الموضوع: مين جرب ركوبة الفولفو 240-244 قبل كدة؟؟..وايه مميزاتها وعيوبها؟..

المشاركة الأصلية كتبت بواسطة benmatar

السلام عليكم
إثنين أصدقاء معاهم فولفو واحدة 240 والثانية 244، العربية دي ما شاء الله عليها، استخدمتها كتير وسافرنا بيها، أولا متفكرش إنك تعمل لها صيانة عند حد غير ميكانيكي الفولفو، وكمان في عفشجي فولفو، وبالنسبة لقطع الغيار مش هتصدق إنك تعرف إنها رخيصة مش هقول متوسطة هقول رخيصة، يعني مثلا سير الكاتينة يبتدي من 150ج.م لغاية 400ج.م الأصلي، جوز مساعدين خلفي استيراد 200ج.م، رفرف أمامي 200ج.م، فانوس خلفي كامل 275ج.م... وطبعا مفيش من الحاجات دي صيني، بداية من الأصلي والسويدي والألماني والتركي وغيره. قطع الغيار الجديدة موجودة في وسط البلد صحيح مش مرطرطة بس تلاقيها والاستيراد برضه في الوكالة وبورسعيد.
أهم شيء إنك لو استخرت ونويت تشتري تدور على حاجة تكون استخدام راقي بمعنى الكلمة ومش متبهدلة، وهتلاقي، وبالنسبة لايتهلاكات البنزين هتكون ممتازة لو معظم استخدامك وتنقلاتك طرق مفتوحة وسفر، بس هتاكل منك شوية لو مشاويرك أغلبها في الزحام.
العربية دي مواتيرها 2300 و 2100 و 2000
ومواتيرها نوعين الموتور الفضي أو الأبيض والموتور الأسود الأحدث
أحدثهم 2000 حقن الكتروني (injection) أوفر في الاستهلاك، اعتقد إن الأفضل الموتور الأسود وده في منتصف الثمانينات.
وزي ما تفضل أخ وقال إن إعادة البيع هتكون صعبة شويتين بس الفولفو ليها ناسها.
طبعا مسألة الكفاءة سواء من قوة موتور أو ثبات في السرعات والمنحنيات وقوة العفشة وتحملها مع نعومتها في نفس الوقت، ومعدلات الأمان فيها كويسة جدا، وشعارهم أأمن سيارة في العالم.
ومتانة صاج وتكييف ولا الأسبليت بتاع البيت، وباور وجميع الكماليات، لو بتفكر توكل على الله، وبالتوفيق

كل الكلام دة سليم 100%

فعلا العربية زي القطر
ولازم الميكانيكي بتاعها والكهربائي بتاعها

قطع الغيار بصراحة سمعت عنها انها فيها حاجات غالية
يعني كان في زميل لأخي الأكبر بيشتري شبكة كروم ب 750 جنيه

ومرة دخل فيه اتوبيس من الجنب - راح سمكرها ورجعت زي الفل

عربية دبابة

استهلاكها في المدينة خرافي

وعارف مسألة أأمن عربية ليه ؟؟؟
عشان هي اول شركة تعمل حزام أمان في السيارة - فأطلقوا عليها اأمن سيارة في العالم