ولله الحمد صحيت من النوم النهاردة قومت طلعت على مركز خدمة ابو رواش اللى دايما بتعامل معاه .. وصلت 8 ص بالدقيقة بس مكنتش حاجز لا موضوع المية حصل فجأة ومكنش فيه فرصة احجز ده غير ان كل تليفوناتهم مش بترد حسبى الله ونعم الوكيل فيهم طل النهار امبارح بتصل بيهم عشان اسأل القربة موجودة ولا لأ عشان مخبطش المشوار على الفاضى ومش بيردو نهائيا نهائيا!
المهم دخلت وكانت المفاجأة على البوابة ان مفيش دخول من غير حجز لان الوقت ضيق فى رمضان والنهاردة الدنيا زحمة (على عكس ما توقعت تمام ان النهاردة يوم معظم الناس فى شغلها وكمان رمضان والجو حر مين هيروح ابورواش؟) .. الاهم قاللى اركن برة وادخل الاستقبال اشرحله مشكلتك ولو حاجة متستناش ممكن يقدر موقفك ويدخلك .. دخلت على الاستقبال حكيتله فى السريع قاللى لو قدرنا ندخلت مش هنشتغل فيها النهاردة لازم تبات وتاخدها بكرة (قال ايه ده ان قدر يدخلنى قال يعنى داخل باب الجنه يا خى .. لولا انا صايم!!) .. قولتله مينفعش هروح ازاى واستغنى عن العربية ازاى قالى بس شوف القربة موجودة ولا لأ الأول بعدين نتكلم .. روحت أسأل وكانت المفاجأة المريرة ان القربة مش موجودة هههههههههه انا انتابتنى حالة من الذهول يعنى انا خدت اجازة طارئة وجيت المشوار ده كله عالفاضى ولسه العربية هتفضل فى خطر عشان خاطر سفالة وقلة ادب وعدم توافر قطع غيار ابو الفتوح!!!! بس سريعا ما لحقنى الموظف الله يكرمه وقالى بس موجودة فى المركز بتاع الكيلو 32 اللى جنبنا هنا ووصفلى السكة اروح ازاى .. خرجت على موظف الاستقبال قالى اه خلاص اطلع على هناك ده هناك رايق وادخل من غير حجز وفلة.
جيت على المركز التانى بس طريقه غريب اوى اوى اوى مطبات ومدقات ومصانع وشركات ومفيش اى حاجة تدل على اسبرنزا فى السكة خالص .. اللى ضحكنى وسط الهم ده والشحططة ان جيت عند مصنع قولت أسأل لاكون مشيت فى سكة غلط لسه بقول سلام عليكم لقيت الراجل بيقولى بعد السور شمال هههههههههه واضح ان الراجل متعود على السؤال ده.
المهم وصلت دخلت ركنت ودخلت على الاستقبال وكانت المفاجأة ان الاستقبال بيقولى مش هتدخل لازم حجز مش فاهم ايه موضوع الحجز ده .. بدأت افهمه بالراحة مشكلتى وانها مينفعش تستنى قالى سيبنى شوية وهحاول هشوف هينفع ولا لأ ادخلك .. انا قفشت فجأة وقولتله لازم ادخل انا مشكلتى مينفعش استنى عليها لقيته بيقولى لو سمحت حضرتك متلزمنيش بحاجة .. فأنا جبت ورا شوية لما حسيت انه عايز يساعدنى وقومت راغى وحاكى الحوار وانا روحت ابو رواش ويك ويك ويك ورغيت الحوار لقيته بيعايرنى وبيقولى اذا كان مركز الخدمة اللى بتتعامل معاه اتخلى عنك قولتلو يعنى ايه مش انتوا وهما ابو الفتوح يعنى واحد يعنى هتفرق يه وايه الكلام ده .. ماعلينا استنيت فى الريسيبشن شوية وقومت قولت أسأل على دراع تانك البنزين لقيته بيقولى حتى لو موجود مش هنركبه انا دخلتك بالعافية عشان القربة ودى المهمة قولتله طيب اشتريه حتى واخليه لبعد العيد وابقى اجى اركبه فقالى زى ماتحب تقدر تشتريه من المخزن وتخليه معاك.
دخلت المخزن ٍسألت على الآتى:
1. قربة مية: موجودة وسعرها 170 والغطاء 20 جم
2. دراع التانك: موجود وسعره حوالى 30 جم
3. ماستر دبرياج علوى: مش موجود
قولتله اقدر اشترى الدراع دلوقتى قالى زى ماتحب قولتله بس انا هقعد مع المهندس ولو وافق يركبه هيبقى ايه الوضع لانهم برة قالولى لأ مش هنركبه مفيش وقت فقالى لأ يبقى استنى عشان المصنعيات والكلام ده لو هيركب ولو مركبش ابقى عدى عليا خده لما تخلص قولت اوك.
سلمت العربية وبعدها قعدت مع مهندس الاستقبال وشرحتله موضوع المية بس ان الحرارة مزادتش هى بس المية اللى نقصت .. قالى هنكشف على الدورة ولو القربة محتاجة تتغير هيبقى غالبا القربة على الضمان والغطاء هدفع انا تمنه قولتله اوك .. طيب وبالنسبة يا بشمهندس للدراع وبحنية كده وتوسل بصتله قالى عينينا بس المشكلة انه مش موجود قولتله لألألألألألألألأ انا سألت عليه فى قطع الغيار لقيته موجود قالى خلاص هركبهولك وحطه فى امر الشغل مشكورا.
ان شاء الله هستلم الساعة 12 ظهرا .. بالليل لما ارجع على خير باذن الله وافوق من المشوار هبقى اقولكم ايه اللى تم بالظبط