ساعدوني أرجوكم - خايف يكون بيتنصب عليا من الطارق في فانتازيا 2013

سلام عليكم ورحمة الله وبركاته

الحمد لله لسة جايب سكودا اوكتافيا فانتازيا 2013 من الطارق ولسة حتي مارخصتهاش .. بس فيه مشكلة عندي في العربية ومحتاج من اللي عنده خبرة فيها إنه يفيدني .. وخاصة اللي بيتعامل مع الطارق للسيارات علشان أنا جايبها من عندهم

دلوقتي العربية بعد ماجبتها اكتشفت إن ولاعة السجاير جسمها موجود لكن من جوة فاضية الجزء اللي بيولع السجاير .. رحت للطارق قالي هاتهالي نغيرهالك .. أخدوها .. وبعدين كلمني قالي لا يافندم مش هينفع نغيرهالك لأن الفانتازيا أساساً عربية صديقة للبيئة هي و العربيات الألماني كلها ومابيعملوش فيها ولاعة سجاير و اللي عايزها بيشتريها .. قلتله إزاي يعني؟ أمال عملوها إزاي من اساسها في العربية؟؟؟!! .. قالي هو كدة! .. وبصراحة أنا شاكك وخايف ليكونوا بينصبوا عليا!

الحاجة التانية .. وأنا بستلم العربية .. قلتله فين كتاب الضمان .. قالي لا يافندم ده مش من عندنا حضرتك تكلم الوكيل أرتوك أوتو وتسألهم تستلمه منين لأنه مش من عندنا .. قلتله طيب نجرب ( رغم اللي أعرفه المفروض بنستلمها مع الشراء سواء من الوكيل أو الموزع ) - وده شككني فيهم أكتر ومخليني خايف من إنهم يكونوا ناصبين عليا!
المهم .. كلمت الوكيل وقلتلهم .. قالولي لأ طبعاً حضرتك بتستلم الضمان مع العربية من الموزع عادي جدًا مع شراء السيارة واحنا مالناش علاقة بالموضوع!!!!

كلمت الطارق تاني وقلتلهم قالولي خلاص .. ممكن حضرتك بعد ماترخص العربية تجيبلنا صورة الرخصة ونشوف ساعتها ممكن نعمل إيه في موضوع الضمان!!

وكمان ولقيت إن إستبن العربية مش الجنط السبور زي باقي عجل العربية وانه جنط عادي ( علماً بأن الجنوط سبور 16 ) .. ولما سألته قالي هي المصري كدة!!

وبصراحة بناءًا علي اللعب اللي بيعملوه معايا ده واللي مش عارف ده إيه بالظبط .. نصبة ولا إيه نظامه .. خلوني أشك كمان في موضوع جنط الإستبن ده!

فأرجوكم أرجوكم أرجوكم .. حد يفيدني ويطمني ويقولي هو ده طبيعي اللي بيحصل ده؟ ولا أنا بيتنصب عليا؟ و أشيروني وقولولي أتصرف إزاي معاهم؟؟

شكرًا جزيلاً لكم!

انا ماليش خبرة بس شامم ريحة مش عجبانى
وانا متابع رد الاعضاء يفيدوك اكتر منى

تقريبا كدا والله اعلم حضرتك اشتريت عربية محروقة فاهم حضرتك يعنى ايه محروقة يعنى واحد سحبها من البنك بالتقسيط وباعها للمعرض اللى حضرتك اشتريت منه فنصيحة بلاش ترخص العربية هما طلبوا من انك ترخص العربية وبعدين يقوللك امك فى العش ولا طارت يبقى انا لازم تاخد ضدد الناصبين دولا الاجرائات القانونية اللازمة وياريت متسكتش عن حقك ربنا يرحمنا ويحفظنا من النصابين....*

انا شاريها بقالي شهر اقولك بقي:
١. الولاعه موجوده بس هما جابوهالي بعد كام يوم
٢. الضمان فعلا بيجي من المعرض بعد ما تديهم صوره الرخصه و البطاقه و تملي بياناتك في المعرض و هم بيجوبولك الضمان بعد اسبوع
٣. الستبن فعلا مش جنط

اقتباس:

---

المشاركة الأصلية كتبت بواسطة ahmedpole

انا شاريها بقالي شهر اقولك بقي:
١. الولاعه موجوده بس هما جابوهالي بعد كام يوم
٢. الضمان فعلا بيجي من المعرض بعد ما تديهم صوره الرخصه و البطاقه و تملي بياناتك في المعرض و هم بيجوبولك الضمان بعد اسبوع
٣. الستبن فعلا مش جنط

---

ياباشا ربنا يكرمك علي الرد .. طمنتني بالنسبة للضمان والجنط .. بس سؤال بالبنسبة للولاعة
يعني هي كانت برده مش موجودة وانت اديتهالهم وهما جابوهالك؟ و لا إيه كانت القصة؟ .. وتفتكر طيب أقولهم إيه؟ بعد الكلام اللي قالهولي إنها صديقة للبيئة و الكلام اللي مالوش لازمة ده وطلع أصلاً غلط؟!!

وألف شكر مرة تانية

اقتباس:

---

المشاركة الأصلية كتبت بواسطة sakr1964

تقريبا كدا والله اعلم حضرتك اشتريت عربية محروقة فاهم حضرتك يعنى ايه محروقة يعنى واحد سحبها من البنك بالتقسيط وباعها للمعرض اللى حضرتك اشتريت منه فنصيحة بلاش ترخص العربية هما طلبوا من انك ترخص العربية وبعدين يقوللك امك فى العش ولا طارت يبقى انا لازم تاخد ضدد الناصبين دولا الاجرائات القانونية اللازمة وياريت متسكتش عن حقك ربنا يرحمنا ويحفظنا من النصابين....*

---

ربنا يستر يااااااااااااارب .. لحسن أنا قلبي محروق عليها بصراحة .. وربنا يكفينا شر النصب والنصابين .. ويارب إن شاء الله مايكونش فيها نصب ..
عامة العربية عدادها مش عامل غير 23 كيلو بس .. فما اعتقدش إنها كانت متباعة قبل كدة .. وربنا يستر
وتفتكر لو كلمت الوكيل وسألته يقدر يقولي إذا كانت إتباعت قبل كدة ولا لأ برقم الشاسيه؟

وألف شكر ياباشا

اقتباس:

---

المشاركة الأصلية كتبت بواسطة wael61

انا ماليش خبرة بس شامم ريحة مش عجبانى
وانا متابع رد الاعضاء يفيدوك اكتر منى

---

ربنا يسرتها يارب إن شاء الله

السيارة فيها ولاعة طبعا
الضمان اخذته بعد الترخيص بعدة ايام
بالنسبة للجنط مش عارف لان سيارتي اول فئة اتو بدون جنوط
ارجو ان اكون افدت حضرتك

اقتباس:

---

المشاركة الأصلية كتبت بواسطة ayoob

السيارة فيها ولاعة طبعا
الضمان اخذته بعد الترخيص بعدة ايام
بالنسبة للجنط مش عارف لان سيارتي اول فئة اتو بدون جنوط
ارجو ان اكون افدت حضرتك

---

أفدتني وطمنتني طبعاً يافندم .. شكرًا جزيلاً لحضرتك

بس المشكلة عندي دلوقتي إني مش عارف اعمل إيه معاهم في موضوع الولاعة ده!!

اولا ربنا يباركلك...
ثانيا كل كلمهم صح ما عدا موضوع الولاعه لازم تبقى موجوده بالعربيه....
اما تعمل ايه سهله وبسيطه...لاما الولاعه لتسحب فلوسك وتروح لموزع تانى وانصح بالمصريه انا اشتريت عربيتى من هناك 2012 ..

ممكن تعمل مشوارين تلاتة للتوكيل،وكأنك هتشتري، وكام معرض كبير زي أوتوسمير ريان مثلا، المسعود، غيره وغيره وتشوف الأسعار والتجهيزات وموضوع الكتالوج والولاعة الغريبة دي بتاعت أصدقاء البيئة!!!!!! بصراحة كلام جديد وغريب!!!! المهم حضرتك تتأكد وتطمئن ولو الموضوع فيه لعب عليك وعلى حماية المستهلك طوالي ومترخصش ولا تعمل فيها حاجة، ولن يضيع حق وراء مطلب، وبإذن الله خير... الناس دي بتخلى الواحد عينه في وسط راسه

الولاعة موجودة طبعا وده كلام سوري في اللفظ قرطسة للزبون..بالنسبة للضمان طبعا من المعرض مش من أي حته تانية.بالنسبة للجنط أنا بصراحة معنديش فكرة لأن عربيتي أول فئة طاسات.

اقتباس:

---

المشاركة الأصلية كتبت بواسطة seaman

اولا ربنا يباركلك...
ثانيا كل كلمهم صح ما عدا موضوع الولاعه لازم تبقى موجوده بالعربيه....
اما تعمل ايه سهله وبسيطه...لاما الولاعه لتسحب فلوسك وتروح لموزع تانى وانصح بالمصريه انا اشتريت عربيتى من هناك 2012 ..

---

ربنا يباركلك يارب ياباشا ويكرمك ويعزك .. شكرًا جزيلاً
بالنسبة للولاعة كلمت الوكيل الحمد لله قالي إن العربية فعلاً نازلة من غير الولاعة ومكانها ده للشاحن .. فطمني الحمد لله .. هما بس معملتهم معايا اللي كانت مشككاني فيهم .. بس طلعت ظالمهم .. يلا الحمد لله علي كل حال .. المهم ربنا يسترها معانا إن شاء الله
وألف شكر مرة تانية :))

اقتباس:

---

المشاركة الأصلية كتبت بواسطة benmatar

ممكن تعمل مشوارين تلاتة للتوكيل،وكأنك هتشتري، وكام معرض كبير زي أوتوسمير ريان مثلا، المسعود، غيره وغيره وتشوف الأسعار والتجهيزات وموضوع الكتالوج والولاعة الغريبة دي بتاعت أصدقاء البيئة!!!!!! بصراحة كلام جديد وغريب!!!! المهم حضرتك تتأكد وتطمئن ولو الموضوع فيه لعب عليك وعلى حماية المستهلك طوالي ومترخصش ولا تعمل فيها حاجة، ولن يضيع حق وراء مطلب، وبإذن الله خير... الناس دي بتخلى الواحد عينه في وسط راسه

---

اقتباس:

---

المشاركة الأصلية كتبت بواسطة inspiron

الولاعة موجودة طبعا وده كلام سوري في اللفظ قرطسة للزبون..بالنسبة للضمان طبعا من المعرض مش من أي حته تانية.بالنسبة للجنط أنا بصراحة معنديش فكرة لأن عربيتي أول فئة طاسات.

---

ألف مليون شكر ليكم بجد علي الرد .. بالنسبة للتوكيل .. أنا فعلاً كلمته والحمد لله طمنوني وقالي إن الموديل ده الإليجانس نازل من غير ولاعة ومكانها ده علشان لو عايز تحط فيه شاحن للموبايل .. بصراحة طمنوني الحمد لله علي موضوع الولاعة والإستبن إن هي دي كدة الموديل بتاعها بينول إستبن طاسة ومن غير ولاعة .. وأنا فعلاً كنت ناوي لو كان فيه لعب في الموضوع أرجعهلهم و أكلم حماية المستهلك .. بس طلعت ظلمتهم للأسف ربنا يسامحني يارب ..
بس بصراحة هما اللي معاملتهم شككتني في كل حاجة وخاصة إن مافيش حاجة إتفقت معاهم عليها في اللون بتاع الفرش طلعت صح كنت طالب لون جابولي لون تاني رغم إنه قالي ماتقلقش ياباشا موجود وكله تمام إن شاء الله .. رحت أستلم لقيت لون تاني خالص وقالي اصلها دي آخر واحدة وكلام قعد يثبتني به وده أشيك وبتاع .. قلت خلاص ده اشيك فعلاً بس علشان بيتبهدل بسرعة فمكنتش عايزه الأول .. وبعدين كنا متفقين هستلم العربية مغسولة وفل الفل .. ولما رحت قالي بتتغسل .. وبعد شوية رحت أستلمها لقيتها مش نضيفة خالص من جوة ومن برة كانت متربة والنيكل اللي علي الكبوت مبقع و حالته صعبة من التراب .. قللتله إيه ده؟ مش قلت بتتغسل؟! قالي آه صحيح .. معلش ثواني وهتبقي زي الفل .. سكت وقلت أما شوف آخرتها .. جاب ولد بفوطة علشان ينضفها وفتحت العربية لقيتها من جوة كل حتة في المرايات مبصمة بصوابع وحالتها نيلة خالص .. قالي هننضفها .. وساعتها علشان والدي كان معايا مسكت نفسي واعصابي وقعد يهديني .. وعلشان للأسف إستلمت العربية بالليل فلما روحت البيت إكتشفت إن أرضية العربية فيها طفية سجاير كتير عند الكنبة اللي ورا والكراسي اللي قدام .. قلت حسبيّ الله ونعم الوكيل فيهم بجد .. وبعدها إكتشفت إن الولاعة مش موجودة .. فكانت القشة اللي قصمت ظهر البعير بقي .. قلت العربية أكيد فيها حاجة وعايزين يخلصوا منها والشك بدأ يراودني!! بس كله بسبب معاملتهم و أسلوبهم في الكلام والوعود الغير محققة بالمرة!

يلا الحمد لله رب العالمين إنها جت سليمة وعدت علي خير .. أهم حاجة ربنا يسترها معانا ويباركلنا فيها يارب إن شاء الله

وشكرًا ليكم مرة تانية علي الإهتمام :)

اقتباس:

---

المشاركة الأصلية كتبت بواسطة la_luz

أفدتني وطمنتني طبعاً يافندم .. شكرًا جزيلاً لحضرتك

بس المشكلة عندي دلوقتي إني مش عارف اعمل إيه معاهم في موضوع الولاعة ده!!

---

كلم أرتوك واسالهم -- وممكن تشوفها في أي معرض تاني وتتأكد -- روح معرض الرواد في محطة وطنية اتوستراد المعادي

بالنسبة للجنط انا معا بيجو جنوط والأستبن عادي مش جنط

الضمان ساعات بيتأخر ( بس هو المفروض يقوللك ) وممكن تكلم أرتوك وانت قاعد متسلبط قدامهم وصوتك عالي شوية علشان يلموا نفسهم شوية --- غالبا ما فيش مشكلة ان شاء الله بس مجرد أتيتود بتاع المبيعات -- مش غاوي يتعب نفسه -- هو باع العربية و خلاص

اقتباس:

---

المشاركة الأصلية كتبت بواسطة astra200

كلم أرتوك واسالهم -- وممكن تشوفها في أي معرض تاني وتتأكد -- روح معرض الرواد في محطة وطنية اتوستراد المعادي

بالنسبة للجنط انا معا بيجو جنوط والأستبن عادي مش جنط

الضمان ساعات بيتأخر ( بس هو المفروض يقوللك ) وممكن تكلم أرتوك وانت قاعد متسلبط قدامهم وصوتك عالي شوية علشان يلموا نفسهم شوية --- غالبا ما فيش مشكلة ان شاء الله بس مجرد أتيتود بتاع المبيعات -- مش غاوي يتعب نفسه -- هو باع العربية و خلاص

---

الف شكر .. وده اللي حصل فعلاً .. كلمت أرتوك أوتو وإتأكدت منهم وطلع إن فعلاً العربية من غير ولاعة .. وهما سايبين مكانها علشان لو عايز تحط شاحن للموبايل .. والإستبن نازل طاسة عادية مش جنط .. الحمد لله طمنوني .. وهو فعلاً تعاملهم معانا هو اللي خلاني أشك فيهم .. يلا الحمد الله ..
شكرًا جزيلاً :)))

سؤال محيرني
هو 2013 نزلت دلوقتي ازاي
دة انا السنه اللي فاتت استنيت 2012 و نزلت في اخر نوفمبر 2011

اقتباس:

---

المشاركة الأصلية كتبت بواسطة hany_f50

سؤال محيرني
هو 2013 نزلت دلوقتي ازاي
دة انا السنه اللي فاتت استنيت 2012 و نزلت في اخر نوفمبر 2011

---

لأ نزلت بقالها مدة كمان .. مش عارف من إمتي بالظبط بس بقالها شوية حلوين

اقتباس:

---

المشاركة الأصلية كتبت بواسطة hany_f50

سؤال محيرني
هو 2013 نزلت دلوقتي ازاي
دة انا السنه اللي فاتت استنيت 2012 و نزلت في اخر نوفمبر 2011

---

انت بتتعامل مع اذكي جهاز مخابرات في العالم أرتوك -- لو عايز ممكن ينزللك 2014 كمان

الفكرة ان 2013 حيتغير الشكل تماما -- زائد ان 2012 سعره كان عمال ينزل --- فقاللك أضرب عصفورين بحجر ننزل 2012 علي انه 2013 ونزود السعر ولما تيجي 2013 نبقي ننزل 2013 برضه بس الشكل الجديد ( وبرضه سعر جديد --- شوفت الذكاوة )

اقتباس:

---

المشاركة الأصلية كتبت بواسطة astra200

انت بتتعامل مع اذكي جهاز مخابرات في العالم أرتوك -- لو عايز ممكن ينزللك 2014 كمان

الفكرة ان 2013 حيتغير الشكل تماما -- زائد ان 2012 سعره كان عمال ينزل --- فقاللك أضرب عصفورين بحجر ننزل 2012 علي انه 2013 ونزود السعر ولما تيجي 2013 نبقي ننزل 2013 برضه بس الشكل الجديد ( وبرضه سعر جديد --- شوفت الذكاوة )

---

بس أعتقد إن الجديدة اللي هتنزل موديل تاني خالص غير الأوكتافيا .. إسمها رابيد .. شكلها و تصميمها مختلف عن الأوكتافيا .. و عامة موديل 2012 الأوكتافيا كان مختلف عن الأوكتافيا ال2013 الجديدة و أعتقد الإختلاف كان في الفوانيس بس .. زي الفرق بين موديل السيراتو 2011 و 2012 كان الفرق في إشارات المرايات الجانبية بس.

عامة إحنا في بلدنا دي .. كل حاجة جايز وممكن .. ربنا يسترها معانا كلنا يارب!

بص هو الطارق انا مش مستريحلهم لان حصل موقفين مع 2 اصحابى مع الطارق اللى فى العجوزة الموظفين حالنجية و بيعملوا شغل
واحد صاحبى جاب لوجان كاش من عندهم ادولوا المبايعة و خد العربية و مشى اول حاجة لاقى الكيلو متر مش شغال و ده معناة ان العربية مشيت كتير و قالولة على جواب المرور خلال اسبوع طلعو عينة عشان يدهولوا بعدين خدو فلوس اكرامية عشان ياخد الجواب بعد ما خد العربية و راح يرخص لاقى ان فى غلط فى رقم الموتور فى ورقة الافراج الجمركى اللى واخدها منهم و ان فى رقم موتور مكرر لعربيتين رجعلهم و قعد يزعق قالوا احنا بعنا العربية و ملناش دعوة دى غطلة الجمارك روح الجمارك و اتصرف معاهم المهم بعد محايلة هما ظبطوا الورق تانى بعد شهر من استلام العربية و صاحبى دفع 400 جنية اكراميات
الموقف التانى حد من زمايلنا اشتر كيا بيكانتو و العربية طلعت الرصيف و كسر مقص و عطلت المهم جبنا واحد صاحبنا كان شغال فى توكيل تويوتا و فاتح مركز صيانة كبير بص على العربية وقالنا ان العربية دى رشة جنب يمين ورا مع ان العربية جاية من الطارق زيرو
المهم كن حذر و ربينا بوفقك للخير ان شاء الله