-
اقتراح المبادله
السلام عليكم ورحمة الله وبركاته على جميع أعضاء المنتدى الجميل
أولا يا جماعه انا لسه جديد خالص في منتدى نايل موتوز الجميل ده بس بصراحه انا من كتر ما أنا عمال اشوف الأفكار والمقترحات والحلول والخدمات اللي في المنتدى والأعضاء بيقدموها بصراحه جت على بالي فكره مش عارف هي فكره كويسه ولا ايه وتتلخص في الآتي :
كل واحد منا عنده عربيه عايز يبيعها عايز يبيعها ليه ؟؟ اكيد في اسباب كتير لبيع السياره من الأسباب دي ان ممكن تكون العربيه اللي معايا فيها حاجه مش عاجباني مثلا عفشتها ناشفه شويه بس تكون إعتماديه بس في واحد تاني تكون عربيته ناعمه وفيها رفاهيه وبتصرف شويه وعلشان كده هو محتاج عربيه اعتماديه ميصرفش عليها كتير فتكون عربيتي بالنسبه ليه كويسه وعربيته ليا كويسه بردو -- لحد كده تمام ؟؟
الحاجه التانيه ان طبعاً العربيات مش كلها زي بعضها في السعر وفي الحاله وكل واحد مننا طبعاً شايف عربيته ملهاش حل وكل واحد فينا بيحط في دماغه سعر لعربيته أو سعر للعربيه اللي هيشتري بيه العربيه اللي محتاجه وصعب انه يقتنع برأي الشاري منه أو البايع له -- فأيه الحل بالنسبه للموضوع ده -- أنا بعد لما شفت الناس اللي عامله مواضيع في المنتدي ملهاش حل في تسعير وتقييم حالة السيارات فلقيت اننا كلنا ممكن نستفيد من بعضنا في الموضوع ده -- يعني مثلا انا ومحمود عايزين نعمل بدل ومش عارفين العربيتين حالتهم ايه وفي فرق المفروض يندفع ولا لأ ولو في فرق يبقى كام ففي هذه الحاله نستعين بأحد الخبراء الموجودين بالمنتدى ليقوموا بهذه العمليه تقييم وتسعير
والفائده اللي هتعم علينا من الموضوع ده أن اللي بيشتري مستعمل دايماً بيشتري بالغالي واللي بيبيع بيبيع بخساره فبدل منخسر علشان نغير نحاول نقرب الموضوع وكله يبقى مرضي -- وطبعا كله في مصلحة الجميع ومنها بردو تبقى فرصه علشان نوقف المهزله بتاعة تجار السيارات اللي عاملين زي المناشير يشتروا يكسبوا يبيعوا يكسبوا وكمان بيسيطرو على سعر السيارات المستعمله بطريقة وحشيه يعني العربيه من دول تعمل مثلاً 50000 جنيه تيجي تبيعها تلاقي التاجر يقولك 42000 أو 43000 جنيه وهو حاطط رجل على رجل ولما تيجي تشتري منه يقولك 55000 جنيه --
واسف جدا للإطاله
والله المستعان
-
اقتراح رائع بس محتاج تنسيق كبير بين اعضاء المنتدي .... ومتستبعدش ان في ناس من اعضاء المنتدي تجار و ده مش عيب علي فكرة هو المسالة كلها مسالة ضمير والله المستعان
-
-
يا ريت جماعه نكبر الموضوع اكتر من كده شويه والله انا حاسس انه او انتشر هيبقى ليه نتائج كويسه جدا وخصوصا اننا هنوقف التجار الجشعين عند حدهم بس انا حاسس بحاجه بصراحه في المنتدى بس بلاش نسبق الاحداث
والله المستعان
-
علي فكرة انا اقترحت علي المنتدي من فترة نعمل قسم للتبادل بين الاعضاء وكان فيه ناس كتير مرحبة بالفكرة وياريت نحاول احيائها من جديد
-
فكرة كويسة بس لازم يكون الاعضاء اللى هيسعروا العربيتين معينين من الادارة وطبعا استاذ شريف وهبة على راس القائمة
-
اقتراح ممتاز .... كل اللي علي الواحد انه يقابلوا بعض و كل واحد يعاين العربية و يتفقوا ان شاء الله
ارجو ان يتم تثبيت الموضوع
-
-
شكرا لكل اللي ساهم في الموضوع وقال رأيه ولكن بصراحه انا شايف ان في ناس مش موافقه على الموضوع بس بصراحه انا شايف ان اللي مش موافق على موضوع زي كده يبقى أكيد تاجر واستغربت جدا لما لقيت المشاهدات بتاعت الموضوع اكتر من 204 مشاهده و6 تعليقات فقط
بس خلينا للآخر وربنا يسر الحال للجميع وشكرا لكل من قال رأيه بصراحه في الموضوع
-
Content Relevant URLs by
vBSEO 3.6.0 PL2