سؤال : كام حساس فى الميجان؟؟ وايه وظيفية كل منهم؟؟ وبيتغر كل قد ايه؟؟ وايه اعرض تلفهم ؟؟ واسعار كل واحد منهم من خارج التوكيل؟
سؤال : كام حساس فى الميجان؟؟ وايه وظيفية كل منهم؟؟ وبيتغر كل قد ايه؟؟ وايه اعرض تلفهم ؟؟ واسعار كل واحد منهم من خارج التوكيل؟
سؤال حلو بس إجابته تطووووووووووووووول
بس هو المفروض نعرف الأول.......أيه فى الحساسات دى مش موجود فى العربيات التانية اللى زى الميجان
يعنى مثلاً حساس الأوكسجين......موجود فى الميجان و عربيات تانية كتير.
حساس السولونيد أو سولونيد الفتيس موجود فى معظم الأوتوماتيك إن مكنش كله.
حساس ال abs موجود فى أى عربية فيها abs
و برضه نخللى بالنا أن فيه حساسات فى الميجان كمالية مش هتأثر لو باظت على العربية زى حساس النور اللى بيخلى النور يشتغل أوتوماتيك لو دخلت نفق أو الدنيا ضلمت.......و حساس المطر اللى بيخلى المساحات تشتغل أوتوماتيك لو الإزاز جه عليه مياه.
و أخيراً نخللى بالنا من إختلاف المسميات....يعنى.....حساس الزيت فى الميجان.....موجود فى كل العربيات بس فى معظم الوقت بيتقال عليه صباع الزيت...........حساس الحرارة نفس القصة....صباع الحرارة.
هذا و الله أعلم.
بالمناسبة بقى حساس الإضاءة الليلية بيبقى موجود فين ولو بايظ بيعمل إيه مبيشتغلش خالص ولا بيهيس ويخلى النور يشتغل فى أى وقت
طبعا العربية فيها خاصية آى ترافيك خاصية علو الصوت مع زيادة سرعة السيارة عايز أعرف إيه نظام عمل الحساس دا وبيبقى متوصل فين بالعربية أنا لما فكيت الكاسيت عشان الإيه يو إكس شفت الكابل بتاعه بس المشكلة عندى الصوت مش بيزيد مع السرعة ولا يمكن بيتهيقلى ؟ يعنى مثلا ببقى معلى الصوت على 11 وأزود السرعة والصوت ما يعلاش مع إنى مفعل الخاصية والشاشة كاتبة itraffic ولا هو بيشتغل على سرعة معينة ونظام معين ؟
الأستاذ أحمد كان عنده مشكلة حساس أوكسجين كان عايز يتغير وأعراضه ان العربية بتبطل بعد الدوارة حضرته ممكن يوضحلك أكتر فيه عضو تانى هنا فى موضوع هتلاقيه فى المنتدى غير حساس الكرنك وأعراضه مش فاكر بالظبط كانت برضه العربية بتبطل أما عن الكماليات فيه حساس مطر بتجيب دراع المساحات على أول درجة كدا إنت شغلته ودا مكانه فى أعلى الزجاج حتى بيبقى عبارة عن نقطة زى العين كدا فى الزجاج وحواليه منطقة متظللة دا فى البربريز الأصلى طبعا بيبقى راكب من جوا فى العلبة اللى راكبة فيها مراية الصالون والله أعلم الحساس دا ممكن تظبط درجات حساسيته للمطر عن طريق بكرة فى دراع المساحات دا كل اللى أفتكره تقريبا
itraffic غير خاصية علو الصوت
خاصية علو الصوت ليها تظبيطة لوحدها بس مش فاكرها بالظبط دلوقتى.
حساس النور مش عارف هل هيكون مجرد تعليق ولا عدم القيام بوظيفته أصلاً بس أعتقد ممكن تكون دى أو دى حسب درجة البوظان...........و أنا بصراحة معرفش مكانه فين بالظبط.
و لو باظ خالص يبقى النور مش هيشتغل غير مانيوال.
مازلت فى انتظار المزيد
حساس الأوكسجين وظيفته تظبيط كمية الأكسجين اللى داخلة غرفة الحريق على حسب نوعية البزين المستخدمة للوصول لأحسن خليط حريق بحيث ان الفاقد فى البنزين الغير محروق يبقى أقل ما يمكن.
بالمناسبة.........الحساس ده موجود فى كل العربيات الجديدة و معظم العربيات القديمة من أول 1980.
بس زى ما قولت قبل كده ممكن يكون له مسميات تانية متعارف عليه بيها.
حساس الكرنك.............المفروض بيدى إشارة للكنترول بتاع العربية بيقوله فيها على عدد لفات الموتور بحيث يقوم الكنترول بالتحكم في توزيع الشرارة ( و سرعة الشرارة كمان ) اللازمة لحرق البنزين.
لو فيه أى أخطاء يا ريت حدد يصححلى المعلومة.
حساس النور و ده وظيفته زى ما قولنا قبل كده...........الإحساس بالإضاءة الخارجية و إرسال إشارة لتشغيل أنوار العربية فى حالة الظلام.
حساس المطر و ظيفته الإحساس بوجود مياه على الزجاج الأمامى للعربية و إعطاء إشارة لتشغيل المساحات أوتوماتيكاً.
موجود داخل غطاء مراية الرؤية الخلفية من جوة العربية.
حساس درجة حرارة الجو الخارجية و طبعاً معروف و ظيفته و موجود فى جسم مراية الجنب الشمال ( مراية السواق الجانبية )
حساس السلونيد ( مش متأكد من دقة المعلومة )
وظيفته الإحساس بسرعة العربية و النقلة الحالية و بيوصل المعلومات دى للكنترول علشان يتجاوب معاها يعنى مثلاً السرعة 40 و النقلة الأولى يبقى الكنترول المفروض يدى الأمر بالنقل للسرعة التانية و هكذا.
بعد اذنك اوضح حاجتين, حساس الاوكسجين بيتحكم في كمية الوقود مش الاوكسجين ,و بالنسبة لشرارة الاشعال في تحكم في توقيتها لكن مافيش تحكم في سرعتها
شكراً يا فندم على التوضيح.............أنا الكلام ده شوفته على النت و المصدر مش متأكد منه
بس فى حساس الأوكسجين المصدر على ما أذكر كان wikipedia و أعتقد أنه موثوق فيه شوية.
هما قايلين كمية الأوكسجين تحديداً.
مش عارف بقى.
بالنسبة للشرارة هل هى بتطلع بمعدل ثابت ؟ يعنى مثلاً مرة كل ثانية ؟
أنا بصراحة مش فاكر اليمين و لا الشمال............أو بمعنى أصح مش متأكد 100%
خاصية itraffic مش شغالة فى مصر على ما أذكر المفروض أنها بتديك معلومات عن المرور و الزحمة.
loud دى موجودة فى أى كاسيت من زمان..........و هى on او off بس
الخاصية بتاعة علو الصوت مع السرعة مش فاكر كان أسمها أيه على القايمة بس ممكن على بكرة أقلولك إن شاء الله......و بيبقى فيها تحديد نسبة علو الصوت مع السرعة من 1 ل 5 لو أنا فاكر صح.
بالنسبة لحساس الإضاءة ممكن تكون فكرة عمله تقريبا زى حساس الإضاءة اللى بيبقى موجود فى الموبايلات اللى هو لما بتدخل فى مكان معتم بيخفض إضاءة الشاشة ويزود إضاءة المفاتيح ولما تطلع فى مكان نور بيخفض إضاءة المفاتيح وينور اضاءة الشاشة عشان يحقق أعلى رؤية و ضوع بس هنا فى العربية يا إما يطفى يا إما ينور بس هل لو دخلت فى حتة فيها نور بالفعل بيتجاوب بسرعة ويطفى ؟؟؟؟؟؟ أنا لسة مجربتش الحتة دى والحساس دا لو فى الكشاف نفسه يبقى موجود فى الكشافين وطبعا هيبقى واحد مش اتنين لأن لو اتنين هيختلفوا مع بعض ممكن واحد ينور والتانى لأ ويعمل لبس فأكيد هما حطوا حساس واحد مشترك للكشافين بس فين مكانه الله أعلم :)
بالنسبة للوقود أنا على حد علمى إن الرشاشات بتتحكم فى دخول الوقود بالتجاوب مع دواسة البنزين والكنترول بتاع العربية بالتالى حساس الأوكسجين هيدخل كمية أوكسجين أكبر لحرق مثالى لو حصل ونقص كمية الوقود اللى داخلة هيحصل تخفيض لكمية الأوكسجين والله أعلم دا اعتقاد منى وتحليل شخصى لكن معرفش إذا كان صح أو خطأ
بالنسبة للتوقيت بتاع الشعلة حضرتك تقصد إيه ؟؟؟ لو كل ثانية مثلا الشعلة بتطلع من البوجيه مرة مع السرعة الأكبر للمحرك ونسبة حقن أكبر للوقود هنخفض الوقت دا بالتالى هنزود سرعتها ولا حضرتك تقصد حاجة تانية ؟
شكرا يا استاذ احمد ولكل من شارك على المعلومات الغزيره دى وفى انتظار المزيد عن العمر والسعر لتلك الحساسات
مكانه مش عارفه بصراحه.........بس لو دخلت فى حتة منورة بعد الضلمة بيتأخر حوالى 10 ثوانى قبل ما يطفي.
لو مشغله هتلاقي قبل ما الدنيا تضلم بحوالى نص ساعة كده أبتدى يولع النور.
ما هو ده اللى أنا عارفه بالنسبة للبنزين.........بس قولت يمكن فيه حاجة أنا معرفهاش.
معتقدش أن فيه حد ممكن يحددلك عمر حساس أياً كان نوع الحساس حتى لو راكب على غسالة :)
الأسعار على حد علمي
الكرنك فى التوكيل كان فى حدود من 500 إلى 600
الأكسجين كان فى نفس الحدود لما غيرته.
السولونيد كان برة التوكيل فى حدود 400 أو 500 بالتركيب.
باقى الحساسات..........المطر و النور و الحرارة الخارجية معتقدش سمعت أن حد غيرهم قبل كده..........و معرفش أسعارهم.
فيه الريف أميتر rev أعرف عنه أنك لو واقف ودست آر بى إم ووصلت لحد أقصى معين الله أعلم كام فى ميجان عشان مجربتهاش بيفصل العربية نفسى أعرف أكتر عنه طيب لو ماشى بالعربية ممكن تفصل ؟ وليه بتفصل هل عشان الحرق عالى والموتور سخن جدا ومفيش هواء مقابل عشان التبريد وكدا ؟ وبالنسبة للعدادات ليه فى الآخر بيبقى آخر كام شرطة لونهم أحمر ريد زون هل دا معناه إن الآر بى إم لو وصل الحد دا خطر ؟ وخلينا إن عربية مفيهاش خاصية الفصل دى المحرك بتاعها يقفش لو زودتها معاه وإنت واقف بالإكسراتير ؟ طيب لو العربية سخنت وأنت ماشى على الطريق بتنبهك فى الشاشة ولا المؤشر بس بيزيد ولو زاد إيه اللى ممكن يحصل العربية تفصل نفسها ولا الموتور هيولع لو إنت ما وقفتش على فرض إنه واحد نسى مثلا والحرارة زايدة ومش واخد باله وإن العربية مش بتدى إنذار سخونية ؟ وإيه درجة الحرارة الطبيعية للميجان ؟ والحرارة دى بتقيس درجة حرارة المياه بتاع الرادياتير ولا درجة حرارة إيه بالظبط معتقدش إنها حرارة الموتور لأن الموتور الحرارة فيه عالية جدا
أيه يا عم حنفية أسئلة و أتفتحت ههههههههههههههههههههه
الريف ليمتير بيفصل عند أول الدخول فى المنطقة الحمراء فى عداد ال rpm
ليه بيبقى أخر كام شرطة أحمر علشان ده كده حمل عالى على الموتور مش هيستحمله كتير.......يعنى مش من مرة ولا 10 الموتور يبوظ بس بيأثر جامد على الموتور.
بتفصل ليه.......علشان عدد لفات المحرك دخل فى الحد الأقصى له.
لو عربية مفيهاش الخاصية دى و ده ينطبق على كل العربيات القديمة.....عادى الموتور هيفضل مكمل و مش هيفصل منك.
السخونية بتبقى على عداد الحرارة بس.........على الأقل على حد علمى.......بس ممكن لو دخلت فى الأحمر تكتب لك على الشاشة أو تنبهك بصوت........مش متأكد.
درجة الحرارة الطبيعية عند الشرطة التالتة بما فيهم الشرطة الأولى خالص من على الشمال.
حاول تخلى أسألتك فى نقط 1 2 3 أحسن علشان مفيش حاجة تقع فى النص.
كمية إلاوكسجين أو الهوا إلي داخل إنت إلي بتتحكم فيها عن طريق دواسة البنزين (هي دواسة هوا مش بنزين) باستثناء حالة ال ايدل ....حساس إلاوكسجين بيبعت إشارة لل ecu إذا كان الخليط محتاج إن البنزين يقل أو يزيد...ال ecu بيتحكم في البنزين مش في الهوا باستثناء حالة ال ايدل زي ما قلت في الاول....
.أما شراره الإشعال معدلها طبعاً بيزيد مع السرعة لكن سرعة إلشعلة نفسها ما فيهاش تحكم (أنا قصدي الوقت إلي بتحتاجه الشعلة لحدوثها ما بيتغيرش أما هي بتحصل كل أد إيه ف طبعاً بيزيد مع زيادة دورات إلمحرك)
شكراً على الإفادة..........
بص يا باشا.........
الزرار المدور اللى على اليمين..........هو متقسم 4 أقسام.......يمين و شمال و فوق و تحت
هتدوس على الشمال دوسة طويلة شوية (المكان اللى معمول عليه علامة موسيقى) بعد 4 أو 5 ثوانى هيفتحلك قايمة فيها 3 أو 4 خيارات بتختار منهم عن طريق الزرار المدور اللى على الشمال...فوق و تحت..........اللى فاكرهم منهم
1- news أو تفعيل الأخبار..........و دى بتبقى أخبار بتتكتب على الشاشة و القناة اللى أنت عليها هى اللى بتبثها............و معتقدش شغالة فى مصر برضه.
2- speed و دى اللى أحنا عاوزينها.........هتقف عليها و تختار رقم من 1 ل 5......كل لما الرقم كان أعلى كل لما الصوت هيعلى أكتر مع السرعة.
3- Aux و ده بتفعل منه الأكسيلري.........بتختار on او off.
للتذكير
حساس إضاءة الفوانيس موجود مع حساس المطر فى العلبة اللى ورا مراية التابلوه