الموضوع: لماذا العربيات موديلات 95 اغلى من 2004

سياسة سوق مش أكتر وبعدين معتقدش إن الأكسل تطلع فوق ال 32 والويرا دى لسة شايف موضوع هنا معروض عنها ب 45 ألف هى مش بتتحسب كدا بالظبط فيه عربيات 95 وأمكانياتها أعلى من عربيات زيرو 2012 وبعدين مينفعش تقارن عربية مستعملة ماركة معينة بعربية تانية ماركة تانية لأن السوق ليه رأى آخر يعنى مثلا واحد اشترى لانسر 2002 مكواة ب 60 ألف آه حالتها ممتازة وكمان بيقول دى لقطة أنا شايف إنها غالية جدا بالسعر دا أنا جبت ميجان 2007 ب 65 ألف وبالنسبة للانسر ال 2007 مش ال 2002 زى الفرق بين المرسيدس وال 128 القديمة دا من وجهة نظرى الكلام دا مش ع المستعمل فقط دا ع الجديد كمان الفيات لينيا عربية كانت نازلة بمحرك تربو 1400 سى سى وبيطلع 120 حصان وب 106 ألف زيرو وعربية روووووعة وبسعر ممتاز عربيات تانية يابانى اقل منها ولكن السعر حراااااااق

وجهة نظري لو العربية المستعملة حالتها كويسة وده موجود بس قليل
افضل من الجديد
يكفي الصاج بتاعها والبلاستيك اللي مصنوعة منه العربية من الداخل
بص على العربيات الجديدة هتلاقي كل ما بتتقدم سنة الصاج عمال يختفي
والبلاستيك اشبه بالورق وازاز الكشافات اشبه بالباغ
لسه شايف النهاردة العربية الصني الجديدة جالي ذهول من الارف اللي شايفه
طبعا في ماركات لسه محفظة على جودة صناعتها وهي العربيات اللي خارج المنافسة
زي الالماني بجميع انواعه والسكودا الرائعة
فلما افكر اغير عربيتي هجيب ياباني قديم او الماني قديم او الجديد الماني فقط
ومعرفش حتى الان اذا كانت الصناعة بقت كده عامة بسبب عصر العولمة اللي احنا فيه
ولا السوق المصري هو اللي بينزله الحاجات دي
لان لو بصينا لباقي الاسواق المصرية بخلاف السيارات هنلاقي برضه ان في ماركات بقت تنزل حاجات زبالة

المشاركة الأصلية كتبت بواسطة khalid_adel

بص هو للاسف كله بقى كده
يعني بدل الجلد اللي مغطي التابلوه كله استبدلوه بالبلاستيك ليييه عشان تخفيض التكلفه بالدرجه الاولي
حتي في البي ام مثلا الفئه الاولي والتالته كده لكن في اعلى فئة فيهم (توب لاين مثلا) حتلاقيه جلد داكوتا امريكي حاجه تحفه
وطبعا العربيات المتوسطه اللي بنشوفها كلها بلاستيك جميل وكله عشان سياسه التوفير العالمية
اما الصاج فده بقي عندهم حق هما بيخففو في الصاج عشان ميبقاش حمل ووزن على العربيه ويقلل الاداء ومقاومه الهوا عشان كده بيستخدمو اجزاء كتير خارجيه خفيفه او بلاستيك عشان يعرفو يظبطولها مقاومه الهواء وكده
وكمان هما اهتمو بالكابينه والركاب وده اهم حاجه عندهم الركاب مش ان العربيه تتفشفش من بره :)

كلام جميل بس انا بحس بشمئزاز لما بشوف التابلوه البلاستيك ده
والزراير بتاعة التابلوه اللي عباره عن باغ ولا بلاستيك زبالة مش عارف
بس منظره سئ فعلا وغير عملي غير دراعات الاشارات وكل حاجه بالعربية
وللاسف الموضوع انتشر وطال كل الياباني حتى اللانسر والنيسان
وكلامي مش عالصاج بس حتى الكشافات شكلها اصلا سئ بجوار انها بقت باللمس
طبعا ده كله ومش بتكلم على الصيني
لانه حاجه لا تتوصف فعلا رداءة تقفيل غير مسبوقة
عدت على معرض قولت اتفرج واشوف الناس اللي بتقولك متكلمش على الصيني وحش وخلاص
لقيت حاجه لا تصدق عربية جديدة وتقفيلها مش مظبوط الباب مش عايز يتقفل
والشنطة تتقفل بالعافية والاقي في فروقات ما بين البلاستيك وبعضه
وواحد قريبي شغال معاهم قالي حاجه ومش عايز ااقولها لان الناس مش هتصدق
بس في النهاية انا عارف ان الشركات دي مش زي شركات الاتصالات عندنا مثلا تبيعلك الحاجه ام قرش ب100 جنيه لا هما بيعملوا كده عشان ينزلك في الاخر عربية بقيمة 10 الاف دولار معقوله في عربية بالسعر ده تصوروا بقى هما عملوا ايه عشان يوصولها للسعر ده وهو سعر تنافسي يخضع لقوانين العولمة

اعتقد سياسة سوق ومدى انتشار الماركة وقطع غيارها حتى لو الماركة دى مش كويسه
يعنى اللى بيشترى اكسيل او اكسنت بيرتاح بعد كده فى قطع الغيار واى نوع بنزين واهى بتمشى
وحتى اللى بيشترى النترا 2012 هو واثق انها كام سنه وقطع غيارها هتكون مترميه ورخيصة
انما اللى معاه اوبل فكترا 97 قطع غيارها غاليه مع ان العربيه محترمة جدا وشكلها مازال حتى الان ملفت للنظر وجميل
لكن معظم الناس بتفكر فى قطع الغيار والصيانه قبل شرا العربيه والاهتمام بماركتها
يعنى الفيرنا واللانوس مستعملين بنفس تمن الميجان 2005 ...تصدق دى!!!!
عشان الاشاعات فبلدنا بتتنقل اسرع من الهوا