السلام عليكم و رحمه الله و بركاته
انا مش عارف ابدأ ازاى بصراحه بس انا بحبكم فى الله اعضاء المنتدى و قسم نيسان خصوصا و حاسسكم زى اخواتى لما لكم من فضل بعد ربنا طبعا انى اشترى التيدا و انى اعرف نيسان عموما من قريب بعد ما تابعت قسم نيسان فى المنتدى هنا و قريت كتير فيه لانى عضو قديم نسبيا بس ما كنتش بخش قسم نيسان بصراحه
اولا انا ما كنتش بتشدنى نيسان و موديلاتها هنا قى مصر بصراحه و ما بحسش باى تغيير فى موديلات الصنى او التيدا كمثال من سنين من 2005 او 2006 فروقات طفيفه
المهم بعد ما فكرت اغير عربيتى و بدأت رحله البحث عن الجديد شدتنى الصنى الجديده و حسيت انها عربيه عمليه جدا و مناسبه لسعرها دى اهم حاجه
و فعلا يدأت اجراءات انى اخلص فيها بس اتشديت للجوك اوى رغم فرق الفلوس الى كان هيزنقنى شويتين بس كنت هخلص فيها بس حصل ان العربيه قلت و بدأت اسمع قصه الاوفر برايس اللى رافضها تماما و برضه [COLOR="rgb(255, 140, 0)"]الجوك مناسبه جدا لسعرها[/COLOR] و تحسها صفقه اكثر من ممتازه فى الفئه السعريه دى
و بعد ما صرفت نظر عن الجوك و كان جالى احباط خلاص دخلت دماغى الالنترا عربيه موجوده و جاهزه و هخلص على طول و انا كان معايا قبل كده الالنترا الشكل القديم بتاع 2006 و عربيه جميله جدا و مش فارق معايا موضوع كورى او لا لانها فعلا عربيه اثبتت نفسها و فرضت نفسها بقوه
المهم انى توهت توهان السنين فى فئات الالنترا لدرجه ان اصحاب المعارض نفسها بتتلخبط ( : و بعد حوارات كتير استقريت على فئه كانت بعد الخصم كان عامله غبور 138500 جنيه و كان فيها حاجات معقوله زىabs و air bag1 و مالتى و بلوتوث تقريبا و جنوط سبور و فتحه سقف و طبعا شكل جديد و حلو
مفيش يوميم و انا بظبط العربيه راح البيه غبور شال الخصم و نزل موديل 2013 و زياده 4000 علشان مرايات الضم يعنى هتقف ب 145000 تقريبا الفئه اللى كنت عاوزها قلت خليهالك يا غبور لان بصراحه تمنها مغالى فيه جدا من وجهه نظرى الشخصيه رغم انها عربيه كويسه بس الواحد و هو بيدفع فلوس بيتمنى على قد ما يقدر يشترى حاجه تستاهل الفلوس اللى دفعها
رجعت لنيسان تانى بس المره دى التيدا الهاتشباك لانى بحبها كتير عن السيدان شكلا اللى جابها فى دماغى انى لاقتها واقفه فى توكيل نيسان عندى فى السويس و دخلت اتفرجت عليها بتمعن كده و عجبتنى جدا رحت حجزتها وقتى و دفعت عربون زى ما يكون ما صدقت بس هى كانت اللى موجوده حمراء اللون و مش البلس و حصل حوارات مع صاحب المعرض كده و مشاكل فجبتها من معرض بتاع واحد صاحبى اشتراهالى من السبع تقريبا فى القاهره سوداء بلس
و فعلا لما ركبت العربيه و استلمتها حسيت فعلا ان الفرق فى الفلوس بين البلس و العاديه يستاهل يندفع لانى كنت محتار بينهم و كنت عامل موضوع بكده و الاخوه كلهم نصحوا بالبلس
العربيه ما شاء الله جمبله جدا و عجبتنى اوى ربنا يحفظها ان شاء الله
و فعلا بعد ما ركبتها حسيت انها فعلا افضل اختيار و عربيه تستاهل فلوسها نسبيا لباقى العربيات فى السوق ( طبعا لان العربيات فى مصر كلها مغالى فى تمنها)
فى الاخر احب اعترف انى كنت من الناس اللى ظالمه نيسان عامه فى مصر و كنت حاسس انها شركه مش بتطور نفسها و حكمى على الصنى و التيدا اللى بشوفهم من الظاهر بس و مش بيغيروا فى شكلهم بس بعد ما الواحد بقى بيتابع كويس و و كمان متابعه القسم هنا غيرت رأى تماما لدرجه انى لفيت على عربيات نيسان عربيه عربيه لغايه فى الاخر جبت تيدا برضه هههههه
و التوكيل اللى اصبحت سمعته من افضل التوكيلات فى مصر له عامل كبير برضه فى اختيار العربيه
و كمان حابب اضيف ان نيسان فعلا [COLOR="rgb(255, 140, 0)"]Best Value For Money[/COLOR]

طولت عليكم جدا معلش استحملونى بفضفض معاكم شويه
و شكرا ليكم يا اخوانى مره اخرى