انا بكتب الموضوع ده علشان بصراحة فاض بيا خلاص

انا حصل لي 3 مواقف من الاعضاء هنا في البيع والشراء كلها اخلاف للالتزام بالاتفاق والوعد
الموقف الاول
اخ كان عارض ايفون 2g للبيع. قولت اخده لوالدي علشان الخط في الايفون بيبقى كبير وواضح وهيريح عينه. اتفقت معاه اخده منه ب 600 جنيه. انتظرت منه تيليفون علشان نحدد مكان نتقابل فيه. ولا اتصال ولا تيليفون. اكلمه ما بيردش. هو كان صديق لاخ معانا هنا في المنتدى. لما كلمته. عرفت انه باعه علشان جاله فيه سعر اعلى رغم انه اتفق معايا.

الموقف الثاني
عضو كان عارض سامسونج اس2 وانا كنت راجع من السفر واتفق معاه اول ما اوصل اقبله واشتريه.
اول ما وصلت بكلمه قاللي انا بيعته. طب ليه يا باشمهندس مش احنا متفقين اخده من حضرتك. قاللي مانا مش ضامن انك تشوفه ما يعجبكشي وتسيبه.

الموقف الثالث
لسة طازة.
عضو عارض جالاكسي نوت ابيض للبيع. وانا بصراحة بدور على الجهاز ده بقالي فترة.
اتفقت معاه اخده بس المشكلة انه ساكن خارج القاهرة.
اتفقت معاه اخد الجهاز وهو قاللي نازل القاهرة في خلال ايام قليلة. وده كان تقريبا يوم 18 يوليو
انتظر مافيش لا تيليفون ولا اي حاجة.
كلمته قاللي معلش ظروف رمضان بس ان شاء الله في خلال الشهر هكون في القاهرة.
انتظرت وخلص الشهر. اكلمه مش بيرد. ابعتله رسايل على الموبايل وعلى المنتدى ولا الهواء.
وانا المفروض كنت مسافر انهاردة الحمد لله سفري اتأجل ليوم الخميس
انا كان معايا نت بوك وبعته على اساس اني هاخد منه النوت استخدمه
حسبي الله ونعم الوكيل في كل من يخلف ميعاد او اتفاق ودي احدى صفات المنافقين