الموضوع: كل ما تريد معرفته عن 206 (اداء - قطع غيار)

كل ما تريد معرفته عن البيجو 206

انا لاحظت ان كتير بيسألوا عن العربية دى فقلت أكتب كل اللى اعرفه عنها بأمانة و عن خبرة و تجربة 7 سنين

نبذه تاريخية عن هذا الموديل:
فى عام 1998 بدأ إنتاج السيارة 206 تم بيع هذه السيارة فى 121 دولة بلغت مبيعاتها 5 مليون سيارة فى أقل من 7 سنوات و تعتبر هذه السيارة هى أعلى نسبة مبيعات فى تاريخ شركة بيجو
أصدرت موديلات كثيرة من 206 و منها
- الهاتشباك و تم طرحها بمحركين 1100 سى سى يولد 60 حصان و الآخر 1400 سى سى يولد 75 حصان
- SW (Station wagon ) و تم طرحها بمحرك 1400 سى سى
- RC و التى تعتبر سيارة الراليات
- و الآن تم تصنيع النسخة السيدان منها و التى تجمع فى إيران و منتظر وصولها مصر قريبآ
مع العلم ان النسخة الهاتشباك مازال يجمع فى إيران بمحرك 1400 سى سى و متوفر بناقل حركة يدوى و اوتوماتيكى

السعر
العربية إحنا إشتريناها فى اواخر 2000 كانت ب48 الف جنيه – ايام البركة:) – كانت أغلى من اللانوس الفول اوبشنز ب 3 اللاف جنيه
و العربية 1400 سى سى كانت ب 64000 ... فرق السعر كان كبير اوى وقتها
و آخر سعر وصلتله أعتقد سنة 2006 كان 84 الف جنيه لكن للأسف مبيعاتها كانت قليلة جدآ

أداء الموتور
انا هتكلم عن 1100 لإن للأسف لم تتح لى الفرصة بقيادة 1400
الموتور نقطة أقصى العزم عند 2500 لفة فى الدقيقة (94 نيوتن/م)
العربية طلعتها جامدة و سحبها لحد 120 كويس بعد كده بتبقى بطيئة لحد 160 (أقصى سرعة) مع العلم إنى مش من هواة الجرى و القرص على العربية
العربية دى فى السفر أحلى سرعة ليها و اللى بحس ان العربية بتبقى مسترحة فيها هى 130 بعد كده بيبقى صوت الموتور عالى

الكماليات
تكييف – باور – سنتر بريموت – زجاج كهرباء امامى فقط – أربع سماعات فى الأبواب – عداد رحلات
العربية 1400 بتزيد فوج لايت امامى

بالنسبة للمميزات

1- شكل جذاب لحد دلوقتى رغم ان مضى عليه مدة
2- إستهلاك بنزين رائع حوالى 250 كم فى الصفيحة داخل المدينة فقط
3- تقفيل داخلى و خامات ما شاء الله بتتحمل
4- أدائها ممتاز حتى مع الموتور 1100 سى سى لكن طبعآ ال1400 سى سى هيكون أحسن بكتيير
5- تكييفها يعتبر جيد مش ضعيف حتى فى ساعة الظهر لكن مش فى قوة التكييفات اليابانى زى الهوندا مثلآ نظرآ لحجم الموتور برضه
6- ثباتها فوق الممتاز رغم حجمها الصغير حتى على السرعات العالية و فى الملفات

بالنسبة للعيوب
1- أسعار قطع غيارها مرتفعة لإن المفروض عربية من موديل 2001 لحد دلوقتى تكون قطع غيارها رخصت عن كده
2- قطع غيارها مش متوفرة خارج التوكيل ( الكلام ده فى الإسكندرية )لكن flyingpeugeot وصفلى كذا واحد فى القاهرة عندهم قطع غيارها
3- الدركسيون بتاعها تقيل شوية يعنى الباور مش زى الكورى او اليابانى بس هو فى المقابل بيبقى ثابت على السرعات العالية
4- مفيهاش الكماليات الكتير المبهرة زى اللى موجودة فى العربيات دلوقتى حتى ال207 تعتبر فاضية و هى بتزيد فقط عن 206 مرايات كهرباء لكن طبعآ فى الأداء ففى فرق كبير
5- التكييف بيأثر على سحبها لكن مش بيخنقها يعنى مش هتحس إنها بطة

هى دى العيوب اللى حسيتها فى العربية دى

بالنسبة لحجم العربية
اسرتنا 4 افراد (ربنا يخليهم) و الحمد لله بنركب مستريحين و شالت حاجتنا كتير فى السفر
لكن هرجع و أقول العربية دى مش بتاعة عائلات كبيرة و شنط كبيرة و كتيرة
هى العربية دى بتناسب الشباب أكتر او الأسرة اللى عددها صغير و مش بتشيل كتير

فهى مسألة نسبية و ممكن البعض يراها ميزة و البعض الآخر يراها عيب

التوكيل و مراكز الخدمة
التوكيل يعتبر جيد بصراحة ناس محترمين و مواعيدهم فى التسليم مظبوطة و الحمد لله عمرى ما غيرت حاجة فى العربية و رجعت ليهم تانى بنفس العيب
هم مشكلتهم ان مصنعياتهم غالية يعنى فى اقل حاجة ممكن تدفع 100 جنيه مصنعية
بس فى المقابل هم عندهم العدد اللازمة لفك كل جزء فى العربية يعنى مفيش شغل الميكانيكية و الخبط اللى بيعملوه

و الكلام ده ينطبق على مركزين الخدمة اللى فى الإسكندرية (مصطفى كامل – الطريق الصحراوى)

أسعار بعض قطع الغيار اللى تم تغيرها فى العربية
الفلاتر
فلتر الزيت 34
فلتر بنزين 80
فلتر هواء 123

بوجيهات عدد 4 بوجيهات 140

ما تم تغييره على 70 الف كيلو
سير تقسيمة 165
سير دينامو 95
ماكينة ستوب 30
عدد 2 رولمان بيل عجل امامى 800

ما تم تغييرها على 117 الف كيلو
عدد 1 مساعد امامى (طبعآ تم تغيير المساعدين) 365
عدد 1 مقص امامى (نفس الكلام غيرت المقصين) 740
طقم تيل فرامل امامى (مش اول مرة يتغير بس ده آخر سعر) 300
ما تم تغييره على 124 الف كيلو
طقم دبرياج(اسطانة و ديسك و رولمان بيل) 1790
اويل سيل كوبلنج 35
رولمان بيل كوبلنج 65
كابل دبرياج 245
ذراع ميزان 315

ملحوظة الأسعار غير شاملة ضريبة المبيعات و بالنسبة لصيانة 70 الف كيلو فإحتمال يكون تم تغيير بعض الأسعار بالزيادة او النقص

سعر المستعمل منها حاليآ

الحالة الممتازة – فابريقة – مش ماشية كتير تعمل فى 54 الف جنيه

العربيات المنافسة فى نفس السعر فى المستعمل
سكودا فابيا – بولو – الإبيزا – الكليو الهاتش باك الفرنساوى


نصائح لكل واحد يريد شرائها إستعمال

أولآ صلاة الإستخارة

ثانيآ لابد لابد من الكشف على السيارة و التأكد من انها خالية من العيوب الميكانيكية لإن العربية دى قطع غيارها غالية زى ما انتوا شايفين

ثالثآ لو عايز عربية تجرى و تطلع بيها من اى حد جنبك و تبهرك بتسارعها فالعربية 1100 سى سى مش هتبسطك اوى
يعنى من الآخر دور على ال 1400 سى سى


معلش انا طولت عليكم و يا رب أكون أفادتكم
كل واحد يدعيلى دعوة حلوة على الماشى كده