نظام المرور في مصر .. و تعليقاتي ...
الاول احب اقول .. النهارده رحنا المنيا انا و الوالد بالعربيه ...و تعليقاتي بقي علي النظام عامه .. طول مانا ماشي جاي في دماغي السواقه الاوروبيه و النظام الجديد المزمع تطبيقه .. و احب اذكر تعليقاتي :
1-الشعب معظمه فعلاُ بيقل ذكائه 80% ان تم وضعه خلف عجله القياده ... حقيقه ..
انا النهارده شفت حاجات لو بره كانو عدموا السواقين دي ..
سواق ماشي مخالف في الفرده السريعه من الطريق (fast lane) و ماشي فيها مخالف !
سواق نقل .. مسنطر العازل الحديد في نص عربيته .. و البيه بيجري اسرع من اي عربيه شفتها ! .. و حاتط الفاصل الحديدي اللي زارعينه بين الخطوط ده في نص العربيه !
2-الشعب اللي مش محطوط خلف عجله القياده ماعندوش ذكاء اساساً ...
بيقولك : ممنوع استخدام اله التنبيه الا في حاله ازاله عائق .. لاء البنج جه فعلاُ مستحيل تطبيقه .. او بمعني اصح .. لو عاوزين يطبقوه .. يبقوا يلغوا العقوبه بتاعه الحبس في حاله القتل الخطاء اثناء القياده .....(بجد!)
3-الطرق فعلاُ لا تصلح للاستخدام الادمي نهائياُ ...
المطبات تم وضعها علشان تعدم العربيات مش علشان تهدئه السرعه ..
مطبات جميع الاشكال و الالوان .. و الله شفت مطبات ممكن تركب عربيتك فوقيها .. و شفت مطبات من البلاستيك دي برضه .. و شفت بقي حته مطب (شفت منه بتاع 3) محطوطين عند كمين شرطه .. والله العربيات الميكروباص و العربيات العاليه بتخبط فيه و هيا معديه عليه ! .. بيجيب عتب الربع نقل ! .. تخيلو!
و ايه بقي .. الكمين حاطين عنده اكتر من 3 او 4 مطبات ! .. هم قاصدين يبوطوا عفش العربيات لعلمكم ! ... يبقي ازاي يجي و يقول فحص شامل و تشديد في الفحص ؟؟
كمان حاجه .. الطريق الزراعي بيعدي علي مراكز المنيا .. و مراكز المنيا موبؤه بالتوكتوك .. و الطريق الزراعي اصلاً ضيق ..و تخيل بقي طريق فردتين (فرده رايح و فرده جاي) .. و موبؤ بالتوكتوك كمان ! .. طب يعملوا طريق دائري مثلاُ .. او يلغوا التكاتك دي خالص !
4-معدات الحكومه مالهاش لزمه .. الشعب لا يعمل نهائياُ بحاجه اسمها اشارات ضوئيه مروريه ... بتلاقي الناس في الاحمر و في الاخضر و الاصفر كمان بتكسر الاشاره ! ..
5- المرور نفسه :
يا سلاام بقي ... معديين علي كمين .. بعد ما عدينا الكمين .. فكروا يوقفونا .. بعد ما عدينا خلاص ! .. قلت للمعلم .. استني يا عم نشوفهم عاوزين ايه .. جه واحد امين شرطه قال : رخصك ...قاله اتفضل .. راح وراها للظابط و رجع بيقول : خد رخصك يا باشا .. ايه هوه ده ؟ المفروض يوقف العربيه في اشتباه ... لو شاف عربيه مريبه . لو شاف عربيه مش و لا بد .. او لو شاف عربيه غير صالحه للسير .. انما ده .. بعد ما عدينا .. لقط النمره غريبه (بني سويف) .. قال ياريتني كنت وقفته .. طب استني انده عليه اشوفه هايقف ولا لاء !! ...
ملاحظ غياب اي نوع من الحواجز و العلامات علي طريق الصعيد الزراعي .. و ان وجدت ... بتبقي غير ظاهره و مش مظبوطه اصلاً مع اللي هاتشوفه في الطريق ..
المشكله بقي .. انك لازم تمشي زيهم علشان تعرف تمشي !
قال و في الاخر .. عاوزين يطبقوا القانون الجديد بتاع المرور .. مرور ايه ده اللي هاينفع يطبقووه .. دول هايسجنوا الشعب كله !
ايه الحلول طيب ؟ مش عارف الصراحه ... اعتقد انهم الاول يشيلو اي مطب صناعي ... بعد كده .. يشددوا اجراءات استخراج الرخص .. اسوه بالاسلوب الاجنبي ... بعد كده ... يظبطوا البلد شويه ... ارشادات و حواجز و بتاع ...
انما يعدل من السواق القديم ده انسي !
تحياتي لسواقين مصر ...