الموضوع: الإختراع النميس - سد الفتحه تريح الجمجمه

بداية الموضوع منقول من موقع ماي ايجيبت ماجازين
فضلت وضعه هنا عن توبيك المواضيع المنقولة لارتباطه الوثيق بحلول الازمة المرورية


الإختراع النميس - سد الفتحه تريح الجمجمه

[في المقال السابق] قلنا ان مشكلة المرور مش إن الناس ليست ملتزمة بقواعد المرور بل تتعدى ذلك بكثير. إحنا معندناش نظام مرور من أساسة ولا تصميم هندسي صحيح للطرق ولا علامات أو أشارات مرور تشجع على إحترامها لأن معظمها، و لن اكون مبالغاً اذا قلت كلها، غلط. لازم نعمل الحاجة صح و نعلم الناس و بعدين نحاسبهم. هل الصورة قاتمة؟ أيوة قاتمة. هل فية أمل ؟ أيوة طبعاً. سنحاول في مجموعة مقالات التعرض لنماذج من التهريج الفظيع في تخطيط شوارعنا و ما يسمى بنظام مرورنا (أنا مصمم إن معندناش نظام مرور أساساُ) و إيضاح الفكرة بدون الدخول بعمق في تفاصيل فنية (وإن كانت شر لابد منة و لكن سنحاول شرحها بصورة مبسطة)...و في مجموعة مقالات أخرى سنناقش الحلول المقترحه.
بعد إكتمال الصورة، سنتعرض في مقالتنا عن الطرق و المرور، و المقرر لها يوم السبت كل أسبوعين مره، لعقد مقارنات مختلفة بين المسخرة اللي عندنا و النظام اللي عند الناس برة، يمكن حد يسمعنا و يحط إيدة في إيدنا و نبدأ مشوار الألف ميل للإصلاح.
عايز أبتدي معاكم بالمسخرة الكبيرة اللي بدأت منذ سنوات، و هي فكرة مفتكسة و أختراع نميس يستحق صاحبة مكافأة هنخليهالة مفاجأة في آخر المقال. عندنا تقاطع كبير والإشارات فية بايظة.. جبنا عساكر و مش تافع.. جبنا ضباط من كافة الرتب و برضة مش نافع.. نعمل إية؟ نعمل أية؟ نسد الفتحة اللي في التقاطع و نعمل فتحتين واحدة يمين شوية وواحدة شمال شوية (U TURNS) و نسيب الناس يلعبوا مع بعض..
مثال: أنا ماشي في عباس العقاد.. عايز أعدي مصطفى النحاس.. أخش أكسر على الناس اللي ماشية في مصطفى النحاس و آجي من أقصى اليمين لأقصى اليسار علشان الحق اليو تيرن، و بعدين أحود و أكسر تانى علي الناس اللي ماشية في مصطفي النحاس من الناحية التانية علشان أقدر آجي تاني من أقصى اليسار لأقصى اليمين و أكمل تاني في عباس العقاد.
كل واحد وشطارتة وعضلاتة وحجم عربيتة. على فكرة التقاطع اللي إتخذناه كمثال، قبل ما يتحول للإختراع النميس ماكانتش راكبة فية إشارات مرور من أساسة و كان يدار بالكامل بالعساكر و بمساعدة الضباط في بعض الأوقات..أنا كنت كثير المرور في هذا التقاطع و كان لما العساكر تتعب و تروح باليل كنت دائماً بضحك مع نفسي و أقول الإشارة روحت..
تخيلوا تقاطع بهذا الحجم و كمان فية مترو في النص ماشي كدة بالبركة.. إية المطلوب من الناس؟؟ و مين يستنى مين ؟؟ المفاجأة بقى إنة بعد ما تحول للإختراع النميس برضة صعب بل مستحيل تحدد إية المطلوب من الناس و مين يستنى مين. تعالوا نحلل الإختراع النميس:
تحديد من له حق الطريق: العبارة دي إفتكروها علشان هنكررها كتير في مقالتنا و هي أساس موضوع المرور كلة و خصوصاً في حالة الحوادث لأن ده اللي هيحدد بدقة مين الغلطان و بالتالي يحط ال... في بقة و يسكت خالص مش ينزل يتخانق و يبلطج. كمان لما يجي البوليس يعاين الحادثة يقدر يعرف بسهولة مين اللي غلطان وبالتالي يعوض الطرف الآخر عن طريق التأمين ضد الغير.
في الإختراع النميس يا ترى مين له حق الطريق ؟ اللي عايز يعمل يو تيرن عايز يجي من أقصى اليمين لأقصى اليسار علشان يحود و ده حقة (هو أصلاً معندوش حل تاني) و اللي ماشي على طول مش عايز حد يكسر علية و دة برضة حقة. لو خبطوا في بعض.. مين اللي غلطان.. الغلطان هو الغلبان اللي فيهم و لو الإتنين ليهم نفس القوة.. يالطيف هتبقى خناقة للركب.
فية نظام هندسي معروف إسمة الدوار (Round About) يعني هو حل هندسي مطور بأسس علمية للصينية أو الميدان بتاعنا و هو مستخدم بكثرة في دول الخليج، و على فكرة هو بيفشل في التقاطعات الزحمة و لكن سبب ذكرة الآن إنك بتعرف تحدد بسهولة شديدة من لة حق الطريق في تقاطع ليس بة إشارات مرور.. حق الطريق ببساطة للي جوه الدوار يعني حضرتك لو مقرب على التقاطع لازم تهدي خالص و هتلاقي علامات صريحة تنبهك إن حق الطريق ليس لك (و موضوع العلامات دة موضوع كبير هنتكلم عنه كتير بعدين) و لو لقيت عربية بتلف الدوار تستناها لحد متلاقي فرصة مناسبة و تدخل الدوار و بالتالي يبقى حق الطريق لك و كل الناس تستناك (آن آن آآآآآآن).
واحد يقولي سهلة طب مأنت حليتها يبقى حق الطريق في الإختراع النميس للي ماشي على طول.. أقولة يبقى اللي عايز يستعمل اليو تيرن هيستنى خمستاشر ساعة علشان يلاقي فرصة الساعة تلاتة صباحا ً علشان يدخل الطريق.. الحركة الدورانية في الدوار بتدي مسافات بين العربيات يقدر يستخدمها اللي واقف على مدخل الدوار علشان يدخل.. كمان المدخل و المخرج لهم تصميم هندسي معين يسمح بسرعة الدخول للدوار و سرعة الخروج منة علشان يسمح لغيرة يدخل.
تصميم قطاعات التداخل: (Weaving Sections) قصة إن حضرتك تروح من أقصى اليمين الى أقصي اليسار في طريق ما معترضاً السيارات اللي ماشية على طول دي واردة طبعاً في حالات معينة وإسمها في هندسة المرور قطاعات التداخل، و لكن لها تصميم معين بياخد فى إعتباره طول قطاع التداخل مع حجم السيارات اللي ماشي على طول في الساعة مع حجم السيارات المتداخلة (اللي بتغير إتجاهها) في الساعة و عدد الحارات اللي بتقوم السيارات المتداخلة بقطعها لمعرفة إذا كان قطاع التداخل محل الدراسة هينجح ولا لأ. وبالتالي يتم تصميمة أو البحث عن حل بديل.

نفسي طبعاً واحد يقوللي إن دة إتعمل لأى يو تيرن في مصر وننزل على الطبيعة و ندرس.. والله أجيلة مخصوص مش من الخليج لأ من آخر الدنيا بس لو طلع بيهجص ذنبة على جنبة.
عدد الحارات: فية قاعدة هندسية بتقول إنه عند دخول عدد من الحارات المرورية على طريق رئيسى لازم عدد الحارات بعد الدخول يساوى على الأقل عدد الحارات اللي داخلة + عدد حارات الطريق الرئيسي – 1 و ده إسمة "إتزان الحارات".
يعني لو عباس العقاد مثلاً ثلاث حارات و مصطفى النحاس ثلاث حارات يبقى مصطفى النحاس بعد دخول العقاد عليه لازم يبقى خمس حارات على الأقل.. مزودها أنا حبتين مش كدة؟ ما الدنيا ماشية زي الفل إية وجع الدماغ دة؟
نيجي بقى للمكافأة اللي أنا محضرها لمبتكر الإختراع النميس (وللا نسيتوا) قبل المكافأة هنطلب منة طلب صغير و هو إنة ياخد مراتة و إبنة الصغير و أبوة المسن و يحاول يعدي أي شارع من اللي طبق فيهم إختراعة النميس (جامعة الدول العربية – طريق النصر – مصطفى النحاس) يعني الأقرب له عشر مرات رايح جاي والمكافأة ساعتها هتبقى من عند ربنا مش من عندي (دانا غلبان) و هو إنهم يبقوا عملوا المغامرة دي و عاشوا بعدها كلهم أو إنكتب لهم عمر جديد بعدها و لو إني مظنش إنهم هيحصلوا عليها !!!!!

ربنا يجعل المكافأه دى من نصيبنا كلنا...طول ما أحنا ماشيين فى شوارعنا

طارق عويضه

ألف شكر على الموضوع

ويا ريت المهندس طارق عويضة الكاتب الأصلي يشاركنا في منتدانا
لأن الواضح أنه خبير في تخطيط الطرق