد شوية قيس الزيت وزودة لو محتاج وهكذا طول الرحلة

طبعا تبعد عن الحرق على الغيارات علشان بيسرع تآكل الزيت وبييبوظ الموتور لو مش سليم

الاهم من ده كله انك تفضل مخلى بالك من لمبة الزيت علشان لو نورت او حاجة تلحق نفسك

تروح وترجع بالسلامة

شوف انا بطلع مطروح كل اسبوعين لان ليا شقه هناك و شغل .. الطريق زي الفل و مفهوش اي مشاكل اطلاقآ و الخدمات متوفره و عربيات الانقاذ موجوده لكنها غاليه بحجة ان المسافات كبيره بين الطريق و اقرب مدينه اذا كنت القاهره او الاسكندريه او مطروح .. لو الماتور عندك خفيف شويه مش اوي و مبيعملش صوت .. يبقي اتوكل علي الله .. بس المهم تشوف موضوع السخونه لان هتتعبك في الطريق و يفضل تخطفها في الليل لو تقدر ... انا ديمآ بطلع بالنهار لكن اخر مره قبل رمضان بيومين حصلت ظروف اجبرتني انزل الساعه 2 بليل .. بصراحه ارتاحت اوي اوي اوي .. خصوصآ اني وصلت القاهر قبل الزحمه .. و تروح و تيجي بالسلامه .. و مطروح السنه ده هتعجبك اوي اوي اوي اوي ...

Modo88
جزاك الله خيرا , ربنا يكرمك انك طمنتني لموضوع العمرة ده , كدة الواحد ممكن يأجله شوية , لحد ما ظروفي المالية تسمح , ومكان انا سمعت ان عمرة الشتاء افضل , خصوصا الميكانيكي بتاعي نصحني اعملها في الشتاء , هيا العربية عاجباني جدا , مريحة , محتاجة مني شوية شغل ومصاريف واظن هتبقي كويسة , وربنا يستر ويكون موضوع السخونة ده سهل يتحل .


Romieh

شكرا جزيلا لنصيحتك , وكلامك عين العقل , انا هلف علي مكيانيكي وكهربائي وبتاع رادياتير , عشان يظبطولي الحرارة , وهحاول علي قد مقدر اطلع مشوار طويل قبل السفر عشان اجرب الحرارة دي لانها مشكلة بنت لذينا , وهجيب جركنين زيت , احط واحد قبل السفر وواحد اخليه معايا , وحراقب الزيت زي ما نصحتني وان شاء الله اوصل سليم وارجع سليم لحسن العربية لو عطلت في طريق مطروح هحتاج افجرها .

Chicko

احلا مسا علي اللي يعدي بس من جنب مطروح , دي اجمل مصيف روحته , حاجة تطمن وتفرح ان الطريق امان , مريح وفيه خدمات , هو لو لاقدر الله العربية عطلت , ممكن اخلي حد يقطرني ولا حاجة والخوف اني اتزنق وميبقاش في غير العربيات دي , لانهم هيفلسوني , يعني لما ياخدله بتاع 1000 ولا حاجة , يبقي عورني ... ده انا داخل علي عمرة وعاوز اغير كاوتش واشد عفشة , هو الموتور ليه صوت , بس علي الاول وانا معلي بنزين , وبتحتاج زيت بتاع 4 لتر كل شهر بمعدل لتر كل اسبوع , خصوصا انها بتحرق زيت , وكمان بتنزل برة العربية زيت , في تسريب معرفش بسبب العمرة ولا حاجة تانية ,هحاول فعلا ارزع الطريق بليل , هيبقي سهل , والعربية مش هتسخن والطريق فاضي , انا هصلح التبريد واجرب مشوار طويل كدة , نفسي اطلع بقي , مطروح وحشتني جدااااااااااااااااااااااا ااااااااااااااااااااااااا ااااااااااااااااااااااااا اااا .




شكرا يا احلا شباب لردكم , تعبتكم معاياااا

والله يا صديق الكفاح , انا اللي قالقني في تسقيط الموتور اكتر من حاجة ,
1) تكلفته مثلا هتبقي 4 بينما العمرة 3 .
2)انه يطلع وحش , وابقي اتدبست فيه .
3)اثباته علي الرخصة , واصلا انا لسة شاري العربية , فمعايا اني ارخصها بأسمي لحد 2014 , فمش عاوز اغير الموتور واضطر اروح ارخص قبل الميعاد .

و ربنا يبارك فيك ويكرمك علي عرضك للمساعدة , جزاك الله كل خير , عموما انا خلاص اتطمنت ان المنتدي فيه وحوش يدوا نصايح غالية في الحاجات اللي معرفش اتصرف فيها .

المشاركة الأصلية كتبت بواسطة modo88

ياغالي مين قال ان الموتور ب 4 والعمره ب 3 بس؟

1. انا شاري في شهر 5 من سنه 2011 يعني السنه للي فاتت موتور 1500 بالفتيس كمان بالمارش بالدينامو بلانجكشن بكمبروسر التكييف كامل مكمل والكمال لله وحده كان ب 2200 جنيه بس
2. انه يطلع وحش دي انت هاتجيب ميكيانيكي يبص عليه الاول وبعدين يركب ويشوفه كويس ولا لا وهتاخد ضمان من التاجر عشان لو فيه حاجه يرجع
3. غير الموتور عادي ولما يجي وقت الترخيص ابقي اثبته عادي زي منا عملت قعدت سنه ماشي عادي بالجديد من غير ما اثبته

وموضوع اثباته سهل اوي علي فكره ياتخلي التاجر يخلصلك الورق يا اما تروح بورسعيد تخلصه بنفسك في المنطقه الحره ولو محتاج الموضوع دا انا تحت امرك انا في المنصوره ممكن اجي معاك عادي بورسعيد تخلصه وتحت امرك ياغالي
وربنا يوفقك للي فيه الخير

الكلام ده عسل جدا جدا جدا يا باشااا , يعني مش غالي ولا حاجة ,قول لو الاسعار ولعت ولا حاجة هيعمله بتاع 2,500 او 2,700 بالكتير , زي الفل , بس حوار ضمان التاجر ده , بورق ولا ربط كلام ؟ , الواحد خايف يلبس في موتور , يجي يرجعه يعمل مشاكل وخناق وكدة , بالنسبة لحوار الورق والتخليص الجمركي ده , انا متخيل اني وقت ما ادفع الفلوس الورق بيجهز في ساعتها , مظبوط الكلام ده ؟ و ولا بياخد وقت ؟ , يعني اللي اقصده الصفقة بتعمل ازاي ... خد الفلوس اهيه كاملة وهات الموتور وورقه ولو فيه حاجة هرجعهولك .؟؟ ,وجميل اوي موضوع امشي بيه واثبته بعدين , هيسهل عليا كتير الموضوع ده , يعني بكدة اثبت الموتور وارخص العربية بأسمي 2014 , زي الفل الكلام ده .... ربنا يطمنك ....

واكيد وقت ما اجي انزل اخلص الحوار ده , هفضل علي اتصال بيك , خصوصا اني مش فاهم اي حاجة


ربنا يكرمك , وجزاك الله كل خير لمساعدتك ونخدمك في الافراح ان شاء الله


اه صحيح , نجحت في تحويل عربيتك اوتوماتيك ؟ ؟ , ولا تنازلت عن الفكرة ؟ و ولو تنازلت , تنازلت ليه ؟