بسم الله الرحمن الرحيم

الحمد لله ركبت التونجسرام النهارده بعد غياب طويل و حبيت انقل تجربتى ليكم بالصور و الفيديو...

النهاردة المقارنة بين اللمبتين التونجسرام ( 140/100 وات) و النيرفا ( 100/90 وات) الى كنت مركبها

والى مايعرفش التونجسرام هى لمض صناعه مجرى لمض صفرا .
اما النيرفا لمض صناعه المانى فى منها ابيض و ابيض مزرق .

دى شكل اللمبة التونجسرام



 ودى النيرفا الى كنت مركبها (ابيض مزرق)



الحقيقه النيرفا لمض منظر حلو وبتفرش كويس و بتدى اضاءة حلوة لما يكون الشارع مظلم و هى قعدت معايا اكتر من 6 شهور , العالى بتاعها ملوش لازمه لان الضوء بيتشتت و بتبقى الاضاءه ضعيفة

نيجى بقى للمارد التونجسرام لمض قوية جدا و الواطى بتاعها ينورلك جامد و العالى مش بتحتاجه خالص الا لو واحد مركب زينون ومضايقك تتديله العالى فوشه هيعرف ان الله حق ويركن عالجنب



المميزات و العيوب

النيرفا: عيوبها اضاءه تعتبر ضعيفه و خاصه فالعالى و لو ماشى فشارع عواميده صفرا يبقى اطمن مش هتشوف حاجه لا بواطى و لا بعالى و طبعا اخواننا الى بيمشوا عالدائرى و كوبرى اكتوبر و المحور هيحسوا بده اوى ..

التونجسرام: عيبها هو هو ميزتها ان لونها اصفر و ده اللون الوحيد الى بيهزم اى عامود تعدى تحتيته و توريك لمسافات بعيده كمان, العيب التانى و ده مش ذنبها انها مش موجوده دلوقتى فالسوق

بالنسبه للصور الموبايل مقدرش يصور اللمض النيرفا لان الاضاءة ضعيفه بالكاميرا هنشوف صور للتونجسرام بس لكن فيه فيديو بيقارن الاتنين

صور التونجسرام

الواطى


العالى


* اللمض صفرا عشان محدش يقولى فالصور بيضا الكاميرا بتاعه الموبايل مطلعاهم كده


لما حبيت اقارن فالفيديو قولت اقارن تحت العواميد الصفرا عشان نشوف انهى لمبة قدرت تثبت نفسها

اولا النيرفا فى الاول هتلاقينى بديت بالواطى و لما جيبت العالى النور ضعف زى ماقلنا قبل كده لاحظ لما مشيت بالعربية و قربت من الاماكن الى تحت العواميد هتلاقى نور النيرفا ضعف جدا عكس الجزء البعيد عن العواميد

فيديو النيرفا

Narva.mp4 - YouTube


طبعا لما اجى اختبر التونجسرام مش هروح لنفس مكان النيرفا يبقى عيب فحقها طبعا لازم يبقى مكان غرقان عواميد صفرا عشان نشوف قوة الاضاءة و كالعاده اكتسحت الطريق و غلبت نور العواميد بالقاضية تعالوا نشوف

فيديو التونجسرام

Tungsram 100 / 140 W in Light.mp4 - YouTube


اذا كانت بتنور المتنور كده امال فالظلمه بتعمل ايه؟؟؟؟؟؟؟؟ شوف انت بقى


حقيقى اللمض دى افضل من الزينون من وجهه نظرى المتواضعه مادام مفيش عدسات او لو مش عاوز تتدفع كتير و احنا عارفين الزينون ومشاكله و قرفه

اتمنى يكون التقرير عجبكوا


كل سنة وانتوا طيبين