محتاج اعرف الطريق للعنوان ده في اكتوبر ضروري جدا

مساء الخير يا جماعة و كل سنة و انتوا جميعا بخير
محتاج اعرف العنوان ده بالكتير اوي بالليل لانى المفروض اكون عندهم الصبح و انا بصراحة اول مرة اروح المنطقة دي
دلوقتي انا المفروض اكون في مكان اسمه بوابة الفيلل في بيفرلي هيلز الساعة 12
وانا من الزقازيق
ف والنبي كدة حد يقولي المفروض اركب ايه مواصلات علشان اكون هناك
انا طريقي بيبقي من بنها لقليوب لشبرا الخيمة لعبود
انزل ايه و اركب ايه علشان اروح العنوان ده
شركة دانا جروب - بوابة الفيلل - بيفرلي هيلز
متشكر جدا علي المساعدة اللى عارف انكوا زي كل مرة هاتقدموهالى

حضرتك تنزل المؤسسة تركب عربية اكتوبر وتخلي السواق ينزلك عند بفرلي هيلز هوه اللي هيتعبك شوية رقم البوابة الطريق سهل جدا لا تقلق بس خلي بالك انت لازم تخرج من عندك بدري من الزقازيق لان مدخل القاهرة الصبح بيكون زحمة جدا وكمان مدخل المحور وممكن حضرتك من علي جوجل تحد طريق بالتفصيل اكتر
وتروح وترجع بالسلامة

متشكر جدا علي الرد السريع بتاع حضرتك
انا بالفعل لما باكون مسافر باخرج بدري علشان مدخل قليوب لحد شبرا بيكون ميت و بياخد بتاع ساعتين تقريبا فانا عامل حسابي في كدة
هاخرج بدري ان شاء الله
بس معلش هاعيد معاك تانى الوصفة زي ما اتقالتلي من ناس و تاكد عليا في الحاجات الناقصة
دلوقتي هانزل مؤسسة و هاركب اي حاجة رايحة اكتوبر ( بتعدي علي ميدان جهينة ) لان في طريق الحي السادي من عند المدينة و ما بيعديش علي جهينة !
هاركب عربية اكتوبر دي و انزل ميدان جهينة و من هناك اخد اي عربية رايحة لبيفرلي هيلز او للكارتة ومن هناك هاقوله عاوز انزل بيفرلي هيلز ؟!
ده كان اول رد و وصفة

تانى رد بتاع انى وانا راكب عربية اكتوبر نفسها اقول للراجل نزلني بيفرلي هيلز ؟ ومن هناك ادور انا علي رقم البوابة ؟!

وانا هاعرف رقم البوابة ازاى ؟ ما انا ممكن انزل عند بوابة و البوابة اللى انا عاوز اروحها اصلا تكون في الطرف التاني ويكون مشوار ابن ستين في سبعين في الحر و الصيام ده

للاسف مش عارف اتعامل مع جوجل علشان اجيب العنوان بالتفصيل

متشكر جدا كمان مرة لمساعدة حضرتك و اتمني اى حد عنده معلومة تانية ما يبخلش عليا بيها

بص هى بيفرلى هيلز فى الشيخ زايد من عبود تروح رمسيس و تركب 6 اكتوبر من المحور او الشيخ زايد
المشكله بقى فى ايه ... انت ممكن تنزل عند هايبر او مدخل الشيخ زايد و هناك هتلاقى ميكروباصات و تشوف ايه ممكن ياخدك لبيفرلى هيلز بس المسافه طويله ... تخيل معايا الشيخ زايد مربع و انت جاى عند هايبر او مدخل الشيخ زايد عند اول ركن ... بيفرلى هيلز عند الركن المقابل ليه يعنى هتقطع المدينه بالورب ...
الاقرب و انت راكب ل 6 اكتوبر تنزل ميدان جهينه (الركن التانى للمربع) بس للاسف معرفش من هناك فى مواصلات بتنزل تروح ناحية بيفرلى هيلز ولا لأ

على قد ما قدرت وصفتلك و اتمنى حد يكون عنده خبره اكتر بالمنطقه يساعدك و دى خريطه توضح المكان شويه
Wikimapia - Let's describe the whole world!

استاذ محمد متشكر جدا علي مشاركتك والمعلومة اللى قدمتهالى
بس انا كدة احترت اكتر
يعني ايه الاضمن انى انزل جهينة و من هناك ادور
ولا ادور و انا راكب الميكروباص بتاع اكتوبر اساسا ؟
وكمان موضوع البوابات ده حاسس انه هايطلع عيني زيادة
اتمني حد من هناك او عارف المنطقة يرد ويشارك معانا علشان في امس الحاجة للمشوار ده بكرة

اركب اى حاجه لاكتوبر ماشية المحور وانزل مدخل زايد 2 هتلاقى العربيات كتير هدخلك جوة

استاذ كشري متشكر علي المشاركة
طيب الحل ده اكيد ؟
يعني لو ركبت اكتوبر من مؤسسة ( تكون ماشية محور ) اقوله نزلني مدخل زايد 2
ومن هناك هالاقي حاجة رايحة لحد البوابة بتاعة الفيلل ؟

شكرا جزيلا علي المساعدة يا اجدع رجالة و اجدع منتدي
من جهينة ركبت عربية لحد البوابة و من هناك اتصرفت
مشاركتكوا كلها كانت مفيدة جدا و اقدرها فعلا
الف شكر لكل من ساعدني
كل سنة و انتوا طيبين