السلام عليكم ورحمة الله وبركاتة
اتمنى تكونوا جميعاً بخير و سلام
انا كنت عاوز اتكلم فى موضوع عام شوية
وهو القيادة بشكل عام فى القاهرة , وما لها من خصائص تتفرد بها وحدها عن عواصم العالم اجمع
وهقول لحضراتكم بعض امثلة من خلال اللى بنشوفة
1 - مينفعش تمشى فى خط مستقيم لمدة طويلة فى اى مكان داخل القاهرة , لإنك لو حافظ طريقك هتاخد يمين عشان فى يو تيرن شمال عشان توسع لنفسك , وإلا هتتدبس فى الملف زى الجماعة اللى مش حافظين الطريق , او تاخد شمال عشان فى ملف مهم يمين , وهكذا
2 - مينفعش تلتفت يمين او شمال وانت سايق فى القاهرة , هتلاقى واحد طلع من شارع جانبى بسرعة البرق و اخد مكانك , او لا قدر الله خبط فيك
3 - الطرق السريعة اللى خارجة من القاهرة , تبص تلاقى ناس معينة بتجرى , وبتاخد يمين بدون داعى وشمال بدون داعى , مع ان مفيش عربيات , اعرف ان الناس دى من الجماعة اللى حافظة الطريق وبيفادى تعرجات اسفلتية , بؤر .. وخلافة ( طريق السويس , .... )
4 - القاهرة الجديدة , القيادة فيها ولا فى الاحلام , اتحدى ان اى حد يجيب لى شارع واحد سليم فيها !!! , مع انها جديدة والله , وهنا نرجع برضة للجماعة اللى حافظين الطريق , تلاقيهم بياخدوا يمين وشمال و هكذا , ( يوجد فى التجمع الاول شارع طويل مغرى للسرعة , وفى اخرة حفرة تقطم اى عربية بعرض الشارع على مستويات مختلفة )
5 - لا يوجد شئ اسمة نظام , سواء فى القاهرة او القاهرة الجديدة , كل شئ مباح , بشكل غريب , ( القاهرة الجديدة , اهم شارع فى التجمع الاول : الناس ماشية عكس واتوبيسات النقل العام و كلة طابور ومش عاجبهم كمان و بيقلبو نور عالى , لأختصار المسافة ليس اكثر !!! ), دول طبعا وللأسف حافظين الطريق
6 - فى الدول المتقدمة , من الوارد ان تحفظ الطريق , او تساعدك الخريطة عن طريق النظام الملاحى , اما فى القاهرة , فيجب عليك حفظ الطريق , ويجب عليك ايضاً حفظ اماكن البلاعات و الحفر و فواصل الكبارى و المطبات طبعا ( المطبات ليها قصة لوحدها )
7 - توضع المطبات لتهدئة السرعة , فى بعض الاماكن ( امام المدارس , ... ) , ولكن ان توضع المطبات فى اى مكان وفى اى وقت , شئ غريب , ( لية دايما بتلاقى الناس بتروح ناحية معينة من المطب , يمين او شمال المطب و تاخد المطب من الناحية دى , دول الجماعة اللى حافظين الطريق
8 - حاول بقى تحفظ الطريق وتنضم للناس اللى حافظة الطريق , معرفة اسماء الشوارع و الميادين ليس بحفظ للطريق , حفظ الطريق هو حفظ ما سبق مضاف إلية ... البلاعات , المطبات , الفواصل , الحواجز , الحفر , بنزينة يمين , يو تيرن شمال .... إلخ
9 - متحاولش تحفظ الطريق كلة مرة واحدة عشان متفقدش تركيزك اثناء الطريق , اول مرة ركز على المطبات , تانى مرة على البلاعات , تالت مرة على الحفر ,,, وهكذا .. إلى ان تحفظ الطريق بإذن الله تعالى
10 - اعيب على بعض الناس انها سبب مباشر و غير مباشر احياناً فى وجود معوقات على الطريق , ( واحد صحى الصبح لقى نفسة متضايق , قاللك لما اعمل مطب ادام البيت يعكنن على الجماعة اللى حافظين ومش حافظين )
أسف للإطالة و اتمنى الموضوع ينال اعجاب حضراتكم
وياريت تحفظوا الطريق
والسلام عليكم ورحمة الله وبركاتة
المفضلات