لمبة تنبيه ارتفاع الحرارة بتشتغل مع تدوير العربية ايه رأيكم؟
السلام عليكم ورحمة الله وبركاته نشوف الصورة الاول بعدين نتكلم علما بأن الصورة متاخدة وانا مدور الكهربا بس واللمبات كلها كانت منورة عشان بتعمل check فى البداية (دى الطريقة اللى قدرت القط بيها اللمبة منورة عشان اوريها ليكم لان لما قررت القط صورة واحطها فى موضوع طبعا بطلت تنور وتغيظنى). على فكرة المؤشر مش معدى 90 درجة ولا حاجة كل الموضوع انى واخد الكادر من تحت جايب الكام من تحت العداد فتحس ان المؤشر معدى ال 90 لكن فى الحقيقة هو على الطبيعى. http://i47.tinypic.com/1r3zh3.png وانا رايح الشغل الصبح بدور العربية لقيت اللمبة دى نورت احمر؟؟ انا معرفش دى لمبة ايه قومت مبطل ومدور تانى منورتش قومت مبطل ومدور تالت اشتغلت نص دقيقة وطفت شكيت فى قربة المية على اعتبار ان شكل اللمبة بيقول ان فيه مشكلة فى المية فتحت الكبوت القربة مستواها طبيعى على علامة الماكس ومفيش اى اثار لتسريب مية او اى حاجة والعربية مش متبرجلة ولا تعبانة بالعكس امبارح كنت حاسسها فايقة وبتجرى اوى (يمكن انا اللى حسدتها!). روحت الشغل وخلصت ونزلت بدور بردو نورت وطفت بعد نص دقيقة وروحت بعدها كام مشوار وبطلت ودورت اكتر من مرتين منورتش من ساعتها اول ما جيت البيت فتحت الكتالوج لقيته بيقول ان اللمبة دى تحذير من ارتفاع درجة الحرارة؟؟!!؟؟ علامات تعجب واستفهام كتيرة حوالين كده ازاى حرارة مرتفعة وانا لسه مدور العربية وبقالها فترة باردة واساسا انا مشيت بيها شوية بعد الشغل فى عز الولعة والحرارة مزادتش عن ال 90 درجة فى المؤشر ولا العربية بان عليها حاجة ولا حتى حرارتها بتعلى بمعدل سريع تفتكروا يا جماعة ده يطلع ايه؟ هل الكمبيوتر مخرف مثلا ولا ايه انا مش فاهم؟ ارجو الافادة تحياتى لكم وكل سنة وانتم طيبين