الموضوع: طلب ضرورى جدا جدا فى سعر الاكسيل

انا شاكر لرددودكم جدا
بس انا صرفت نظر عنها لانى لقيت واحدة 98 وهتخلص على 28 و نص
العربية فابريكة برا وجوا وصاحبها محافظ عليها جدا جدا
ومركبلها باور
مفيهاش بس غير بارومة صغيرة اوى فى الباب اليمين 2 سم *2 سم
والبربريز الامامى عايز يتغير
وفيه واحدة راشة برا لسه هشوفها النهاردة بس مفيهاش باور فلو حد ليه راى فى حاجة يا ريت يقولى

عموما انا شخصيا لو هاجي اشتري مستعمل دايما بركز علي الهيونداي او الدايو اكيد طيعا بيقي نفسي اركب عربية ياباني او الماني .. بس الفكرة انها طالما مستعمل يبقي لازم هتصرف عليها وطالما هتصرف عليها يبقي تشوف حاجة مصاريفها علي اد ايدك وتريحك في صيانتها والاكسبل اثبتت كفاءة هنا في مصر والكوري هو اللي ماسك سعر اليومين دول وفي نفس الوقت مش بيدبح في مصاريفو

هات شاهين يا باشا وسيبك من الهونداى اكسيل خالص انت ممكن تجيب 2000 او 2002 شاهين بالسعر ده وحاله ممتازه والف ستمايه

انا رأي ان العربيات القديمة يتفاضل بينها بالحالة العامة و توافر قطع الغيار و اسعارها و سهولة صيانتها
بما ان عندى اكسيل و دى تالت اكسيل فى العيلة هقولك اللى اعرفه بكل حيادية
- ال 1300 ضعيفة و افضلك بكتير ال 1500 و فرق التمن مش هيبقى كبير لانى اعتقد ان سعرها يبداء من 33 للحالة النظيفة
- العربية عموما ناعمة و مش متعبة فى السواقة لكن العفشة بتاعتها ضعيفه فلو طريقك فيه مكسر كتير هتقرفك
- شكلها الى حد ما مقبول الى اليوم
- اول حاجة تعملها انك تغير لمساعدين الخلفيين بمساعدين kyp غاز على زيت عشان توقف التنطيط بتاع العربية من ورا
- خلى بالك ان مع توافر قطع الغيار فهى مش بنفس التوافر زى الاول لكن موجودة و تلاقيها بدون تعب يابانى و كورى و صينى و استراد و زى الاخوة ما تفضلوا و قالوا ان قطع غيار كتير جدا مشتركة بين المتسوبيشي و الاكسيل.
- تمشي ببنزين 80 مفيش مشكلة
- استهلاك البنزين عالى شوية يعنى المتوسط حوالى 11 لتر/ 100 كم ( اوتوماتيك 1500) اكيد فى المانول افضل من كده.

لو المبلغ المتاح ما يجبش غير ال 1300 ارشحلك المازدا 323 افضل منها بمراحل و طبعا الشاهين ال 1600 لو بنفس السعر تبقى افضل
حدد انت عاوز ايه من العربية بالظبط عشان تعرف تتكيف معاها. وربنا يكرمك بعربية تريحك