اولا حضرتك الموديل اللى حضرتك بتقول علية دة مش من 1990 الى 1995 لا دة من 1990 الى 1997 وكمان الشيروكى اصلا الشكل دة بدأ انتاجة من 1984 الى 1997 بعدية نزل شكل تانى اللى هو 1998 الى 2001 والفرق بينة وبين الموديل اللى قبلة فى الشكل عامة بتلاقى المراية فيها كرف وقانوس الاشارة الجانبى موجود فى جسم العربية والفانوس الخلفى بردة فى كرف وطبعا الصالون متغير تماما
نيجى لنقطة ان الشيروكى سعرها بقى واقع ودة من وجهة نظرى بيرجع اولا للاشاعات وعلى سبيل المثال قطع الغيار فى ناس كتير متوهمة ان قطع غيارها مش موجودة ودة طبعا عكس الحقيقة قطع الغيار متوفرة تماما فى الحرفيين وشارع شامبليون وغيرة
استهلاك البنزين طبعا اكيد حضرتك عارف ان الشيروكى فى مصر يا اما 4 سلندر او 6 سلندر الناس بردة متوهمة ان استهلاك الموتورين عالى يعنى يقولك ان ال6 سلندر غووووووول بنزين ولكن اة فعلا بتستهلك بنزين ولكن دة طبيعى لانها 6 سلندر ومقارنة بالعربيات اللى فى نفس الفئة هى بالنسبة ليهم مش بتستهلك وبردة ناس تقول ان ال4 سلندر حريقة بنزين لا طبعا انا كان معايا 4 سلندر كانت موديل 1992 قعدت معايا 11 سنة وانا هقول لحضرتك معدل استهلاك البنزين لكل موتور بس كل موديل ولية اختلاف طفيف فى الاستهلاك وعشان كدة هقول المتوسط
ال4 سلندر جوة البلد 13.8 ليتر لكل 100 كم
طريق سريع 11.2 ليتر لكل 100 كم
ال6 سلندر جوة البلد 16.8 ليتر لكل 100 كم
طريق سريع 13.1 ليتر لكل 100 كم
وناخد فى اعتبارنا ان العربية مظبوطة والموتور تمام
الضريبة فى ناس بتبالغ فى موضوع الضريبة ولكن عامة اى موديل عدى علية 10 سنين على انتاجة وسعة موتورة اكتر من 2000 سى سى ضريبتة بتبقى 1160 جنية سنويا
مع العلم ان الموتور ال4 سلندر 2500 سى سى
وال6 سلندر 4000 سى سى
وعلى فكرة نزل منها موتور تربو ديزل 2000 سى سى ولكن مش متوفر فى مصر
دى كلها حاجات انا شايف انها اثرت على العربية بشكل كبييييييير
لما نيجى نتكلم على العيوب والمميزات
من عيوب الشيروكى ان العفشة ناشفة شوية ودة طبعا لان العفشة مصممة للطرق الوعرة وناخد فى الاعتبار انها مش عربية سيدان
بردة الكنبة الخلفية فيها ضيقة شوية
انا مش عايز اقول استهلاك البنزين عيب لان دى عربية دفع رباعى يعنى مواتير سعتها كبيرة يعنى طبيعى استهلاك مش زى العربيات ال 1600 سى سى
فى بقى نقطة ان قطع غيار ال6 سلندر متوافرة اكتر من ال4 سلندر ولكن دة مش معناة ان ال4 سلندر قطع غيارها مش موجودة لا موجودة بس هتدور شوية وهتلاقيها اكيييييييييييييد وعلى فكرة قطع غيارها معمرة جدا جدا جدا هتركب وتنساها وكمان قطع غيار ال4 سلندر اغلى شوية عن ال6 سليندر ولكن مش الغلو الكبير لا حاجة بسيطة وفى ناس بردة قالت ان العربية دية كثيرة الاعطال الكلام دة مش مظبووووط اى شىء فى الدنيا لو اهملناة بيقى عرضة للتلف الفكرة ان لازم ايدك تكون فى العربية وتحافظ عليها صدقنى هتنساها تماما
فى بردة بعض الناس بتقول ان العربية بتسخن بسرعة ودة بردة بيبقى نتيجة الاهمال ودة من وجهة نظرى لانى عمرى مشتكيت من موضوع الحرارة بس دة مينعش ان فى ناس اشتكت من موضوع الحرارة وكان فى حل انك بتركب مروحة كهربا وسمعت بردة فى احد المنتديات الخليجية وطبعا درجة الحرارة عندهم عالية جدا ان الشيروكى هناك مشكلتها الحرارة وكان الحل بتركب بلف حرارة بتاع كابرس رقمة 160 والله اعلم فى النقطة دية ولكن انا المشكلة دية مواجهتنيش ودايما مؤشر الحرارة اقل من النص
نيجى بردة لنقطة ثبات العربية فى كلام بيقول ان العربية مش ثابتة وانها عالية اوى اولا عشان نبقى عارفين حاجة العربية دية مش معمولة للجرى فى الاصل مع انها جراية اوى وانا فى مرة جبت بيها 170 كم لكن بصراحة محاولتش اجرب الثبات لانى كنت قلقان جدا لان السرعة دية على طريق مستقيم لكن اقدر اقول الغيط 140 كم العربية ثابتة وبردة فى الاول والاخر لازم نراعى ان العربية دية مش معمولة عشان تقفل عداداها
المميزات
اولا العربية برستيج فى الركوبة وهتمشى براحتك ومش هتخاف من اى حد على الطريق
العربية عالية ودة مساعدك انك تعمل اللى انت عايزة
ال6 سلندر موتور جبااااااااار 190 حصان
ال4 سلندر موتور موفر فى البنزين عن ال6 سلندر
بس على فكر اللى ركب 6 سلندر عمرة مهيركب 4 سلندر ودة مش معناة ان ال4 سلندر وحشة لا بس ال6 سليندر موتور جباااااااااااااار
والله اعلى واعلم فيما قلت
المفضلات