الموضوع: استلام نيو صني 2013 و صيانة الاف كيلو (مزايا , عيوب , استفسارات )

المشاركة الأصلية كتبت بواسطة kfarouk

معلش انا مش عارف ارفع الصورة بس يا ريت تقوليلي ارفعها ازاي و انا ححطها علطول

.

فعلا موضوع الصور ده مهم جدااااا فى صقل التقارير والمواضيع ودعمها .. ولو كنت تعتب شوية وقلبت فى الفهرس كنت لقيت كذا موضوع لكيفية رفع الصور
ومع ذلك .. خد الموضوع ده منى هدية العربية الجديدة
http://www.nilemotors.net/Nile/264509-a.html

المشاركة الأصلية كتبت بواسطة kfarouk

السلام عليكم يا صقور النيسان

اولا انا حابب اشكركم جميعا و اشكر المنتدى انه ساعدني كتير في اختيار العربية دي
وانا الحمد لله استلمت اخر الشهر الي فات و كنت حابب اعملكم تقريير بس قلت استنى صيانة الاف بالمرة

اولا الحمد لله العربية جميلة جدا و انا حاسس ان سعرها جميل جدا بالنسبة لامكانيتها
.

وعليكم السلام ورحمة الله ..
لا شكر على واجب و1000000000000000 مبرووووووووك على استلامك وعملك الصيانة على خير وربنا يباركلك فيها

المشاركة الأصلية كتبت بواسطة kfarouk

نبتدي بالمزايا الي انا شفتها في العربية مع العلم ان انا كان معايا قبل كدا لانسر بومة هاف سبورت وده يا جماعة رأيي المتواضع و يا رب يكون مفيد ليكم

- العفشة ناعمة جدا
- التسارع و السحب يعتبر متناسب مع الموتور 1500
- الصالون واسع جدا سواء من الامام او الخلف
-مساحة الرؤية و الابعاد كويسة و متتخضش من العربية
-تبريد التكييف حلو جدا
.

فعلا معك حق رغم ان التعليق فى اللانسر والصنى الجديدة مستقل للعجلات الاربعة
الا انك ملاحظ نعومة العفشة اكتر فى الصنى لأن شوط المساعد زاد عكس اللانسر عفشتها قاسية ورياضية

المشاركة الأصلية كتبت بواسطة kfarouk

العيوب

-صوت تشغيل التكييف عالي قوي يعني انا بتخض اول ما اشغل التكييف
-حاسس ان ادراج الصالون ضيقة ودرج التابوه بعيد عن السواق و مساحات التخزين قليلة
- الكاوتش الصيني كان بيدب في المطبات بس ظبط شوية بعد النيتروجين
- المرأ بتاعة الصالون مش جايبة رؤية واضحه للمساحة الخلفيه
-صوت صفارة حزام الامان مزعج جدا
-مافيش صفارة لما بتعدي 120
.

تقصد حضرتك صوت الكومبريسور ولا مروحة التكييف الموجودة بالتابلوه الامامى ؟
فعلا النيتروجين بيكتم صوت الكاوتش شوية عن الهواء العادى
صفارة حزام الامان بقى كده فى كل العربيات الجديدة وده فى النيسان من اول شكل الرينو اسكالا واكيد ارحم من الكورولا والفلوانس !!!!!!!!!!
خلى بالك بقى من السرعة عشان ما تسرحش فوق ال120

المشاركة الأصلية كتبت بواسطة kfarouk

انا كمان عندي شوية استفسارات

- هو جهاز الانذار الي فيها بيشتغل ازاي و هل محتاج برمجة ولا لأ
-في فلتر تكييف في العربية دي و لو مافيش ليه او ايه الحكاية
-في تحت كرسي السواق بلستكتين قريبين من ذراع ترجيع الكرسي دول بتوع ايه
-كمان المكان الي بنريح فيه رجلينا لان العربية اتوماتيك المفروض في عربيات تانية بيبقى عليه معدن علشان ما يوسخش فرش الارضية فممكن يركبله حاجه معدن لاني بخاف اجيب رجلي عليه و بفضل حاططها على الدواسة الجلد بتاعة طقم الدواسات
-كمان عايز طريقة اشيل بيها استكيرات المعرض الي اشتريت منه العربية لاني ما بحبش الاعلانات على عربيتي من غير ما اجرح العربية او ابوظ الدوكو
.

1. انذار النيسان بيختلف عن غيره بأنه مالوش صوت وانت بتفعله وبتلغيه غير اشارات الالتفاف بس بتنور .. بيحتاج برمجة لو فيه عطل لا قدر الله
2. فلتر المكيف فى الصنى القديمة على مستوى العالم ما كانش بينزل فى العربية انما الجديدة فيه ناس اكدت وناس نفت .. لكن الخميس الماضى وانا باعمل صيانة فى اتوايجيبت وقابلت صاحبى مستلم صنى جديدة اتوماتيك بيعمل صيانة الالف قالى مفيهاش ومش موجود فى التوكيل لسه !!!
3. البلاستيكات اللى تحت الكرسى دى غالبا ما بتكون لتثبيت الدواسات الاصلية للعربية عشان ما تتحركش جراء حركة رجل السائق وتضايق حركة الدواسات
4. دواسة القدم على الشمال مش شرط تكون معدن او كاوتش لكن بتكون بارزة عن الارض وخلاص وممكن تتظبط عن سروجى محترم
5. نصيحة بلاش تشيل الاستيكر ده لأنه مهما شيلته ومهما عملت اول ما تروح اى صيانة فى اى مركز هتلاقيه اتلزق تانى .. انا زيك بالظبط وباتخنق منه لكن كل مرة اشيله ويحطهولى تانى لدرجة انى كنت باغير حاجة فى الضمان فى مركز ما مش صيانة ولقيتها خارجة بيه !!! طلع فيه واحد مسؤوليته عن لزق الاستيكر على اى عربية مش عليها .. ومرة تانية كنت غيرت مركز الخدمة وعليه لزقة القديم لقيت الجديد لزق استيكره الناحية التانية من الشنطة !!!!!!!!!!!!
ومهما اتكلمت وطلبت من مهندس الاستقبال .. مش بيحصل لان العامل فى احد المراكز بيلزق الاستيكر قبل ما تنزل من العربية اساسا ويكيسها ومؤخرا الاستيكرات اتغيرت وبقت خاصة بنوعية الزيوت اللى بيحطها المركز
فاخيرا كبرت دماغى وسبتها ..
بص لو على الزجاج الخلفى بتتشال بكتر بسهولة بدون تجريح او بالاظافر لو عندك صبر
انما لو على صاج الشنطة بلاش عشان ما تجرحش البوية الا لو اتعملت بحرض شديد بسكينة او كاشطة بلاستيك بزاوية ميل معينة

المشاركة الأصلية كتبت بواسطة kfarouk

نيجي بقى لتقرير صيانة الاف كيلو

عند مودرن موتورز فرع الدراسة و اخدت معاد تركيب بعد الفطار الساعة 9 بليل


....بس حصلت حاجة غريبة و انا بستلم العربية لاقيت فيه خربشة في الباب الي ورا السواق و رحت اشوف المهندس الي استلم مني العربية لاقيته روح فشفت مهندس تاني و وريتله الخربشة و جابولي مدير الورشة تقريبا قالي احنا معندناش حاجة تعمل كدا دي اتعملت برة قلتله انت مستلمينها سليمة
فراحوا جابو ورقة الاستلام وفعلا ماكنش فيها اي علامة ان في تجريح فقالولي استنى شوية و دخلوني في غرفة استناهم و بعد ربع ساعة قالولي تعالى استلم العربية و كانوا عالجوا الخربوش ازاي ما اعرفش

بس راجعتها كويس و استلمتها الحمد لله و لاحظت ان التكييف بأى احسن من ما سلمتها بس مش عارف ليه.
.

حضرتك تقصد مركز يونايتد جروب الدراسة وليس مودرن موتورز .. مش كده؟
وطبيعى تكون العربية اتخربشت لانها بعد ما بتخلص بتتساب فى الشارع طالما خربوش مش خبطة لاقدر الله ..

بحييك على تقريرك وسردك للاحداث باستفاضة .. وكثرة التقارير .. بتفيد .. لاننا بنسمع كذا راى عن العربية

المركز اللى حضرتك اتعاملت معاه فى الدراسة .. مبدئيا مفيش غير مركز واحد فى الدراسة .. وهو مركز يونايتد
وده مركز معتمد لنيسان .. فهو اسمه يونايتد مش مودرن ..

ويونايتد من المراكز القديمة والمعتمدة زى ما قولت لحضرتك .. وكويس انهم عالجوا موضوع الخروبش ده .. وطلع بسيط

موضوع التكييف اصبح افضل .. طبيعى بعد صيانة الالف .. لانهم بيشكيوا على حاجات كتير فى الصيانة .. وبيجربوا حاجات كتير .. سواء حضرتك بتشتكى منها او مش بتشتكى .. واعتقد فى حاجة من الاتنين حصلت
يا اما هما بيشغلوا التكييف وبيجربوه .. فحسوا ان التكييف ادائه ضعيف .. وكان محتاج الى فريون .. او كان فى حاجة وهما ظبطوها .. او كان فى فلتر تكييف .. وهما فكوه ونظفوه .. وياريت حضرتك تتصل بيهم وتتاكد من حكاية الفلتر التكييف ده .. واحنا بدورنا حنتاكد بردوا

الانذار اللى فى العربية .. زى اللى عربيتى التيدا .. ايموبليزر .. ضدد السرقة .. لو العربية الزجاج اتكسر او اتفتح الباب بطريقة غير شرعية او حد حاول يدور العربية بمفتاح مش مفتحها .. العربية حتفصل ومش حتدور

وموضوع الصفارة اللى مش موجودة بعد 120 عادى مش موجودة فى عربيات كتيرة .. حتى الدواسة اللى فى الارض .. وعلاج موضوع الدواسة اللى فى الارض .. انك تركب فرش جلد .. يخلى الارضية عندك ملبن وحرير وسهلة فى النظافة جدا .. زى اللى مركبها فى عربيتى

وسعر سنسور الركن غالى .. فى مودرن بيركب فى حدود 350 بالتركيب .. ومودرن توكيل معتمد بردوا !

نصيحة اخيرة .. الزيت اللى حطيته فى العربية تنزله قبل ال10 الاف يعنى على 8 الاف واخلعه من العربية .. وحط مكانه شل او ليكوى مولى او كاسترول او فالفولين

الف مليون مبروك .. وجزاك الله خيرا على تقريرك المفيد
وبارك الله فيك

تحياتى