معايا 44 ألف ومش عارف أجيب إيه وتعبت خلاص !!! شوروا عليا
السلام عليكم ورحمة الله وبركاته
بقالي كذا يوم سايب المصحف وعمال أخش على كونتاكت كارز ومصر موتورز ونايل موتورز وفابريكة لحد ما خلاص عقلي هيشت :hitwall3:
معايا 44 ألف وكنت ناوي أجيب حاجة زيرو بالقسط (لوجان) بس كل ما أنوي في موضوع القسط ده ربنا مش بييسروا وأكيد ده خير ليا لأن كله شبهات والبنوك طالما دخلت في موضوع يبقى انسى انك تطلع منه سليم
والمعارض اللي بتقسط مباشر عاوزين يمضوني على تمن العربية 3 مرات ، مرة أقساط ومرة وصل مجمع ومرة وصل مجمع للضامن يعني حرام بصراحة لأني ممكن أدفع كل الأقساط ومع آخر قسط ممكن يطلع راجل مش كويس ويلبسني في الحيط ويحبسني أنا والضامن ولا هقدر أعمله حاجة
قلت أجيب مستعمل بالفلوس اللي معايا بس أنا ملسوع من المستعمل 5 مرات قبل كده وكل مرة أقول توبة ومش بحرم برده بس أعمل إيه على أد فلوسي
المهم قعدت أدور على حاجات موديل عالي قدر المستطاع عشان متبقاش مشيت كتير ومتتعبنيش في المصاريف وتكون لسة بحالتها مش متهانة فلقيت الرينو الكليو بس قريت كذا موضوع عنها قلقت من قطع غيارها ومن الميكانيكية اللي معظمهم ملهمش فيها وطبعا عشان اروح التوكيل يبقى لازم اكتب وصيتي في البيت قبل ما أنزل !!
قلت أجيب لانوس وقريت برده بس عارف انها عربية بنت ستين في سبعين متستاهلش الفلوس اللي بتتدفع فيها بس للأسف هي منتشرة عشان قطع غيار رخيصة ومتوفرة والميكانيكية كلهم بيفهموا فيها (المعادلة الصعبة)
قلت أجيب فيرنا بس كرهتها عشان واطية وأنا عايز حاجة تستحمل الهضاب والجبال اللي عندنا في مصر
بصراحة احترت وتعبت
شوروا عليا الله يكرمكم نفسي أركب عربية محترمة وشكلها حلو وسحبها كويس خاصة مع التكييف وفي نفس الوقت أقدر أصرف عليها لو عطلت وده شيء أكيد يعني انها هتعطل وبالمبلغ اللي معايا ده والله يكرمكم محدش يقولي حطه عليه كذا وهاتلك كذا عشان ده أقصى إمكانياتي خاصة إن لسة فيه مصاريف تسجيل ومصاريف صيانات مستخبية بعد ما اشتريها هتخشلها في ألفين تلاتة آلاف جنيه
وجزاكم الله خيرا ورمضان كريم
