تسافر على خير يا باشا ..
انا زيك بالظبط كان معايا صنى 2010 مانيوال وجالى سفر شغل فى 2/2012
طبعا فكرة البيع دى شلتها من دماغى بتاتا للاسباب التالية:
1. العربية قسط وحظر بيع تبع البنك ولو هابيع لازم اكيش الباقى كله وكان وقتها حاجة وستين الف ج وطبعا ماكانش فى سيولة معايا
2. فكرت لما انزل انا او اخويا (مسافر برضه) اجازة شهر فى السنة هانعمل ايه ونتحرك ازاى خاصة ان سفرى كتير ومشاويرى لا غنى عن العربية فيها واقل ايجار عربية لامؤاخذة ما تسواش بيكون 3500-5000 ج فى الشهر !!!
3. ارتباطى بالعربية شديد لأنى ليا معاها ذكريات جميلة من اول الزيرو وانقذت حياتى اكتر من مرة وماعنديش ثقة فى عربيات تانية كتير فى نفس الفئة
فطبعا اخذت القرار وما بيعتش وبادفع قسطها كل شهر وخلاص ..

بس كل اللى عملته فيها قبل سفرى الاتى بعد مراجعة الوكيل:
1. شوف جراج يكون خاص ومعزول كويس من الرطوبة تركنها فيه
2. غسيل العربية بالكامل من جوة وبرة ومن تحت خاصة وازالة اى عوالق او اتربة بالعفشة مع رشها بمادة عازلة زى الجاز وغيرها فى اى مغسلة
3. فصل كابلات بطارية العربية فقط لو جافة وازالتها وافراغها لو كانت سايلة
4. عدم ترك اكتر من ربع تانك البنزين مليان
5. تكملة الزيوت والسوائل بالكامل
6. اضافة طبقة شمعية على بودى العربية للحفاظ على البوية
7. تزويد ضغط العجلات على 40 او اكتر طول فترة الركن واعادة ضبطه عند الاستعمال
8. هات 4 قطع خشب من اى تاجر خشب خام مقاسات 5*30*50 سم وارفع العربية بالكوريك وحط كل قطعة تحت كل عجلة
9. لعدم وجود روائح داخل الصالون حط فى الكونصول زيت معطر او خل مع فتح الهوايات لعدم كتمة العربية
10. من الممكن اضافيا تجيب علبة شحم وتحط منها على الاجزاء الكاوتش فى العفشة والاجزاء المعدنية فى الموتور (مش ضرورى اوى)

تروح وترجع بالسلامة يا زعيم ..