متابــــــعالسلام عليكم و رحمة الله و بركاته :
بص بقي يا باشا أنا تمام قمت بالتنفيذ علي الخطوات التالية و ياريت تركز معايا عشان مخي مش يروح مني :
أولا - بعد ما لفيت في التوفيقية علي لمبات فيليبس رالي ومش لقيتها و تنازلت و قلت اوسرام أو أي ماركة الماني تديني الضوء الأبيض مش لقيت و كل اللي لقيته صيني الطقم عامل 25 جنيه و بعد محاولات فاشلة رحت لشارع أحمد سعيد في العباسية علي أمل العثور علي أي من اللمبات السابقة و لكن طبعا زي التوفيقية و حتي اللي كان موجود الماني نفس اللون العادي الأصفر و فيه منها 200 / 260 و لكن كوري المهم طلعت علي أخر أمل ليا و هو شارع دمشق بمصر الجديدة و بعد كام محل واحد ربنا يجزيه خير دلني علي شركة المدينة و رحت علي هناك و سالته علي اللمبات دي قالي هي مش موجودة و لكن فيه نوعين تاني الماني
نوع فيليبس بنفس مواصفات اللمبة العادية و لكن ضوء أبيض ضعيف و لكن مش بيحتاج كتاوت بيتركب علي طول و هو 65/45 و معاه كمان اللمبات الصغيرة و الطقم عامل 175 جنيه .
نوع أسمه تريفا و ده الماني و مواصفاته H4 / dark blue / 200-120CP / 100/90W عامل اللمبتين 75 جنيه و كمان كتاوت ماليزي ب 25 جنيه و شوية ترامل و 5 متر سلك 2 مللي و كمان لمبتين سفاية صغيرين تايواني عاملين 25 جنيه يعني تقريبا الموضع كله عمل 135 جنيه .
نبدأ بقي خلاصة الكلام من شرح حضرتك لغاية النقطة الغير مفهومة و ياريت من فضلك تشرحها أكثر و بوضوح عشان التبس الأمر عليا :
1 - تحديد موجب النور العالي شمال و يمين بلمبة التيست .
2 - تحديد موجب النور الواطي شمال و يمين بلمبة التيست.
3 - قطع سلك الموجب عالي يمين و شمال قادم من الضفيرة و توصيل كل منهم بسلك لون أزرق.
4 - قطع سلك الموجب واطي يمين و شمال قادم من الضفيرة و توصيل كل منهم بسلك لون أحمر.
5 - الفانوس اليمين : المفروض فيه 3 أطراف رايحين للدويل بتاع اللمبة منها موجب عالي و موجب واطي و أرضي ( أجوا التصحيح لو المعلومة غلط ) . حنقوم بتوصيل موجب العالي اللي جاي من الضفيرة بعد قطعه مع السلك باللون الأزرق .
6 - حنقوم بتوصيل موجب النور الواطي اللي جاي من الضفيرة بعد قصه مع السلك باللون الأحمر.
7 - الأستفسار هنا من حضرتك لما قلت (( الجزء التاني اللي جاي من الضفيرة ده لفه بالشيكرتون و الغيه نفس الكلام اعمله مع السلك بتاع الموجب بتاع النور الواطي )) ياريت من فضلك تشرح لنا النقطة دي لني بصراحة لغايه هنا التبس الأمر عليا و فصلت .
8 - بخصوص الجانب الأيسر برضك فيه استفسار من حضرتك معلش استحملني شوية . أنت قلت الجانب الأيسر نفس اللي عملته مع الجانب الأيمن مع الأحتفاظ بالألوان (( الأختلاف أنك مش حتلغي السلك اللي جاي من الضفيرة لا أنت حتعمله مين بتاع العالي و مين بتاع الواطي بالقلم الفلوماستر و بعدين ركب فيهم كلبسات بغطيانها و ده حيبقي المسئول عن تشغيل النور بعد توصيلها بالكتاوت )) دي الجملة اللي حضرتك ذكرتها في الشرح و كنت محتاج شرح أكثر ليها بعد أذنك ))
ياريت ترد لأني قمت بتجهيز الحاجات و ناوي ان شاء الله اعملها في يوم الأجازة و لكن النقطتين اللي قلت لحضرتك عليهم هما اللي لخبطوني و كنت محتاج توضيح أكثر ليهم و جزاكم الله خيرا عن الرد مقدما .
و تقبل تحياتي
أشرف ابوزيد
المفضلات