الموضوع: بعد تفكير عميق بفكر في الماروتي كمرحلة انتقالية ، أرجو ان تشاركوني الرأي

الاخت الفاضله
اولا انا لست من مالكى السيارات ولكنى احاول ان اكون والله المعين بالنسبة للماروتى للبنات كويسه خاصة لو انتى مش بتسافرى العربيه دى جميله للبنات لانها صغيره وكمان هاتش باك يعنى كانك انتى اللى ماشيه على الارض وهتبقى حاسه بابعادها اكتر من اى عربيه سيدان وبالنسبه لانك هتجيبى مستعمل كاش وكمان موديل 2006 اعتقد انك تحاولى تكملى الفرق وتجيبى جديد لان الفرق فى الحاله دى هيكون مش كبير ودا هيبقى افضل من موضوع القسط اللى انا خايف جدا ادخل فيه وعشان كده مش قادر اجيب عربيه لان التزمات البنك رخمه وغير مطمئنه دا كمان زائد المصاريف اللى بتطلع فجاءة خاصة بعد العقد وقبل الاستلام والله اعلم برده ممكن اللى جاب تقسيط يفيدك
كمان انتى اكتر واحده ممكن تحددى العربيه اللى تنسبك يعنى هى ليكى لوحدك ولا للعيله والعيله دى كبيره ولا لا الاحجام اللى ممكن تركب معاكى على طول خفيفه ولا تقيله لان دا كله اعتقد بياثر على عمر العربيه والماروتى تقريبا حمولتها حوالى 400 كيلو وهى اربع افراد وممكن طبعا 5 لو الاحجام صغيره اما بالنسبه للالتو هى عربيه جميله وفى منها ال 800 فاضيه ب 43 هى بصراحه شكلها احلى من الماروتى كتير وكمان الصالون بتعها غير الماروتى خالص التابلوه جميل والاوبشن اللى فيه اكتر من الماروتى بكتير وهى كمان ماتورها اكتر انا كنت قريت هنا فى المنتدى انها 16 صباب وكمان انها انشجكشن يعنى ممكن تستهلك اقل من الماروتى كمان
بجد موضوع الشراء دا بقا محير اوى

أشكرك جدا على المشاركة
أنا فعلاً محتارة جداً ، طول عمري باعتبر العربية طفل مدلل رخم وطلباته أهم شئء وعمري ما كنت بفكر فيها، لكن بعد الشغل مع الحضانات والمدارس والمشاوير الزايدة مع أطفالي الصغار بتجبرني على التفكير في سيارة.
طيب أنا لو جبت ألتو 800 cc مكيفة حتى لو قسط حتكون كويسة واللا إيه محتارة جداً وبخاف من المستعمل والماروتي مش طموحي عشان أجيبها قسط وبعد كدة أبيعها واخسر فيها. . . أرجوا المشاركة أنا عارفة إني تعباكو معايا

أنصحك ممكن تخدى حد معاكى يكون ميكانيكى أفضل ويشفلك عربية ماروتى نظيفة وتكون فابريكة فى حدود 25 :28 ألف وهتكون موديل قريب سنتين أو ثلاتة بالكتير
وهتكون كويسة جدا ليكى كبداية وممكن جدا تحبيها وتفضل معاكى فترة كبيرة لسهولة صيانتها ورخص قطع الغيار .

انا هاحكى لك عن تجربة واقعيه لمدة سمة مع المارتى
انا جايبها لمراتى من شهر 6 السنة اللى فاتت يعنى بقالها معاها سنة لحد الان
ماشية بيها 35 الف كيلوا لحد الان
بتعمل صيانه فى التوكيل كل 5 الاف كيلو
ما احتاجتش قطع غيار تذكر لحد الان
رحنا بيها حوالى 6 مرات لحد الان مشاوير طويلة بين شرم والساحل الشمالى ومطروح والغردقة وكانت بسم الله ما شاء الله فوريرة اولا فى سرعتها لدرجه انها بتقفل عددها بسهولة يعنى 150 كيلوا فى الساعه دى نمرة واحد نمرة اتنين استهلاك بنزين لا يزكر انا فاكر ان احنا رحنا بيها مطروح ب 18 لتر تخيلى 18 لتر فقط
المهم هى واسعه من جوه اوى عكس منظرها من برة
انا بيتهيئلى ودى عن تجربة تشتريها زيروا وسيبك من الالتوا قطع غيارها غالية وطيانتها مكلفة
اما عن موضوع التكييف انا سألت عن التكييف بتاعها قالوا لى بيتكلف 3 الاف جنية بس مراتى مش بتحب التكييف لانها بتتعب منه ف ما ركبنهوش لحد الان
انا كل اللى عملته فيها انى حطيت لها اول ما جبنها سائل لحام الاطارات فى الاربع كاوتشات علشان ما تضطرش تغير اى فرد فى ظروف الشوارع الان
اه انا نسيت اقولك ان احنا جايبنها زيروا يعنى هى موديل 2007 وماشية بيها 35 الف الحمد لله بلا مشاكل غير مركز خدمة ابو رواش ما ترحهوش ابدا مش بيفهموا حاجه وكانوا هيدبسونى فى 1500 جنية على الفاضى روحى بتاع الدقى او الهايكستيب ناس محترمين وفاهمين بيعملوا ايه
اتمنى لك قيادة ممتعه فى شوارع المحروسة

اختيار صعب فعلا
لو فيه امكانيه انك تقسطي الباقي و ما يبقاش في ضغط مصاريف عليكي يبقي توكلي علي الله و هاتي الزيرو و مش حتندمي
انما لو حتضغطي علي نفسك و انت يدوب جايبه العربيه تتعلمي عليها و في خلال سنه او اتنين حتبيعيها و تكبر يبقي هاتي الماروتي.
انا لو مكانك حجيب عربيه مستعمله اخبط فيها شويه و كمان سنه ولا اتنين يكون ربنا كرمني اجيب عربيه اكبر.