مقارنة بين بروتون برسونا 2012 ، و صني الشكل الجديد
المحرك :
البرسونا 1600 سي سي
صني 1500 سي سي
و هناك ميزة للبرسونا في التسارع و قوة المحرك المشهود لها ... محرك البرسونا انجليزي .
الثبات و نظام التعليق :
البرسونا اثبت بمراحل بمراحل من النيسان ... بل ان البرسونا اثبت من الكورولا و الهوندا سيفك ... ثبات رائع رائع ... و لا مجال للمقارنة بينها و بين الصني .
عفشة البرسونا ناشفة قوي ... عكس الصني عفشة طرية طرية .
الكماليات :
نفس الكماليات موجوده في السيارتين تقريبا و لكن كماليات البرسونا اعلي .
الكماليات التي تتميز بها البرسونا و غير موجوده في الصني الجديدة
1- مثبت سرعة .(الاوتوماتيك فقط )
2- الشنطة اكبر و فيها امكانية طي المقاعد الخلفية .
3- عجلة قيادة يوجد بها مفاتيح للتحكم في الصوت .
4- حساسات للباركنج .
5- تكييف متعدد السرعات (حوالي 12 سرعة ) و اقوي بمراحل من مكيف النيسان .
6- جنوط اسبور الومنيوم ، وكاوتش من نوع ممتاز . بعكس الصني كوتشات تعبانه مووت .
7- سبويلر .
8- لمبات في المرايات الامامية .
9- جودة تقفيل و دهان واضحة جدا .
10- لوحة عدادات اكثر اناقة .
11- سي دي usb .
12- الصاج اقوي و اكثر سماكة .
13- سي دي متميز جدا و امكانياته عاليه قوي ... مع اريال انيق اعلي السقف .... عندك الصني الاريال بتاعها 1متر شكله غبي موووت .
14- الجير الاووماتيك اكثر امكانيات L ،2،3،D،R،P
15- لا يمكن ان يخرج المفتاح من الكونتكت و الجير علي اي وضع غير P ، و ذلك زيادة امان و محافظة علي عمر الجير .
16 - صندوق كونسول جانب السائق ...
الكماليات التي تتميز بها الصني عن البرسونا :-
1- مساحة أكبر في الكنبة الخلفية من البرسونا .. و لكن البرسونا مساحة جيدة و مقبولة ايضا .
2- فتحات للتكيف في الخلف .
3- خامات التابلوه اجود نسبيا .
السعر :
برسونا اوتوماتيك 95 الف ......... صني الجديدة اوتوماتيك 100 الف .
التوكيل :
بصفة عامة لا يوجد توكيل محترم في الدول العربية كلها أي ماركة سيارة ... كلهم حرامية .
و لكن توكيل نيسان و بروتون و مراكز خدمتهم قريبة من بعض قوي و بيطورا نفسهم .
و الي خلاني ابيع الصني هو توكيل مودرن موتورز (( ربنا ينتقم منهم )) لأنهم حرقولي محرك السيارة ... اه و الله ...
روحت اغير زيت عندهم ... فضي المحرك من الزيت و نسي يملي زيت جديد ... المحرك افش ... منهم لله .. و بالطبع معرفتش آخد منهم حق و لا باطل .
سعر اعادة البيع :
اذا كان البيع بعد 5 سنوات مثلا .. يبقي اجمالي الخسارة في السيارتين واحد تقريبا ... و ان كانت الصني تتميز انها اسرع و اخف في البيع .
استهلاك الوقود :
الصني موفره نسبيا لأن محركها سعته اقل .
خزان الوقود :
برسونا 44 لتر ........ صني 41 لتر .
من الاخر رأيي الشخصي اشتري برسونا و لا يمكن هاتندم ابدا ابدا
معذرة اللي بيشكر في توكيل نيسان
الف مليون معذرة للي بيشكر في توكيل نيسان .... انا مش عارف في ايه اكتر انهم يحرقوا محرك .
في اهمال اكتر من كده ايه انهم ينسوا يحطوا للمحرك زيت ؟؟؟؟؟
و يارتهم اعترفوا بالخطأ لأ لأ .... وصلت اني رفعت قضايا عليهم و معرفتش آخد منهم حق و لا باطل .
كل من يشكر في توكيل نيسان فهو مخدوع مخدوع مخدوع .
و بالنسبة لقطع غيار برسونا .... مفيش حاجة اسمها قطع غيار برسونا بس و خلاص .... 70% من قطع غيار السيارات تتطابق مع بعضها
كل ما عليك انك مترميش القطعه القديمة ... و روح بيها عند محل قطع الغيار و قوله عايز زي دي .
و بعدين انا مش عارف ... محدش بيفكر بالاسلوب دا غير المصريين ... رايح يشتري سيارة زيرو ... و بيفكر في قطع الغيار ....
السيارة الزيرو مش بيتغير فيها قطعه كبيرة الا بعد 5 سنوات علي الاقل .
و بعدين هو استمتاعك بعربية محترمة دا مش له ثمن .
و مع احترامي لكل من يمدح في الصني ... انا ركبت و امتلك السيارتين
الفرق واضح واضح بين الاثنين ... انا مش بقول ان الصني وحشة ... بس البرسونا فارقة عنها جامد .